Qonşu Rusiyada, Gürcüstanda, qardaş Türkiyədə, eləcə də dünyanın bir sıra ölkələrində qeydə alınan koronavirusun Hindistan ştammının Azərbaycanda da olması barədə hələ heç bir rəsmi məlumat yoxdur.
Rəsmən ölkəmizdə Hindistan ştammının olmadığı bildirilir.
“Virus gözəgörünməzdir, onun gömrükdən keçmək kimi xüsusiyyətləri...”
Bu barədə rəsmi məlumat olmadığı halda, tibb elmləri doktoru, professor, tanınmış tibb mütəxəssisi Ədalət Rüstəm “Delta” adı verilən Hindistan ştammının Azərbaycanda da olduğunu açıqlayıb. “Azərbaycanda Hindistan ştammı var” - deyə mətbuata bildirən Ə.Rüstəm bu fikri söyləməklə nələrə əsaslanır, əlində yoluxma ilə bağlı hər hansı bir fakt varmı, COVID-19-un bu növü Azərbaycana necə keçə bilər?
Ə.Rüstəm “Bakı-Xəbər”ə bildirdi ki, Hindistan ştammı daha təhlükəlidir, yoluxuculuq qabiliyyəti ən azı 2 dəfə yüksəkdir. O vurğuladı ki, koronavirusun bu növü qonşu ölkələrə yayılıbsa, bizdə də var. “Qonşu ölkələrdə varsa, deməli, bizdə də var. Amma bu barədə rəsmi məlumat yoxdur, onun varlığı, yaxud yoxluğu təsdiq olunmayıb. Amma ehtimalıma görə, Azərbaycanda Hindistan ştammı var. Virus gözəgörünməzdir, onun gömrükdən keçmək kimi xüsusiyyətləri var. Hindistan ştammının gömrükdən keçməsi ehtimalı böyükdür”.
Ə.Rüstəmin sözlərinə görə, Bakıda futbol üzrə Avropa çempionatı ilə əlaqədar olaraq paytaxtımıza çoxlu sayda xarici ölkə vətəndaşı gəldi, ehtimal ki, onlar da özləri ilə “Delta” gətirə bilərlər. Mütəxəssisin bildirdiyinə görə, bu gün Rusiyada, Gürcüstanda, Türkiyədə və başqa ölkələrdə Hindistan ştammı var, bu halda, virusun bu növünün Azərbaycanda olması da qaçılmazdır. “Futbol üzrə Avropa çempionatı ilə əlaqədar olaraq Azərbaycana Avropa ölkələrindən, başqa dövlətlərdən kifayət qədər tamaşaçı gəlmişdi. Qonşu Rusiyada, Türkiyədə, Gürcüstanda və başqa ölkələrdə bunun təsdiq olunması əsas verir ki, böyük ehtimalla, Hindistan ştammı bizdə də var. Sadəcə olaraq, müvafiq laborator avadanlıqları, yəni “Delta” ştammının müəyyən edilməsinə uyğun reaktivlər olmadığına, yaxud bu, nizamlanmadığına görə hələlik müəyyən olunmayıb. Yəni diaqnostika yoxdur. Diaqnostika olmadığı üçün də bu ştammın olması barədə rəsmi məlumat yoxdur” - deyə Ə.Rüstəm vurğuladı.
İradə SARIYEVA
