Abşeronda üç avtomobil toqquşub, 2 nəfər xəsarət alıb. Hadisə Masazırdakı duz gölünün yaxınlığında baş verib.
Belə ki, 90-HN-009 dövlət nömrə nişanlı “Mercedes” markalı avtomobili idarə edən Hüseynova Gülnar Əsəd qızı sükana nəzarəti itirib. Avtomobil “Nissan”a, daha sonra “Mercedes” və “VAZ 2106” markalı nəqliyyat vasitələrinə çırpılıb. Qəza zamanı üç nəfər xəsarət alıb.
Qeyd edək ki, “Mercedes Galandewagen”nin sürücüsü Gülnar Hüseynova “Qurtuluş 93” MTK-nın rəhbəri Məhərrəm Novruzovun həyat yoldaşıdır.
Xatırladaq ki, iyun ayında Novxanı qəsəbəsində dörd nəfərin ölümünə səbəb olan qəza baş vermişdi. Hacı Məhərrəm Novruzovun kürəkəni Elşad Kəlbəliyevin idarə etdiyi "Range Rover" (dövlət nömrəsi 10 CO 002) yüksək sürətlə "Daewoo Damas"a çırpılmışdı. Avtomobildə olan Murad Ziyadov, Kamran Əhmədov, Elman Şıxəliyev və Yunis Mürsəlov yerindəcə ölmüşdü. Daxili İşlər Nazirliyindən Elşad Kəlbəliyevin sərxoş vəziyyətdə olduğu bildirilmişdi.
Göründüyü kimi, bir ayın içərisində tanınmış iş adamının ailə üzvlərinin iştirakçısı və təqsirkarı olduğu ikinci ağır yol hadisəsi baş verir. Yenə eyni mənzərə - tikinti maqnatının ailə üzvlərinə məxsus bahalı avtomobil və zərərçəkən kasıb-kusublar… Cəmiyyətdə baş verən analoji hallara hansı qiyməti vermək olar?
Azərbaycan Kommunist Partiyasının sədri Rauf Qurbanov “Bakı-Xəbər”ə açıqlamasında dedi ki, baş verən belə xoşagəlməz hallar, insan ölümü ilə nəticələnən yol-nəqliyyat hadisələri cəmiyyətdə gərginlik yaradır və bu da ictimaiyyət tərəfindən birmənalı qarşılanmır: “Hadisəni törətmiş insanın məmur övladı və ya imkanlı ailədən olması isə insanları xüsusilə qıcıqlandırır. Cəmiyyət buna oxşar hadisələrin baş verməsini harınlıqdan irəli gələn, qanunların icra olunmasında tərəfkeşliyin və boşluğun olması kimi xarakterizə edir. Ölkə başçısı dəfələrlə məmurlara və imkanlı insanlara bu çür neqativ hallara yol verilməməsi ilə əlaqədar xəbərdarlıqlar edib. Lakin baş vermiş son hadisədən o qənaətə gəlmək olar ki, hələ də bəzi insanlar Prezidentin xəbərdarlığından lazımı nəticə çıxarmayıb. Azərbaycanda yaxşı bir atalar sözü var: ağac bar gətirəndə, başını aşağı əyər. Görünür, bu atalar məsəli müasir dövrümüzdə tərsinə işləyir.
Bütün bunlarla yanaşı qeyd etmək istəyirəm ki, nəticəsindən asılı olmayaraq, hər hansı bir yol-nəqliyyat hadisəsi əvvəlcədən düşünülmüş və ya məqsədli şəkildə baş vermir. Lakin bir partiya sədri, ixtisasca hüquqşünas olaraq onu da deməyi vacib hesab edirəm ki, bu cür neqativ halların cəmiyyətdə mütəmadi olaraq baş verməsi qanunların icra edilməsində olan boşluqlardan irəli gəlir. Bununla yanaşı, imkanlı adamlar bir qədər də sosial məsuliyyət hiss etməlidirlər. İnsanın malik olduğu sərvətin çoxluğu ona yolda maşın sürəndə imtiyaz qazandırmır. Onlar nəzərə almalıdırlar ki, bu cür davranışları ilə həm başqalarının, həm də öz şəxsi həyatlarını risqə atırlar. Bu ailə ilə bağlı baş verən qəza hadisələrində bahalı maşın sahiblərinin sağ qalması möcüzə nəticəsində olub”.
Məhəmmədəli QƏRİBLİ
