Mətbuatda yayılmış məlumata görə, Abşeron rayonu, Masazır qəsəbəsində "Rahat Nəfəs" MTK tikdiyi binadakı mənzilləri sakinlərinə təhvil vermir. Kimisi ipoteka ilə, kimisi isə nağd şəkildə pul ödəsə də, mənzillərinə sahib ola bilmirlər.
Qeyd edək ki, sakinlərin bəzilərinə tikilən binadan, digərlərinə isə tikiləcək binadan mənzillər satılıb. Onların bəziləri pulunu tam ödəyib, amma tikiləcək binadan bir xəbər yoxdur. Sakinlər iddia edirlər ki, onlara məxsus mənzillər başqalarına satılıb.
Onu da qeyd edək ki, “Rahat Nəfəs " MTK rəhbərliyi podradçı şirkətlə müqavilə imzalasa da, binanın tikintisi üçün heç bir iş görülməyib.
Podratçı Kənan Əliyev vətəndaşların şikayətlərinin haqlı olduğunu düşünür.
“Rahat Nəfəs” - Yelena Vladimirovna: “Sakinlər mənzillərdən notarial qaydada imtina ediblər”
“Rahat Nəfəs” şirkətinin icraçı direktoru Yelena Vladimirovna isə bildirdi ki, mənzillər başqa adamlara satılmayıb. Sakinlər mənzillərdən notarial qaydada imtina ediblər.
Qeyd edək ki, son zamanlar bu mövzu ilə bağlı səslənən şikayətlərin sayı artır. Maraqlıdır, binalar niyə vaxtında tikilib təhvil verilmir? Bu sahəyə necə nəzarət tətbiq olunmalıdır?
Nüsrət İbrahimli: “Tikinti şirkətlərinin qarşısına tikintinin bitmə müddəti haqqında şərt qoyulmalıdır”
Daşınmaz əmlak məsələləri üzrə ekspert Nüsrət İbrahimli bildirdi ki, bu sahəyə nəzarət mexanizmi tətbiq edilməlidir: “Məlumat üçün bildirim ki, hər bir tikilinin həcmindən və mürəkkəbliyindən asılı olmayaraq, onun tikinti müddəti var. Tikinti şirkətlərinin qarşısına tikintinin bitmə müddəti haqqında şərt qoyulmalıdır. Bundan əlavə, binanın tikintisinə başlamamışdan öncə icazə sənədləri rəsmiləşdirilən zaman irəli sürülən tələblərdən biri olaraq binanın tikintisi üçün xərclər smetası təqdim edilməlidir. Həmin vəsait banka yerləşdirilməlidir. Bina tikilib, təhvil verilənə qədər həmin pulu xərcləməməlidir. Bina tikilib, tam şəkildə hazır olandan sonra məlum vəsaiti bankdan çıxara bilər. Qeyd edim ki, belə bir hal dünya təcrübəsində mövcuddur. Belə bir qayda bizdə də tətbiq olunarsa, binalar vaxtında tikilib, vətəndaşlara təhvil verilər. Ancaq bizdə bu sahədə boşluq var. Elə tikililər var ki, 10 ildir tikilir, ancaq hələ də ortada heç nə yoxdur. Tikilinin vaxtında təhvil verilməsi ilə bağlı beynəlxalq normativlərdən istifadə olunmalıdır”.
Günel CƏLİLOVA
