Məktəblilər üçün yeni geyim nümunələri təsdiq üçün təqdim edilib. Bu barədə Təhsil Nazirliyindən bildirilib. Rəsmi məlumata əsasən, həmin təsvirlər təsdiq edildiyi təqdirdə ictimaiyyətə bildiriləcək. Bununla belə, qeyd edilib ki, yeni geyim forması təsdiq olunduqdan bir müddət sonra da hazırda qüvvədə olan məktəbli formaları da istifadədə qalacaq.
Xatırladaq ki, pandemiyadan əvvəl 2020-2021-ci tədris ili üzrə şagirdlərin geyim formalarının təsvirlərini müəyyən edən layihəyə dair ictimai rəyin öyrənilməsinə başlanıb. Layihəyə əsasən, qızlar üçün yay geyim forması qısaqol köynək və ətəkdən, qış geyim forması isə uzunqol köynək, ətək və önü zəncirbəndlə bağlanan cibli jaketdən ibarət olacaq. Oğlanlar üçün yay fəslində tətbiq edilən geyim forması qısaqol köynək və şalvardan, qış geyim forması isə uzunqol köynək, şalvar və önü zəncirbəndlə bağlanan cibli jaketdən ibarət olacaq.
Yeni məktəbli formalarının hazırlanması artıq ictimaiyyət arasında müzakirə olunur. Maraqlıdır, məktəbli formalarının mütəmadi olaraq dəyişdirilməsinə ehtiyac varmı? Bəzi xarici ölkələrdə uzun illərdir eyni məktəbli formasından istifadə edilir.
“Azərbaycanda isə düşünürlər ki, məktəbli formasını dəyişdirməklə təhsilin keyfiyyətini artıracaqlar”
Təhsil eksperti Kamran Əsədov “Bakı-Xəbər”ə açıqlamasında qeyd etdi ki, Nazirlər Kabinetinin 2011-ci il tarixli qərarı ilə təsdiq edilən Ümumtəhsil Məktəblərinin Nümunəvi Nizamnaməsinə əsasən, orta təhsil alanların geyim forması hər məktəbin öz nizamnaməsi ilə müəyyən olunurdu. Yəni hər məktəb öz şagirdləri üçün vahid geyim forması tətbiq edə bilərdi: “Amma Prezident İlham Əliyevin imzaladığı “Ümumi təhsil haqqında” Azərbaycan Respublikasının 2019-cu il 29 mart tarixli, 1532-VQ nömrəli Qanununun tətbiqi barədə” Fərmana əsasən, dövlət ümumtəhsil müəssisəsində təhsilalanlar üçün vahid geyim formaları tətbiq edilməlidir. Belə ki, Təhsil Nazirliyi tərəfindən 4-5 vahid məktəbli geyiminin formaları təsdiqlənəcək və təhsil müəssisələri yalnız bu geyimlərdən istifadə edə biləcəklər. Təəssüflər olsun ki, indi bu məsələnin mahiyyəti itib”.
K.Əsədovun sözlərinə görə, mütəmadi olaraq məktəbli formalarının dəyişdirilməsi düzgün deyil: “Nəzərə almaq lazımdır ki, bir çox ailədə iki və ya üç uşaq təhsil alır. Formanın dəyişdirilməsi valideynləri əlavə xərcə salır. Bir çox halda böyük uşaqdan sonra həmin məktəbli forması digər ailə üzvlərinə istifadə üçün verilir. Həmin geyimin dəyişdirilməsi isə valideynləri əlavə xərcə salır.
Məlumat üçün bildirim ki, Azərbaycanda 1,6 milyon şagird var. 74 min ailədə 2 və ya daha artıq şəxs məktəbdə təhsil alır. Formanın dəyişdirilməsi nə qədər ailəni əlavə xərcə salacaq. Onsuz da biz təhsil olaraq uşaqlara lazım olan biliyi verə bilmirik”.
Həmsöhbətimiz onu da əlavə etdi ki, məktəbli forması zəruridir: “Məlumat üçün bildirim ki, Sovet dönəmində Azərbaycan məktəblisi 1936-cı ildən 1991-ci ilə qədər eyni məktəbli formasını istifadə etdi. Fransada isə 1804-cu ildən bu günə qədər eyni məktəbli formasından istifadə olunur. Azərbaycanda isə düşünürlər ki, məktəbli formasını dəyişdirməklə təhsilin keyfiyyətini artıracaqlar… Nəzərə almaq lazımdır ki, toplananların yerini dəyişəndə cəm dəyişmir. Təhsilin keyfiyyətinin dəyişdirilməsi istiqamətində addımlar atılmalıdır”.
K.Əsədov son olaraq onu da qeyd etdi ki, yeni məktəbli forması dizayn baxımından o qədər də göz oxşyan deyil. Rənglər təhsil üçün uğurlu deyil. Tövsiyə olunan rənglər tünd qara, göy və ağın çalarlarından ibarət olmalıdır.
Günel CƏLİLOVA
