Son günlər sosial şəbəkələrdə Oğuz rayonu Xal-xal kəndi ərazisindəki istirahət mərkəzində baş verən özbaşınalığa dair kadrlar geniş yayılıb. Həmin kadrlardan məlum olur ki, Xal-xal meşəsinin şəlalə olan hissəsinə girişdə həmin ərazidə restoranı olan şəxs əməlli-başlı “post” quraşdırıb.
Kadrlardan da göründüyü kimi, xüsusi turniket qoyularaq, əraziyə daxil olanlardan pul yığılır – meşəyə giriş 5 manat, maşın saxlamq və şəlaləyə baxmaq isə ayrı-ayrılıqda 1 manatdır. Restorandakı qiymətlər də ki, od tutub yanır. Bu cür haqq yığılmasının nə dərəcədə qanuni olduğunu bir tərəfə qoyaq – bunun adını “qoçuluq”, “yolkəsənlik” və s. qoya bilərsiniz. Söhbət həm də müvafiq dövlət orqanlarının bu biabırçılığa nəyinsə qarşılığında göz yummasından gedir. Belə bir mənzərənin fonunda hansı daxili turizmdən və onun inkişafından söhbət gedə bilər?
Yaranmış vəziyyəti “Bakı-Xəbər”ə şərh edən ekspert İlqar Hüseynlinin sözlərinə görə, Azərbaycanın müxtəlif yerlərində bu tipli özbaşına hallar baş verir: “Təəssüflər olsun ki, bu cür hallar məmurların, rayon icra hakimiyyətlərinin gözü qarşısında baş verir. Onların tapşırığı əsasında həmin ərazilər zəbt edilir. Bununla həmin restoranlara külli miqdarda pul qazandırırlar. Mərhum Prezident Heydər Əliyev tərəfindən imzalanmış müvafiq fərmanla dəniz və meşələrdən təqribən 300 metr məsafədə ictimai və iaşə müəssisələrinin tikintisinə qadağa qoyulmuşdu. İndiki vəziyyətə baxın. Nəinki dənizim kənarında, hətta içində belə adalar yaradıb özlərinə villalar tikiblər. Bu nümunə tədricən meşələrə, dağlara və göllərə də sirayət etməyə başladı. Tam qanunsuz haldır. Təbiət baxımından yanaşsaq da bu doğru deyil. Çünki hazır meşədən kimsə pulu qazanıb qoyur cibinə. Bələdiyyə belə bir yer təşkil etsəydi, kiçik ianələr toplamaqla öz inkişafına xərcləyə bilərdi. Ancaq biz görürük ki, indiki halda yolkəsənliklə qazanılan pul şəxsi ciblərə gedir. Bütün bu hallarla bağlı əlaqədar qurumlar ciddi tədbir görməlidir. Xüsusilə də Ekologiya və Təbii Sərvətlər Nazirliyi bu qanunsuzluğun qarşısını almalıdır. Tanrının Azərbaycana bəxş etdiyi sərvətlərdən xalq istədiyi qaydada istifadə etməlidir. Həmin restoranın sahibi meşədən niyə pul qazanıb cibinə qoymalıdır?”
Məhəmmədəli QƏRİBLİ
