Dünya ictimaiyyətini narahat edən problemlər içərisində ən mürəkkəbi, sözsüz ki, narkomaniya və narkotik ticarətidir. Narkomaniya və narkotik ticarəti təkcə insanların sağlamlığına deyil, həmçinin, bir sıra ümummilli problemlərə gətirib çıxarır. Bu, dünyada münaqişə və müharibə ocaqlarının yaranmasına, ölkələr arasında siyasi münasibətlərin kəskinləşməsinə, regional səviyyədə silahlı qarşıdurmalara və s. gətirib çıxara bilir.
Ölkəmizdə narkotik vasitələrin istifadəçilərinin sayı durmadan artmaqdadır. Bu prosesə təsir göstərən müxtəlif faktorlar var. Həmin faktorlardan biri yeniyetmələrin seçmək istədiyi həyat tərzi ilə bağlıdır. Yeniyetmələr daha çox rahat həyat tərzinə üstünlük verirlər. Həyatdan maksimum ləzzət almaq istəyir, el dilində desək, həyatın dadını çıxarmağa çalışırlar. Buna görə də onlar yanlış olaraq bu istiqamətə köklənirlər. İlkin mərhələdə narkotik vasitələrdən istifadə epizodik xarakter daşıyır. Sonradan isə yeniyetmələrdə bu, asılılıq halına keçir. Açıqlanan statistik rəqəmlərə əsasən, ölkədə qadın narkotik istifadəçilərinin sayı artır. Xüsusən də 18-25 yaşlı qadınlar arasında narkotik istifadəçilərinin sayı artır.
“Qadınların narkotikdən istifadəsində psixoloji məqamlar böyük rol oynayır”
Psixoloq Könül İsmayılova bildirdi ki, gənclərimizi bu bəladan qorumaq üçün hələ orta məktəb dövründən maarifləndirmə tədbirləri həyata keçirilməlidir. Bununla bağlı kütləvi informasiya vasitələrində doğru istiqamətdə maarifləndirmə aparılmalıdır. Bu, həssas bir məsələdir: “Bəzən yanlış olaraq maarifləndirmə adı ilə narkotik vasitələri təbliğ də edə bilərik. Bu tədbirlər elə bir formada aparılmalıdır ki, biz yeniyetmələri bu yoldan çəkindirək. Nəzərə alınmalıdır ki, narkotikdən müalicə alanların əksəriyyəti dövlət qeydiyyatında yoxdur. Yəni onlar fərdi şəkildə müalicə almağı üstün tuturlar. Lakin xəstələr dövlət qeydiyyatında olduqda dəqiq statistika aparmaq mümkün olar. Bu zaman dövlət əlavə tədbirlər görər”.
Həmsöhbətimiz onu da əlavə etdi ki, qadınların narkotikə qurşanmasında bir neçə faktor rol oynayır. Bunlardan biri partnyoru narkoman olan qadınlarla bağlıdır: “Belə ki, narkoman kişi bir çox halda sevgilisini, həyat yoldaşını da narkotikə cəlb edir ki, sonuncu bu məsələdə onu narkotikdən çəkindirməyə çalışmasın. Bəziləri isə sevgilisini və ya bərabər yaşadığı qadını cəlb edir. Məqsəd də o olur ki, qadın müştəriyə çıxsın və pul qazansın. Uğursuz ailələrdə də qadınların narkotikə qurşanması mümkündür”.
K.İsmayılovanın sözlərinə görə, qadınların narkotikdən istifadəsində psixoloji məqamlar böyük rol oynayır. Hansısa məşğulluq, iş, çevrə buna təsir göstərir. İnsan hansısa çevrənin təsiri altına düşür. Bu halda, həm satışı təmin etmək, həm də ətrafını buna cəlb etmək missiyasını üzərinə götürür: “Ailədaxili zorakılıqdan qaçmaq istəyən qadınların da sığınacağı narkotik vasitələr olur. Həmçinin, həyatında hər şey qaydasında olan, problemi olmayan insanlar da bu yola baş vururlar. Daha çox zövq almaq və özünü unutmaq üçün”.
Günel CƏLİLOVA
