Bu gün bütün dünya koronavirusdan və onun yeni ştammlarından xilas yolunu kütləvi peyvəndlənmədə gördüyü, insanların könüllü şəkildə peyvəndlənməyə maraq göstərdiyi bir vaxtda bəzi Çin alimləri iddia edirlər ki, peyvəndlər işə yaramır, mutasiyalara təsir etmir. Çinli alimlər hesab edirlər ki, vaksindən sonra yaranan istər az, istərsə də çox miqdar anticism yeni mutasiyalarla mübarizədə rol oynamır və demək olar, işə yaramır. Bir sözlə, çinli mütəxəssislər vaksinlərin koronavirus ştammlarına qarşı təsirini şübhə altına alırlar.
Hazırda Hindistan ştammı dünyanın 92 ölkəsi, o cümlədən, Çində yayılır.
Uşaq həkimi Çen İnn bildirib ki, əsas problem Deltada yox, vaksinlərin ona qarşı təsirsizliyindədir: “DNK viruslar çox çətinliklə mutasiya olur və insan immuniteti tərəfindən asanlıqla yadda saxlanır.
Təkrar yoluxmada immunitet dərhal işə düşür. Amma korona RNK virusudur, asanlıqla mutasiya olur, mutant virus isə insan immunitetindən asanlıqla yayınır, sürüşkəndir. Bu zaman öncəki mutasiya zamanı yaranan vaksin antitelləri, sadəcə, işə düşmür, insan asanlıqla yoluxur və xəstələnir.
Yaxın 5 ildə insanlar qrip kimi hər il korona peyvəndi olunmalıdırlar. Yeni mutasiyalara qarşı yeni vaksinlər olmalıdır. Epidemiya davam edəcək, çünki mutasiya istehsalı dayanmır”.
Çinlilər indiki mutant pandemiyasında səbəbkarın Hindistan olduğunu bildirərək, artıq Çini günahlandırmamağa çağırıblar: “İndi müharibənin səbəbkarı Hindistandır. Bu ölkə dünyaya yeni güclü mutant verdi. Hər şey başlı-başına buraxılıb. Hindistan vəziyyəti Çin kimi ələ ala bilmədi.
Çıxış yolu bu ölkəni bir müddət tam qapadıb, dünyadan təcrid etməkdir. Yoxsa, vaksinləşmənin faydası olmayacaq. Bu şərtlərlə normal yaşamaq və işləmək mümkün olmayacaq”.
Azərbaycan mütəxəssisləri qeyd edirlər ki, bir qrup Çin aliminin açıqlamaları təxribat xarakterlidir. Onlar hesab edirlər ki, bu gün koronavirus pandemiyasının ümumbəşəri bəlaya çevrilməsinin günahkarı olaraq Çini görür və həqiqətdə də bu virusun “vətəni” Çindir.
Ekspertlər deyirlər ki, bu gün istifadə edilən vaksin növlərinin, demək olar, böyük əksəriyyəti göstərir ki, Çin alimlərinin iddiaları əsassızdır, çünki vaksinlər anticismlər yaradır və bu da yoluxmanı daha rahat adlatmağa şərait yaradır. Vaksinləşmənin virusa qarşı yeganə mübarizə üsulu olduğunu xatırladan mütəxəssislər hesab edirlər ki, Çin alimləri məsələni siyasiləşdirməyə doğru gedir, bu isə pandemiya ilə ümumdünya mübarizəsinə qarşı bir təxribatdır. Mütəxəssislər deyirlər ki, hələ yeni növ COVID-19 yayılarkən ÜST başda olmaqla, bütün aidiyyəti beynəlxalq təşkilatlar çıxış yolunun kütləvi vaksinləşmə olduğunu bildirdilər, bəzi çinli mütəxəssislər isə bu cür təxribatla məşğul olurlar.
