Bildiyimiz kimi, iqtisadiyyat naziri Mikayıl Cabbarov şəhid ailələrinin və qazilərin işlə təminatı ilə bağlı sahibkarlara çağırış edib.
Nazir bu barədə öz twitter hesabında etdiyi paylaşımda bildirib: “Dövlət başçısı, Müzəffər Ali Baş Komandan İlham Əliyevin qətiyyəti, rəşadətli ordumuzun əsgər və zabitlərinin qəhrəmanlığı nəticəsində Azərbaycan böyük zəfər qazandı. Hazırda Vətən müharibəsi şəhidlərinin ailə üzvlərinin və qazilərimizin işlə təminatına dəstək məqsədilə Məşğulluq Marafonu keçirilir. Sahibkarları, biznes ictimaiyyətini və işəgötürənləri bu humanist təşəbbüsdə fəal iştiraka çağırıram”.
Ümumiyyətlə, dövlət özəl şirkətlərə, sahibkarlara, işəgötürənlərə hərtərəfli dəstək göstərir, yardımlar edir, şirkətlərin yanında olduğunu əməldə göstərir.
Ekspertlər deyirlər ki, dövlət hər zaman sahibkarlara dəstək olur, sahibkarlar da özlərində məsuliyyət hiss edib, şəhid ailələrini, qazilərimizi işlə təmin etməli, dövlətin çağırışlarına öz addımları ilə cavab verməlidirlər.
Akif Nəsirli: “Şəhid ailələrini və qaziləri işlə təmin etmək sahibkarların mənəvi borcudur”
İqtisadçı-ekspert Akif Nəsirli “Bakı-Xəbər”ə bildirdi ki, heç bir sahibkar çağırış gözləmədən, könüllü şəkildə bu istiqamətdə addımlar atmalıdır. A.Nəsirli, həmçinin, qeyd etdi ki, sahibkarlar bu kimi marafonlarda aktiv iştirak etməli və öz mənəvi borclarını yerinə yetirməlidirlər.
“Ümumiyyətlə, şəhid ailələrini və qaziləri işlə təmin etmək sahibkarların mənəvi borcudur. Bu, hər şeydən əvvəl mənəvi məsələdir. Təkcə sahibkarlar deyil, hər bir Azərbaycan vətəndaşı şəhid ailələrinə, qazilərə, müharibə iştirakçılarına mənən borcludur. Hər kəs özü o mənəvi borcu başa düşdüyü formada icra etməyə çalışır. Amma öz mənəvi borcunu dərk etməyənlər də var, onlar isə bu istiqamətdə hər hansı bir addım atmırlar”.
A.Nəsirli hesab edir ki, hökumətin çağırışından asılı olmayaraq, sahibkarlar bu istiqamətdə qazilərimizə, şəhid ailələrinə dəstək olmalıdırlar. Sahibkarlara bu cür çağırışları daha çox vətəndaş cəmiyyəti təmsilçiləri, QHT-lər, partiya sədrləri, media işçiləri, ziyalılar etməlidirlər.
A.Nəsirlinin sözlərinə görə, müharibədə 100 min əsgər iştirak edib. “Bunun da böyük əksəriyyəti hazırda müddətdən artıq xidmət edən qismində, zabit, gizir kimi hərbidə xidmət edirlər və onların işi var, maaş alırlar. Geridə işlə təmin ediləcək 15-20 min nəfər qazi qalır. Bu 15-20 min qazinin işlə təmin edilməsi isə çətin deyil. Hesab edirəm ki, qısa müddətdə dövlət öz strukturlarında onları işlə təmin edə, qazilər üçün ayrıca iş yerləri yarada bilər. Amma, bütün hallarda, qazilərimizin və şəhid ailələrimizin işlə təmin olunmasında həm dövlət, həm də özəl sektor aktiv iştirak etməlidir. Onların işlə təmin olunması aidiyyəti dövlət qurumlarının birbaşa, özəl sektorun, sahibkarların isə mənəvi borcudur” - deyə A.Nəsirli qeyd etdi.
Fatimə Hacıbəyli: “...özləri təşəbbüs irəli sürməli idilər”
“Vəfa” Sosial-İctimai Birliyinin sədri Fatimə Hacıbəylinin fikrincə, sahibkarlar nazirin, hökumət təmsilçisinin çağırışından əvvəl bu işləri görməli idilər: “Sahibkarlar, biznes strukturları öz mənəvi, vətəndaşlıq borclarını dərk etməli, onlar bu addımı atmaq üçün dövlət məmurlarından, nazirlərdən çağırış gözləməməlidirlər. Nazir çağırış edir və hər kəsi həmrəyliyə dəvət edir, bütün sahibkarlara səslənir ki, şəhid ailələrini, qazilərimizi işə götürün. Əslində, heç sahibkarlar bu çağırışı gözləməməli idilər, bu çağırışsız belə özləri təşəbbüs irəli sürməli idilər. Amma hesab edirəm ki, bu çağırış bəzi sahibkarların mürgüdə olan vicdanını oyatdı. Düzdür, sahibkarlar arasında da kifayət qədər humanist, vətənsevər insanlar var, amma öz biznesini genişləndirmək üçün düşünənlər də yox deyil. Odur ki, bu marafona bütün sahibkarlar qoşulmalı və bu istiqamətdə gerçək addımlar atmalıdırlar” - deyə F.Hacıbəyli vurğuladı.
İradə SARIYEVA
