Toy mərasimlərinin keçirilməsinə icazə verilməsindən sonra şadlıq sarayları və restoranlar mərasimlərin təşkili qiymətlərini açıqlayıblar. Açıqlanan qiymətlərdən görünür ki, mərasimlərin təşkili xərci pandemiyadan əvvəlki dövrlə müqayisədə xeyli yüksək olacaq.
Şadlıq evləri qiymətləri 2019-cu illə müqayisədə orta hesabla 20 faiz artırıblar. Qiymət artımı həm ərzaq menyusunda, həm musiqi-əyləncə xidmətlərində, həm də digər xərclərdə müşahidə edilir.
Qeyd etdiyimiz kimi, şadlıq evlərində artıq qiymət artımı yaşanır. Ölkə ictimaiyyəti şadlıq evlərində yer pulunun qalxmasına etiraz edir. Yer pulunun 30 manatdan yuxarı olmaması təklif olunur.
Milli Məclisin Mədəniyyət komitəsinin üzvü Əziz Ələkbərli toylar haqqında fikirlərini “Modern.az”la bölüşərkən qeyd edib ki, Azərbaycan xalqının çox qədim toy ənənəsi olub, hamı övladına təmtəraqlı toy etmək arzusunda idi. Amma bəzi işbazların bundan istifadə etməsi, qiymətləri qaldırması xoşagələn hal deyil: “Toy biznesinin başında duranları qınamıram, onların işi budur. Bu problemin yaranmasında ən böyük günah vətəndaşlardadır. Artıq xeyli vaxtdır ki, insanlar toy ənənələrimizi çox xoşagəlməz bir vasitəyə çeviriblər. Toylar olub soyğunçuluq vasitəsi. Təklif edərdim ki, şadlıq evlərində toy menyularının yuxarı həddi 30 manat olmaqla müəyyənləşdirilsin. Yəni 30 manatdan baha menyulara məhdudiyyət qoyulsun”.
Ekspertlər də toy menyularının yuxarı həddinin 30 manat müəyyən edilməsinə müsbət yanaşırlar.
“...şadlıq evləri üçün standart menyu və qiymət müəyyən olunmalıdır”
Sosioloq Aytəkin Kamranqızı bildirdi ki, hazırda toylara tələb yüksəkdir. İyulun 1-dən etibarən kifayət qədər böyük sifarişlərin olacağı gözlənilirdi. Tələb yüksək olduğuna görə bəzi şadlıq saraylarının sahibləri süni şəkildə qiymət artımına getdilər və xüsusən pandemiya dövründə işləmədikləri üçün menyuları daha yüksək qiymətə təklif edirlər.
Həmsöhbətimizin sözlərinə görə, şadlıq evlərində təklif olunan menyuda çoxlu sayda təam olur. Ancaq toyda iştirak edən qonaqlar masaya düzülən hər təamdan dadmır. Həmin təamların əksəriyyəti masada yeyilməmiş olaraq qalır. Beləliklə, israfçılığa yol verilir. İsrafçılığa yol verilməməsi məqsədilə şadlıq evləri üçün standart menyu və qiymət müəyyən olunmalıdır: “Şadlıq evlərində menyunun qiyməti elə olmalıdır ki, hər kəsin büdcəsinə uyğun olsun. Yaxşı olar ki, toy menyularının yuxarı həddi 30 manat dəyərində olsun”.
Sosioloqun fikrincə, toy adət-ənənəsi dəyişməlidir. Əvvəlki kimi 300-500 şəxslə toy keçirmək ənənəsinə son qoyulmalıdır. Toyda iştirak edəcək şəxslərin sayı maksimum 100 olmalıdır. Az sayda insan məclisdə iştirak edərsə, həmin toy daha maraqlı olar: “Koronavirusun hələ tam bitmədiyini nəzərə alsaq, toy və digər məclislərin keçirilməsinə nəzarət etmək lazımdır”.
Günel CƏLİLOVA