“Çox təəssüflər olsun ki, dünyada bu cür siyasi oyunlar da gedir və bəzi mütəxəssislər bu oyunların aparıcı qüvvəsinə çevrilirlər”
Professor Nəsib Quliyev “Bakı-Xəbər”ə şərhində bildirdi ki, bu açıqlama təxribatdır, virusdan xilas yolu vaksinləşmədən keçir. Bu iddiada olan çinli mütəxəssislərin fikirlərinin qətiyyən həqiqəti əks etdirmədiyini deyən N.Quliyev hesab edir ki, çinli alimlər özləri özlərini təkzib edirlər: “Belə bir əsassız iddia ortaya qoyurlarsa, onda necə olur ki, Çin özü də peyvənd istehsal edib dünyada satır, eyni zamanda, Çində vaksinasiya olunanların sayı 900 milyonu keçib, 1 milyarda yaxınlaşır. Vaksinlər təsirsizdirsə, bəs onda çinlilər özləri niyə vaksinasiya olunurlar? Bilirsiniz, peyvənd işi 7-ci əsrdən yaranıb, 1400 ildir ki, peyvənd dünyada mövcuddur. Amma bu 1400 il ərzində hələ peyvəndə alternativ olan ikinci bir üsul ortaya çıxmayıb, elə bir metod mövcud deyil. Yəni peyvənd dünyada alternativsizdir. Tarix boyu peyvəndə qarşı çıxanlar olub, ona əks fikirlər söyləyənlər həmişə tapılır. Amma onların heç biri həyatda öz təsdiqini tapmır. Təsəvvür edin ki, indiki halda belə, bir əsassız iddia səsləndirmək təxribatdır, diversiyadır. Çin başda olmaqla, bütün Yer kürəsinin peyvəndi tətbiq etdiyi bir zamanda, vaksinasiya davam etdirildiyi bir vaxtda belə bir fikir söyləmək təxribat xarakteri daşıyır. Ola bilsin ki, burada başqa məsələlər var. Yadınızdadırsa, bir dəfə yazmışdılar ki, peyvənddən sonra uşaqlarda autizm əmələ gəlir. Amma ÜST məsələni araşdırdı və məlum oldu ki, bir ingilis alimi bir dərman şirkəti ilə danışıb, öz aralarında separat bir müqavilə bağlayıblar. İngilis alimi deyib ki, mən bu peyvənd edən şirkətləri məhv edəcəyəm, sonra peyvəndi biz özümüz buraxarıq. Bu məqsədlə onlar başladılar ki, filan peyvəndlər autizm törədir və sair. Araşdırdılar gördülər ki, bu da insanların qeyri-adekvat, qeyri-normal, qeyri-ədalətsiz mövqeyidir”.
N.Quliyev hesab edir ki, bu əsassız iddianı ortaya atan bəzi çinli mütəxəssislər məsələni siyasiləşdirməyə çalışırlar. Son yayılan yeni ştammların dünyaya yayılmasında çinli alimlərin Hindistanı ittiham etməsinin də yersiz olduğunu deyən professor Quliyevin sözlərinə görə, onlar bununla Çinə qarşı səsləndirilən fikirlərin qarşısını almaq niyyəti güdürlər: “Bu gün Hindistan da, digər dünya ölkələri də bu hadisənin qurbanına çevriliblər. Onların nə günahları var ki? Mən yolla gedirəm, vəhşi heyvanlar mənə hücum edir, burada mənim günahım var? Yəni dünya öz yolunu getdiyi zaman pandemiya ilə üzləşdi. Görürsünüz, dünyada müxtəlif fikirlər səsləndirilir. ABŞ sərt şəkildə tələb edir ki, koronavirusun haradan çıxdığı araşdırılıb üzə çıxarılsın. Onlar da göstərirlər ki, bu virusu Çində laboratoriyada istehsal ediblər. Virus təbii yolla yaranmadığına görə isə qarşısını kəsə bilmirlər. Bu, sintetik yaranma bir şeydir, özləri də onun qurbanına çevriliblər. Bir həftə əvvəl Uahandakı instituta böyük mükafat verdilər. Bu halda bu mükafatı verənlərdən soruşmaq lazımdır ki, siz bu mükafatı bu laboratoriyaya nəyə görə verdiniz? Orada göstərirlər ki, peyvənd istehsalında qabaqcıl olduğuna görə verilib. Amma əsl həqiqət bir az başqadır, gizlətmək şərtilə onların virusu sintez etdiklərinə görə o mükafatı alıblar. Çox təəssüflər olsun ki, dünyada bu cür siyasi oyunlar da gedir və bəzi mütəxəssislər bu oyunların aparıcı qüvvəsinə çevrilirlər. Hesab edirəm ki, ədalət zəfər çalacaq” - deyə N.Quliyev qeyd etdi.
İradə SARIYEVA
