Elvin Ramiz oğlu Səfərov. Bu ad indi dağlar diyarı Lerik rayonunda ən çox əzizlənır, hər yerdə, hər an sevgi dolu ürəklə xatırlanır. Lerikin qəhrəman oğlu Vətən müharibəsində əzəli yurd yerimiz Qarabağın azadlığı uğrunda şəhidlik zirvəsinə ucalıb. Tanrı onu işıqlı dünyamıza yaşatmaq, yaratmaq üçün göndərmişdi.
Odur ki, Vətən yaşasın deyə özünü ona məqamında qurban verməyi bacardı. Və göstərdiyi hünərlə əbədi ad qoydu, elinin şərəfini ucaltdı. Təkcə Elvinin adı çəkiləndə hazırda minlərin qəlbinə Vətən sevgisindən yaranan ülviyyət odu gəlir.
Elvinin Vətənə sədaqətini dövlət də unutmadı. Şəhid miçmanın müharibədə göstərdiyi igidliyi ölümündən sonra bir çox qiymətli təltiflərə layiq gördü. Bunlar “Vətən uğrunda”, eləcə də Cəbrayılın, Füzulinin, Xocavəndin, Qubadlının adını daşıyan medallar və “Qarabağ” ordenidir. “Qarabağ” ordenini şəhid miçman Elvin Səfərovun ailəsinə Lerik Rayon İcra Hakimiyyəti başçısının səlahiyyətlərini icra edən Cəlil Baxşıyev təqdim etdi. Mərasimdə Azərbaycan Respublikası Səfərbərlik və Hərbi Xidmətə Çağırış üzrə Dövlət xidmətinin Lerik rayon şöbəsinin rəisi Arif Həsənov, hüquq-mühafizə orqanlarının rəhbərləri və şəhid ailələri iştirak edirdi.
Öncə Azərbaycanın ərazi bütövlüyü uğrunda canını qurban verən Vətən şəhidlərinin xatirəsi bir dəqiqəlik sükutla anıldı. Lerik Rayon İcra Hakimiyyəti başçısının səlahiyyətlərini icra edən C.Baxşıyev şəhidin ailə üzvlərini salamlayıb dedi: - 44 gün çəkən Vətən müharibəsində Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin rəhbərliyi altında müzəffər Azərbaycan Ordusu işğal altındakı torpaqları azad etdi. B qazanmasında çoxlu şəhid verdik. Haqq savaşımızda şəhid olmuş qəhrəman Vətən övladlarının xatirəsinin həmişə ehtiramla yad olunur. Elvində belə. Xalq onu Vətənə, torpağa sədaqət rəmzi kimi qəlbində yaşadır. Lerikin qəhrəman oğlu Elvin 2020-ci il noyabrın 1-də şəhid olmuşdur. Xalq necə, dövlət də onun hünərinə yüksək qiymət verir. Azərbaycan Respublikası Prezidentinin 2020-ci il 9 dekabr tarixli 2338 nömrəli Sərəncamı ilə “Qarabağ” ordeninə layiq görülməsi bunun gözəl nümunəsidir. Hələ başqa medallarını demirəm...
Daha sonra şəhid miçman Elvin Səfərovun təltif edildiyi “Qarabağ” ordeni onun ailəsinə təqdim olundu. Təltifi qəbul edən şəhidin ailəsi yüksək diqqət və qayğıya görə Prezident İlham Əliyevə və Birinci vitse-prezident Mehriban Əliyevaya minnətdar olduqlarini bildirdilər.
Zəfər ORUCOĞLU Azərbaycan Jurnalistlər Birliyinin üzvü
