Əhalinin təbii qaza olan tələbatının təmin edilməsi istiqamətində müxtəlif addımlar atılır. Heç şübhəsiz ki, müəyyən hallarda əhaliyə və qeyri-əhali kontingentinə satılan təbii qazın tariflərində də cüzi dəyişikliklər baş verir.
Bildiyimiz kimi, iyunun 30-da Tarif Şurasının keçirilən növbəti iclasında təbii qazın qiymətlərinə dəyişiklik edilib.
Heç şübhəsiz ki, təbii qazın qiymətlərinə dəyişiklik edilməsi Azərbaycan və digər ölkələrdə təbii qazın tarifləri arasında müqayisələr aparmaq marağı yaradır. Təbii qazın Azərbaycanda və bəzi ölkələrdəki müqayisəli qiymətlərini təhlil edərkən görürsən ki, 1 kubmetr təbii qazın tarifi əhali üzrə Azərbaycanda yuxarı hədd 20 qəpikdir. Gürcüstanda 29,5, Belarusda 34,2, Rusiyada isə 16,5 qəpikdir.
1 kubmetr təbii qazın tarifi qeyri-əhali abonenti üzrə Azərbaycanda yuxarı hədd 20 qəpik təşkil edir, Türkiyədə 49, Ukraynada 26, Belarusda 78,2, Rusiyada 18,2 qəpikdir.
Bəzi paytaxt şəhərlərlə müqayisə etdikdə, 2020-ci ildə 1 kubmetr təbii qazın tarifi əhali abonenti üzrə
Türkiyənin paytaxtı Ankarada 32, Ukraynanın paytaxtı Kiyevdə 32,6 təşkil edib.
2021-ci ildə 1 kubmetr təbii qazın tarifi əhali abonenti üzrə Ankarada 32,9-41,6 qəpik, Kiyevdə 54,8 qəpik olub.
İqtisadçıların sözlərinə görə, başqa ölkələrin paytaxt şəhərləri ilə müqayisədə Azərbaycanda abonentlər daha ucuz qiymətə təbii qaz alırlar, başqa ölkələrdə isə qiymətlər az qala yarıbayarı çoxdur.
Ekspertlər qeyd edirlər ki, dövlət tərəfindən atılan bütün addımlar Azərbaycan vətəndaşlarının rifahı naminədir.
“Qeyri-əhali seqmentində tariflərin artırılmaması...”
Tanınmış iqtisadçı Elşad Ömərov “Bakı-Xəbər”ə şərhində qeyd etdi ki, Azərbaycanda təbii qazın tarifləri başqa ölkələrlə müqayisədə yuxarı deyil: “Bir sıra digər dövlətlər və onların paytaxtları ilə müqayisədə, hətta artan tariflərdən sonra Azərbaycanda təbii qaz tariflərinin aşağı olması bir reallıqdır. Eyni zamanda, sözsüz ki, ölkəmizdə reallaşdırılan sosial paketlərin verilməsi prosesi davam etdiriləcək. Bu sosial ödənişlərin, sosial dəstəyin artımı qaz tariflərinin artımının mənfi tərəflərini xeyli dərəcədə yumşaltmış olacaq. Bununla yanaşı, qeyri-əhali seqmentində tariflərin artırılmaması istehlak bazarında digər xidmət və məhsullarda qiymətlərin artmamasını şərtləndirməlidir. Ona görə də istehlak bazarına nəzarət gücləndirilməlidir ki, ticarət şəbəkələrində süni şəkildə qiymətlər artmasın”. E.Ömərov hesab edir ki, Azərbaycanda əhalinin sosial rifah halının yaxşılaşdırılması üçün çoxsaylı dövlət proqramı, sosial dəstək paketləri həyata keçirilib, başqa ölkələrdə isə bu cür vətəndaşyönümlü məsələlər həyata keçirilmir. Onun fikrincə, həyata keçirilən və keçiriləcək sosial tədbirlərə görə təbii qazın tariflərində baş verən dəyişikliklərdən əhaliyə neqativliklər düşməyəcək.
İradə SARIYEVA
