İran hökuməti ölkədə koronavirusun “Delta” ştammının yayılması ilə əlaqədar bir sıra məhdudlaşdırıcı tədbirləri yeniləmək qərarına gəlib.
Azərbaycan mətbuatı “Associated Press” agentliyinə istinadən xəbər verir ki, hökumət əsas olaraq koronavirusun əhəmiyyətli dərəcədə çox yayıldığı və COVID-19 risqi yüksək olan ərazilərdə birinci dərəcəli vacib olmayan ticarət müəssisələrinin bağlanması barədə qərar qəbul edib.
Tehran da daxil olmaqla, 275 şəhərdə bütün ictimai parklar, restoranlar, qənnadı məmulatları satılan dükanlar, gözəllik salonları, ticarət mərkəzləri, kitab mağazaları bağlıdır. Həmçinin, koronavirusa yüksək yoluxma səviyyəsi qeydə alınan şəhərlər arasında gediş-gəlişə də qadağa qoyulub.
Bu yaxınlarda İranın keçmiş prezidenti Həsən Ruhani “Delta” ştammının qəfil yayılması səbəbindən ölkəsinin koronavirusun beşinci dalğası ilə üzləşəcəyi ilə bağlı narahatlığını ifadə etmişdi.
Qeyd edək ki, İranda iyun ayının ortalarından iyul ayının əvvəlinə qədər koronavirusa yoluxma statistikasında artım müşahidə edilir.
Azərbaycanın qonşusu olan İranda belə bir qərar verilibsə və digər qonşuları Türkiyə, Rusiya, Gürcüstanda “Delta” ştammının qeydə alındığı rəsmən təsdiqlənibsə, Azərbaycanın özündə də qeyri-rəsmi olaraq mütəxəssislər səviyyəsində bu ştammın olduğu iddia edilirsə, Azərbaycan hansı addımları atmalıdır?
“Sərtləşdirmə situasiyanın gedişindən asılıdır, amma qaçılmazdır”
Azərbaycan mütəxəssisləri də hesab edirlər ki, “Delta”ya qarşı bütün tədbirlər indidən görülməlidir.
Professor Ədalət Rüstəm “Bakı-Xəbər”ə açıqlamasında bildirdi ki, bu virusa qalib gəlmək üçün ölkəmizdə kütləvi immunitet formalaşdırılmalıdır. “Delta” ştammına qarşı ən mühüm mübarizə üsulunun vaksinləşmə olduğunu deyən professor hesab edir ki, bu virusa qarşı tədbirli olmalıyıq. Mütəxəssisin sözlərinə görə, ölkə əhalisinin 60 faizdən çoxu vaksinasiya olunmalı, kütləvi immunitet yaranmalıdır. Karantin rejiminin sərtləşdirilməsinə gəlincə, ekspert “sərtləşdirmə situasiyanın gedişindən asılıdır, amma qaçılmazdır. Azərbaycanda karantin rejimi avqustun birinə qədər mövcuddur, hələ ləğv olunmayıb. Yoluxma halları artarsa, yenidən sərtləşmələr ola bilər” - deyə bildirdi.
Ə.Rüstəmin sözlərinə görə, qonşu ölkələrin hamısında “Delta”var, ona görə təhlükə bizim üçün də var: “Hesab edirəm ki, Azərbaycan da “Delta”, “Delta+” ilə əlaqədar təxirə salınmadan qabaqlayıcı tədbirlər görməlidir. Mənə belə gəlir ki, ilkin mərhələdə, ən azından, sərhədlər bağlanmalıdır. Çünki dörd bir tərəfimizdə, qonşu ölkələrdə “Delta” var, bizim ölkədə bu ştammın olduğu şübhəsizdir. Sərhədlər bağlanmalı, giriş-çıxışa qadağa qoyulmalı və “Delta”və “Delta +”u aşkarlamaq üçün lazım olan diaqnostik avadanlıqlar Azərbaycana gətirilməlidir. Bütün bunlar təxirə salınmadan edilməlidir”.
Ə.Rüstəm qeyd etdi ki, qərarlar real rəqəmlər əsasında verilir, indidən vəziyyət nəzarətə götürülməli və bütün tədbirlər görülməli, tədbirlər sərhəddən başlanmalıdır. “İndidən tədbir görülməsə, “Delta”nın yayılması qaçılmaz olacaq” - deyə Ə.Rüstəm qeyd etdi.
İradə SARIYEVA
