Son günlər sosial şəbəkələrdə olduqca utancverici, xoşagəlməz söz-söhbətlər dolaşır, məlumatlar yer alır. Bir sıra sosial şəbəkə istifadəçiləri yazırlar ki, bəzi reket jurnalistlər özlərinə yeni “qazanc yeri”, “gəlir mənbəyi” tapıblar, bu adamlar şəhid ailələrindən pul yığmaqla məşğuldurlar.
Hadisənin şahidi olanlar sosial şəbəkələrdə bildirirlər ki, bu “jurnalistlər” üz tutduqları hər şəhid ailəsindən ən azı 100 manat alırlar ki, şəhidlər haqqında kitab çap edirik, o kitaba övladınız barədə məlumat daxil edəcəyik. İşbazlar şəhid ailələrindən pul yığırlar, lakin ortalıqda nə kitab var, nə də jurnal. Bəzi işbazlar şəhid ailələrini aldatmaq yolunu tutublar. “Facebook”da bundan açıq şikayətlər də az deyil.
QHT-lər, vətəndaş cəmiyyəti institutu nə üçün jurnalist adından sui-istifadə edən işbazları aşkarlayıb onları ifşa etmirlər? Bütün hallarda, dövlət qurumları bu məsələni nəzarətə götürməli və geniş araşdırmalar aparmalı, bu işdə QHT-lər, jurnalist təşkilatları, dövlət qurumlarının ictimai şura üzvləri aktivlik göstərməlidirlər.
Ekspertlər deyirlər ki, şəhid ailələrinə qarşı bu cür əxlaqdankənar münasibət bəsləyənlər, birmənalı olaraq, aşkarlanıb üzə çıxarılmalıdırlar. Şəhid ailələrindən pul alıb kitab yazmaq heç bir vicdana sığmaz.
Azər Həsrət: “...mənəviyyatsızlığın, şərəfsizliyin son həddidir”
Siyasi şərhçi, tanınmış media mütəxəssisi Azər Həsrət “Bakı-Xəbər”ə bildirdi ki, bu yolu tutan şəxslər ciddi qələm adamları deyil, işbazlardır. “Bəli, mən də bu barədə eşitmişəm, daha doğrusu, oxumuşam. Bu barədə sosial mediada paylaşımlar edilib. Nə deyim? “Jurnalist” adı altında gedib şəhid ailəsindən pul qoparmaq mənəviyyatsızlığın, şərəfsizliyin son həddidir. Yəni bu insanlar ki, özlərinə “jurnalist” deyib, şəhid ailələrinin qapılarına gedirlər və onlardan pul alıb, övladları haqqında guya ki, kitab yazacaqlarını vəd edirlər, bu, ən şərəfsiz, ən alçaq hərəkətdir. Bunun adı jurnalistika deyil. Ümumiyyətlə, bu adamların bu əhvalatı jurnalistika hadisəsi deyil. Yəni mənəviyyatsızlıq hadisəsidir ki, o adamlar da bununla məşğuldurlar. Bu, məsələnin bir tərəfi”.
Məsələnin digər tərəfinə gəlincə, A.Həsrət şəhid ailələrinə çağırışlar etdi və bildirdi ki, şəhid ailələri belərinə uymamalıdırlar: “Şəhid ailələrinə çağırış edib deyirəm ki, siz o mənəvi ucalıqdan o 100 manata görə aşağı enməyin. Yəni sizə kimsə vəd edirsə ki, şəhid övladınız haqqında nə isə yazacaq və buna görə pul ödəməlisiniz, əsla siz heç kimə pul ödəməli deyilsiniz, çünki o şəhidlər öz qanları, canları bahasına ödəniləcək yüksək qiyməti çoxdan ödəyiblər. Ona görə də sizdən kimsə pul istəyirsə, o mənəviyyatsız, şərəfsiz, əxlaqsız birisidir və belələrinin sizin övladınız haqqında nə isə yazması sizə şərəf gətirməyəcək, əksinə, sizi aşağılamış olacaq. Zatən, Azərbaycan dövləti tapşırıq verib, bütün telekanallar şəhidlər haqqında süjetlər hazırlayır, verilişlər hazırlayır, bu proses davam edir, davamlı da olacaq. Eyni zamanda, bütün şəhidlərin həyat və döyüş yolu rəsmiləşdirilir, sənədləşdirilir, dövlət bu işlə məşğuldur, həmçinin, vicdanlı jurnalistlər də sizdən heç bir təmənna güdmədən bu işi görürlər. Belə olduğu şəraitdə siz niyə hansısa vicdanını, mənəviyyatını satmış birilərinə pul verirsiniz? Buna ehtiyacmı var? Təbii ki, yoxdur”.
A.Həsrət hesab edir ki, heç bir şəhid ailəsi bu mənəviyyatını satmışlara pul verməməlidir.
Qiymət Məhərrəmli: “Bu işlə dövlətin əlaqədar qurumları mütləq şəkildə məşğul olmalıdırlar”
Filologiya üzrə fəlsəfə doktoru Qiymət Məhərrəmli isə hesab edir ki, o alverçilərin, işbazların sərgilədikləri bu naqisliklərə dövlət qurumları qiymət verməlidirlər: “Bu məsələ məni də çox ciddi şəkildə narahat etdi. Şəhid ailəsindən pul almaq, şəhid haqqında məqaləni pulla yazmaq heç bir mənəvi ölçüyə sığmır. Bu haldan çox təəssüflənirəm. Sosial şəbəkələrdə bu barədə məlumatları oxuyanda çox təəssüflənirəm ki, aramızda belələri də varmış. Hesab edirəm ki, bu işlə dövlətin əlaqədar qurumları mütləq şəkildə məşğul olmalıdırlar. Şəhidlərin müqəddəs adını alver predmetinə çevirən işbazlar mütləq cəzalandırılmalıdırlar. Şəhid ailələri, analar, bacılar, atalar, qardaşlar, övladlar, sizin heç kəsə borcunuz yoxdur, siz heç kəsə pul verməli deyilsiniz. O işbazların toruna düşməyin. Onsuz da vicdanlı qələm adamları şəhidlərimiz haqqında yazırlar. QHT-lər, vətəndaş cəmiyyəti institutları da bu sahədə araşdırmalar aparmalı, faktların aşkarlanmasında dövlət qurumlarına dəstək olmalıdırlar. Kim belə faktla rastlaşarsa, mütləq ictimailəşdirməlidir” - deyə Q.Məhərrəmli qeyd etdi.
İradə SARIYEVA
