Bakı Baş Səhiyyə İdarəsinin bazasında İlkin Səhiyyə Xidməti Tibb Mərkəzi yaradılır. Bunu Kliniki Tibbi Mərkəzin direktoru Könül Ələkbərov deyib. Onun sözlərinə görə, proses yaxın zamanda yekunlaşacaq: “İlkin səhiyyə xidmətinə aid olan bütün strukturlar həmin tibb mərkəzində birləşəcəklər. O cümlədən, 5 saylı Doğum evinin qadın məsləhətxanası da İlkin Səhiyyə Xidməti Tibb Mərkəzinin tərkibinə keçəcək. Nəticə etibarilə də ilkin səhiyyə xidməti tibbi xidmətdən ayrılacaq”.
İndiyə qədər səhiyyə sahəsində baş verən problemlərin əsas mənbəyi Bakı Səhiyyə İdarəsi idi? Qurumun ləğv edilməsi və yeni bir tibbi xidmət mərkəzinin formalaşdırılması səhiyyə sahəsində xidmətin keyfiyyətinin artmasına müsbət təsir göstərəcəkmi? Xəstəxanaların, poliklinikaların fəaliyyətində də dəyişikliklər olacaq, bu nə dərəcədə effekt verə bilər?
“...idarəetmədə qarşılıqlı inamsızlıq və müəyyən maraqların meydana çıxması Səhiyyə İdarəsinin ləğvinə imkan yaratdı”
Tanınmış tibb eksperti Rafis Bağırov “Bakı-Xəbər”ə şərhində bildirdi ki, səhiyyədə mövcud olan problemlərin kökünün Bakı Baş Səhiyyə İdarəsində axtarılması düzgün deyil. R.Bağırov hesab edir ki, uzun illər Səhiyyə Nazirliyi ilə Bakı Baş Səhiyyə İdarəsi arasında intriqalar mövcud olub və qurumun da ləğv edilməsi bu intriqaların nəticəsidir: “Bilirsiniz, bu, səhiyyənin idarəetmə sistemi ilə bağlı bir məsələdir. Bu proseslər səhiyyənin idarəetmə sisteminə daxil olduğuna görə əvvəlki dövrlərdə ölkə üzrə bütün səhiyyə sisteminə Səhiyyə Nazirliyi nəzarət edirdi. Hər bir bölgəni də müəyyən ərazi vahidlərinə, inzibati vahidlərə bölmüşdülər. Proses o cür gedirdi, nazirlik də prosesə nəzarət edirdi. Hər bölgənin özünün səhiyyə idarəsi vardı və onlara da Səhiyyə Nazirliyi nəzarət edirdi. Bakıda da Bakı Baş Səhiyyə İdarəsi yaradılmışdı. Bakı Baş Səhiyyə İdarəsi ilə Səhiyyə Nazirliyi arasında həmişə müəyyən konfliktlər meydana çıxırdı. Yəni səhiyyənin idarə edilməsi sahəsində Səhiyyə Nazirliyinin və Bakı Baş Səhiyyə İdarəsinin ayrı-ayrılıqda öz maraqları vardı. Bu sahədə maraqların toqquşması nəticəsində də konfliktlər meydana çıxırdı. Bəzən bu konfliktlər o qədər böyük olurdu ki, onun daha yuxarı instansiyalarda həll edilməsinə ehtiyac yaranırdı. Bəlkə də elə həmin konfliktlərin nəticəsidir ki, Bakı Baş Səhiyyə İdarəsini ləğv edib, ona aid olan bütün strukturları başqa qurumun nəzdinə verirlər”.
Bu strukturların başqa qurumların nəzdində, başqa adlarla fəaliyyət göstərəcəyini deyən R.Bağırovun sözlərinə görə, idarəetmə məsələsində bu kimi hallar baş verir. Yeni nazir, yaxud da yeni rəhbər təyinatından sonra idarəetmədə bu kimi halların baş verdiyini deyən R.Bağırov qeyd edir ki, Bakı Baş Səhiyyə İdarəsinin ləğv edilməsinin nə kimi nəticələrə səbəb olacağını gələcək göstərəcək: “Bunların tətbiq etdiyi idarəetmə formalarının nəticələrini gələcəkdə görəcəyik. Həmişə Bakı Baş Səhiyyə İdarəsi ilə Səhiyyə Nazirliyi arasında konfliktlər olub. Amma Səhiyyə İdarəsinə rəhbər təyin edilən insanın gücündən asılı olaraq, hər zaman bu idarənin gücü səhiyyə sistemində görsənirdi. Amma bu idarənin rəisi, rəhbəri geniş əlaqəyə malik deyildisə, bir qədər zəif idisə, Səhiyyə Nazirliyi həmişə Bakı Baş Səhiyyə İdarəsini kənarda qoyurdu, Bakı üzrə nəzarəti öz üzərinə alırdı. Son dövrlərdə Bakı Baş Səhiyyə İdarəsinin rolu ona görə görsənmir ki, onu tamamilə prosesdən kənarda qoyublar, buna görə də heç bir fəaliyyəti yoxdur. Əlbəttə, səhiyyədəki problemlərin mənbəyi Bakı Baş Səhiyyə İdarəsi olmasa da, idarəetmədə qarşılıqlı inamsızlıq və müəyyən maraqların meydana çıxması Səhiyyə İdarəsinin ləğvinə imkan yaratdı” - deyə R.Bağırov qeyd etdi.
İradə SARIYEVA
