Ölkədə, demək olar ki, bir çox taksi şirkəti tərəfindən müştərilərə göstərilən xidmətin keyfiyyəti günü-gündən aşağı düşür. Belə ki, müştəri ilə kobud rəftar, çağırış yerinə gec gəlmək və pik saatlar olmasa belə, özlərindən qiymət artımı kimi hallara yol verildiyi üçün bir çox taksi şirkətindən şikayətlərin sayı durmadan artır.
Şikayət sayı artan taksi şirkətlərindən biri də “Bolt”dur. Belə ki, adıçəkilən taksi şirkəti müştərilərdən ödənişi yalnız nağd şəkildə tələb edir.
Bu günlərdə jurnalist Semra Əliəkbərli özünün “Facebook” hesabında qeyd edib ki, “Bolt” taksi sürücüsü ondan ödənişin kart vasitəsilə deyil, nağd şəkildə verilməsini istəyib: “Bolt”, bu sürücüləri xüsusi seçirsiz, siz Allah?! Kartla ödənişə ağız əymək nədir? Bəyənmirsiniz, gəlməyin də. Elə bil, başına silah dayayıb gətiririk, ya da gedib pulunu vermirik...”.
Qeyd edək ki, son zamanlar “Bolt” taksi şirkəti ilə bağlı bu mövzuda edilən şikayətlərin sayı artıb.
Onu da bildirək ki, ölkədə nağdsız əməliyyatların keçirilməsinə üstünlük verildiyi halda, taksi şirkətlərinin belə bir hərəkət etməsi düzgün deyil.
“Taksi xidməti qanunla tənzimlənmədiyi və taksi sürücülərinin də bir çoxunun bu işi...”
Sosial sahə üzrə ekspert Mayis Əliyev qeyd etdi ki, taksi xidməti qanunla tənzimlənmədiyi və taksi sürücülərinin də bir çoxunun bu işi ikinci iş olduğu üçün bu sahədə xidmət aşağıdır: “Ümumiyyətlə, taksi fəaliyyəti ilə bağlı xaotik vəziyyət yaranıb. Səbəb bəzi insanların daha çox qazanc əldə etmək məqsədilə ikinci iş kimi taksi fəaliyyəti göstərməsidir. Bu, həssas sahədir, müəyyən qayda-qanun yaratmaq lazımdır. Bəzən olur ki, sürücü çağırış yerinə gedərkən yolüstü tamah məqsədilə başqa bir müştəri götürür və sifariş verən müştərini gözlədir. Bunlar taksi xidməti ilə bağlı neqativ hallardır”.
Həmsöhbətimiz onu da əlavə etdi ki, əksər taksi şirkəti sərnişinə tam qiymət demir: “Həmişə qalığı olur. İstifadəçilər, bir qayda olaraq, tam məbləğdə ödəniş edirlər və “təsadüfən” sürücünün qalığı qaytarmaq üçün qəpiyi çatmır. Yəni sürücülər qəpiyi də güzəştə getmirlər. Beləliklə, sonunda xeyli “qabağa düşürlər”. Kartla ödənişdə isə belə imkan yoxdur. Buna görə də taksi sürücüləri nağd ödənişə üstünlük verirlər”.
Günel CƏLİLOVA
