Tarif Şurası qazın qiymətilə bağlı yeni qərarlar qəbul edib. Şuranın izahatından belə nəticə çıxır ki, 30 iyunda qəbul edilən təbii qaz üzrə tarif tənzimlənməsi qərarının əsas hədəfi sadə əhali deyil.
Bildirilir ki, bunun daha çox böyük evlərin və ya villaların sahiblərinə təsiri olacaq. Nümunə olaraq göstərilir ki, əhalinin aztəminatlı təbəqəsinin orta sərfiyyat göstəricilərinə uyğun olaraq, təbii qazın illik istehlak həcminin 1200 m3-dək (1200 m3 daxil) olan hissəsi üçün tarif dəyişdirilməyib və hazırkı 1 kubmetr üçün 10 qəpik səviyyəsində saxlanılıb. İllik istehlak həcminin 1200 - 2500 m3 (2500 m3 daxil) olan hissəsi üçün 20 qəpik, 2500 m3-dən çox olan hissəsi üçün isə 25 qəpik müəyyənləşdirilib. Qeyd olunur ki, tarif tənzimlənməsinin ölkədə qiymət artımına yol açmaması üçün də məqamlar nəzərə alınıb:
Sənaye və kənd təsərrüfatı sahələrinə verilən təbii qazın tarifi dəyişdirilməyib və hazırkı 20 qəpik səviyyəsində saxlanılıb;
Elektrik enerjisi üzrə artıma yol verməmək üçün elektrik stansiyalarına verilən təbii qazın tarifi cəmi 1 qəpik artırılıb və 12 qəpikdən 13 qəpiyə dəyişdirilib;
“Azəristiliktəchizat” ASC və yaşayış binalarının məhəllə qazanxanaları üzrə təbii qaz tarifi 20 qəpikdən 13 qəpiyə endirilib;
Digər sahələr üzrə tarif 20 qəpikdən 25 qəpiyə dəyişdirilib;
Ekoloji təmiz yanacaq növlərinə keçidi stimullaşdırmaq məqsədilə sıxılmış təbii qazın (CNG) satışını həyata keçirən qazdoldurma məntəqələrinə verilən təbii qazın tarifi 20 qəpikdən 13 qəpiyə endirilib.
Bu rəqəmlərdən belə nəticəyə gəlinir ki, məsələ heç də mövzu ilə bağlı ajiotaj yaradanların ifadə etdiyi kimi deyil. Çünki təbii qazın qiymətinin endirildiyi sahələr də kifayət qədərdi. Nədənsə, bu məsələyə də radikal dairələr bir prizmadan yanaşır. Yalnız qiymətin qalxdığı sahəyə fikirləri və təbliğatı fokuslayırlar. Düzdür, təbii qazın istehlak qiyməti artıb, ancaq bu qərar qazdan il ərzində 1200 kubmetrədək istifadə edən əhaliyə aid deyil. Tarif Şurasına görə, bu, abunəçilərin 51 faizini təşkil edir. İllik qaz istehlakı 1200 kubmetrdən (m3) çox olan əhali 1 kubmetr üçün 20 qəpik, 2500 kubmetrdən çox olanlar isə 25 qəpik ödəyəcək. “Azəriqaz”ın əsaslandırmasına görə, indiyədək əhali abonentlərinə hər kubmetri 10 qəpikdən hesablanan 2200 kubmetr limit verilib.
Digər tərəfdən, sənaye və kənd təsərrüfatı sahələrinə verilən təbii qazın tarifi bu mərhələdə dəyişdirilməyərək mövcud 20 qəpik səviyyəsində saxlanılıb. Bilirik ki, istilik elektrik stansiyalarında elektrik enerjisinin alınması zamanı daha çox təbii qazdan istifadə edilir. Stansiyalara verilən qazın qiyməti cəmi bir qəpik - 12 qəpikdən 13 qəpiyə qaldırıb. Çox qalxsaydı, növbəti ay elektik qiymətlərinin müzakirəsi və qaldırılması qaçılmaz olacaqdı. “Azəristiliktəchizat” ASC və yaşayış binalarının məhəllə qazanxanaları üzrə təbii qaz tarifi isə 20 qəpikdən 13 qəpiyə endirilib. Əslində nəzərə alsaq ki, hazırda mövsüm geridə qalıb, onsuz da qaz istifadəsi yox dərəcəsindədir, bu, elə də təsir etməyəcək. Növbəti ilin yanvarında qiymət dəyişməzsə, bunu müsbət qiymətləndirmək olar.
Yalnız ticarət, xidmət və digər sahələrdə tariflər 5 qəpik artırılıb ki, burada da qaz istifadəsi çox deyil.
Məhəmmədəli QƏRİBLİ
