Masallı elinin qəlbi sevdalı, yurd məhəbbətli oğlu Ramazan Vəliyevin bu işıqlı dünyaya gəlib getməsi cəmi 25 il çəkdi. Vətəni üçün yaşadığına görə ömür yolu olduqca ləyaqətli, şərəfli oldu. İkinci Qarabağ müharibəsində cavan canını fəda etdi ki, müqəddəs Vətən yaşasın. Sağlığında Ramazanı təkcə ailəsi, ətrafı tanıyıb sevirdi. Torpaq naminə şəhidlik zirvəsinə qalxandan sonra böyük bir xalqın qəlbində yaşamaqla, indi parlaq günəş kimi görünür. Doğma Şərəfə kəndində böyük də, kiçik də Ramazanın adını qürurla çəkir, onu özünə iftixar yeri bilirlər.
Orta məktəbi bitirib qəlbinə hakim kəsilən xalqına fayda vermək, insanlara gərək olmaq amalı Ramazanı 2013-cü ildə Bakı Dənizçilik Kollecinə aparır. Burada yaxşı oxuyur, ağlı, saf əxlaqı, mənəvi zənginliyi onun tələbə adına yalnız hörmət gətirir. Təhsilini başa vurub birbaşa ordu sıralarına yola düşür. Cəbhə bölgəsində canından artıq sevdiyi Vətəng ləyaqətlə xidmət edir. Cənnətməkan Qarabağı işğal altında saxlayan düşməni hər an əzməyə meydan istəyir. Ramazanın doğma Azərbaycana bağlılığı, düşmənə nifrəti əsgər yoldaşlarını da vəcdə gətirir.
Ramazan əsgərlik həyatını nümunəvi qaydada başa vursa da, Vətənin əmrinə hazır durur. Az müddət keçəndən sonra, yəni 2019-cu ildə Qarabağ torpaqlarını azad görmək eşqi ilə özünü hərbiyə bağlayır. Daxili İşlər Nazirliyinin Daxili Qoşunlarında işə düzəlir. İlk gündən böyük inamla haqq savaşımızın zəfər gününə hazırlaşır. Və yağı düşmənlə son nəfəsə qədər döyüşüb işğal edilmiş hər qarış Vətən torpağının qisasını alacağına and içir.
Ötən il sentyabrın 27-də başlanan İkinci Qarabağ müharibəsində Ramazan Vəliyev düşmənə qan qusduran igidlərin birincisi olur. Vətən, torpaq sevgisi onu ən ağır döyüşlərin qalibi edir. Torpaq naminə silaha sarılan Vətənin igid oğlu döyüşdən-döyüşə çoxlu faşist əsgərinin, tanklarının axırına çıxır. Qanlı müharibə meydanlardan keçə-keçə Şuşaya yan alır. Mərdliklə döyüşür, torpağın hər qarışı uğrunda can qoyur. Şəhidlik zirvəsinə ucalanda artıq ürəyindəki arzusuna çatmışdı. 30 il əsarətdə olan Qarabağ torpaqları Ramazan kimi Vətən sevdalıların qanı bahasına azad idi.
Ramazan Vəliyev öz ömrünü Vətənə verib getdi. Odur ki, Azərbaycan var olduqca, o da sevilən ömür kimi hər an ehtiramla xatırlanar. Tarix yazmaqla millətin qəlbinə köçən igid əsgər dövlət tərəfindən isə “Vətən uğrunda” medalına layiq görüldü.
Zəfər ORUCOĞLU Azərbaycan Jurnalistlər Birliyinin üzvü
