Bakıətrafı kənd və qəsəbələrin bəzilərində hələ də yol-nəqliyyat infrastrukturu ilə əlaqədar problemlər qalmaqdadır. Bu da sakinləri ciddi narahat edir.
Sabunçu rayonunun Balaxanı qəsəbəsindəki “Fazenda” adlandırılan yaşayış məntəqəsinin sakinləri illərdir həm yol, həm də marşrut sarıdan korluq çəkdiklərini bildirirlər. “Fazenda” sakinləri marşrut problemindən dad-fəryad edirlər. Yaşayış massivinə yalnız 105 saylı marşrut işləyir ki, o da “Koroğlu” metrostansiyasına yox, 8-ci kilometr bazarına işləyir. Nəticədə şəhərə getmək üçün sakinlər bir neçə avtobus dəyişməli olurlar. Üstəlik, həmin xəttə buraxılan avtobusların sayı az olduğuna görə səhər və axşam basabas olur.
“Əlaqədar qurumlardan çox xahiş edirik ki, “Fazenda”ya da baxsınlar, marşrut, yol, məktəb problemimizi həll etsinlər”
Bütün bunları bizimlə söhbətində qəsəbə sakini Təvəkkül Məmmədov bildirib. T.Məmmədov deyir ki, illərdir marşrut sarıdan problem yaşayırlar, qış mövsümündə isə bu problem daha dəhşətli şəkil alır. “Problemimiz həm marşrut, həm yol, həm də məktəblə bağlıdır. “Fazenda”ya işləyən yeganə marşrut avtobus 105 saylı marşrutdur ki, o da hər 10 dəqiqədən bir gəlməli olduğu halda, yarım saatdan, 40 dəqiqədən bir gəlir, onda da minmək mümkün olmur. Yollarımız da çox bərbad vəziyyətdədir, marşrut avtobusun gecikməsi səbəblərindən biri də daxili yollarımızdır ki, illərdir təmir edilmir. Nə bələdiyyənin üzünü görürük, nə də icra nümayəndəliyinin ki, şikayətimizi edək. Sanki heç bələdiyyə adlı qurum yoxdur. Elə bil “Fazenda” unudulmuş bir yerdir, bizimlə maraqlanan tapılmır. “İnanın, evdən çıxanda yollarda qalırıq, avtobusa minə bilmirik, məcbur olub taksi ilə gedib-gəlirik. Taksiyə isə pul çatdırmaq çox çətindir. 105 nömrəli avtobusu gözləməkdən gözümüzün kökü saralır, əlaqədar qurumlardan bu problemə bir əncam çəkmələrini istəyirik. Marşrut gec gəlir, dolu gəlir. Əlaqədar qurumlardan çox xahiş edirik ki, “Fazenda”ya da baxsınlar, marşrut, yol, məktəb problemimizi həll etsinlər”.
T.Məmmədov qeyd etdi ki, yaxınlıqda məktəb olmadığı üçün uşaqlar məktəbə Balaxanıya gedirlər, nəqliyyatın yarıtmazlığı ucbatından isə ailələr taksi tutublar, uşağın birinə ayda 30 manat verib məktəbə göndərirlər. T.Məmmədov deyir ki, ayda hər uşaq üçün 30 manat taksi pulu vermək çox çətindir, çoxunun buna maddi imkanı yoxdur. Pandemiya ilə əlaqədar dərslər onlayn keçdiyindən, ötən tədris ilində uşaqlar məktəbə sıx-sıx getməyib, amma ənənəvi tədris bərpa olunandan sonra yenidən taksi tutmaq məcburiyyətində qalacaqlarını deyən T.Məmmədov üzünü əlaqədar qurumlara tutaraq, problemi həll etməklərini istəyir.
Məsələ ilə bağlı Balaxanı Bələdiyyəsi ilə əlaqə saxladıq. Amma bələdiyyə sədri Vüsalə Səlimova ilə danışa bilmədik. Katibəsi dedi ki, bələdiyyə sədri ərazidədir, sonra əlaqə saxlayarsınız.
Bakı Nəqliyyat Agentliyi ilə də əlaqə cəhdimiz alınmadı. Bütün hallarda, məsələni diqqətdə saxlayacağıq.
İradə SARIYEVA
