Türk Təbibləri Birliyinin yaydığı məlumata görə, Çin peyvəndi olunanlara təcili başqa peyvənd vurulmalıdır. Qurum peyvəndlənmənin başladığı ilk aylarda vaksin vurulan 65 və yuxarı yaş qrupu insanlar, eləcə də tibb işçilərinə “Delta” variantına qarşı təsiri sübut olunmuş effektiv digər peyvəndlərdən bir doza vurulması tələbini irəli sürüb.
“Medicina.az” xəbər verir ki, hazırda dünyada aktivləşən “Delta” və “Delta plyus” variantına qarşı “Sinovac” peyvəndi effektiv olmadığına görə ilk başda bu peyvənd olunanlar “Delta” qarşısında müdafiəsiz qala bilərlər.
Türk həkimləri bildirirlər ki, “Sinovac” peyvəndi etdirənlərin antitelləri 3 ay sonra kəskin azalaraq itməyə başlayıb.
Araşdırma rəyində bildirilir ki, 1053 nəfər tibb işçisi üzərində aparılan müşahidə göstərib ki, onların 95%-də “Sinovac” peyvəndinin ikinci dozası olunduqdan 3 ay sonra antitellər düşüb və faktiki olaraq, bu insanlar “Delta” qarşısında antitelsizdirlər.
Ona görə də daha uzunmüddətli təsirli və “Delta”ya qarşı da effektiv başqa ad peyvəndin bir dozası yenidən bu şəxslərə vurulmalıdır. Proses payıza kimi başlamalıdır.
Göründüyü kimi, türk həkimləri iddia edirlər ki, “Sinovac” peyvəndi “Delta”ya qarşı davamsızdır, ona görə də bu peyvəndi vurduranlar növbəti dəfə peyvəndlənməyə cəlb edilməlidirlər.
Bu iddianın nə kimi əsası ola bilər, yoxsa bu bir təxribatdır? Əhaliyə tətbiq edilən peyvənd necə gücsüz və davamsız ola bilər ki, onun rolu virusa qarşı antitelləri formalaşdırmaqdır. İnsanlar belə məlumatları oxuyub narahat olurlar ki, dövlət xərc çəkib “Sinovac” peyvəndi alıb və əhalinin də xeyli hissəsinə, o cümlədən də səhiyyə işçilərinə bu peyvənd tətbiq edilib, indi isə bu cür iddialar ortaya çıxıb.
“Sübut olunub ki, Çin peyvəndinin qoruyuculuğu digər peyvəndlərə nisbətən...”
“Sağlamlığa Xidmət” İctimai Birliyinin icraçı direktoru Pərvanə Vəliyeva bizimlə söhbətində bildirdi ki, başqa peyvəndlərlə müqayisədə Çin peyvəndinin gücü aşağıdır: “Sübut olunub ki, Çin peyvəndinin qoruyuculuğu digər peyvəndlərə nisbətən daha aşağıdır. Bu artıq sübut olunub. Məsələn, Braziliyada onun 50 faiz, Azərbaycanda və Türkiyədə isə 85 faiz effektivliyi görünüb. Çin peyvəndi vurulan şəxslərə Avropa Birliyi ölkələrinə və digər ölkələrə, Qərb dövlətlərinə giriş etməsi ilə bağlı üstünlüklər verilmədi. Daha çox “Pfayzer”ə və başqalarına üstünlük verilir. Bu şayiələrin, eyni zamanda, daha çox vaksin monopoliyası ilə bağlı olması da istisna edilmir. Bu mənada ki, şayiələr bazarda “Pfayzer”in daha çox alınması və Çin peyvəndinin sıxışdırılması məsələsinə də xidmət edə bilər. Çünki bilirsiniz ki, “Pfayzer” və digər vaksinlər Çin vaksinindən qiymət cəhətdən daha bahadır. Ölkələri bahalı vaksinləri satın almağa sövq etmək üçün də belə şayiələr yayıla bilər. Ancaq Türk Təbiblər Birliyinin fikirləri də razı olmaya bilmərəm. Çünki Türkiyə mütəxəssislərinin tibb sahəsində fəaliyyətləri dünyaya səs salıb, onların bilik səviyyəsinə şübhə edə bilmərəm”.
P.Vəliyevanın sözlərinə görə, Türkiyədə bir çox həkim, professorlar mediada çıxış edərək açıq şəkildə deyiblər ki, Çin peyvəndinin qoruyuculuğu digər peyvəndlərlə müqayisədə azdır. “Amma Çin peyvəndinin “Delta”dan qoruyub-qorumadığını sizə dəqiq deyə bilməyəcəyəm. Ancaq tədqiqat nəticəsi məlum olan, təsdiqlənmiş düzgün məlumata görə, düşünürəm ki, həm üstünlük vermədiyi, həm də qoruyuculuğu az olduğu üçün digər peyvəndlər vurula bilər” - deyə mütəxəssis bildirdi.
İradə SARIYEVA
