Son günlər tez-tez biçilməmiş taxıl sahələrinin yanması halları müşahidə olunur. Əkinlə məşğul olan hər bir fermer öz sahəsini göz bəbəyi kimi qorumağa çalışmalıdır. O sahədən gəlir əldə edəcəyi halda, fermer niyə onu qorumur?
İddia olunur ki, bəzi hallarda fermer həmin sahədən istədiyi məhsuldarlığı əldə edə bilməyəcəyini düşündüyü üçün, özü bilərəkdən həmin sahəni yandırır. Təəssüflər olsun ki, həmin sahədə məhsuldarlıq çox aşağı olduğu üçün sahibkara biçini həyata keçirmək, məhsulun daşınması, kombayn üçün əlavə pul xərcləmək sərf etmir.
Maraqlıdır, biçilməmiş əkin sahələri niyə yanır? Fermerlər təhlükəsizlik qaydalarına riayət etmir və ya özləri bilərəkdən sahəni yandırırlar?
“Taxıl sahələrinin yandırılması nəzarətdən çıxdığı təqdirdə çox böyük problemlər yarana bilər”
Kənd təsərrüfatı mütəxəssisi, fəlsəfə elmləri doktoru Qadir Bayramlı “Bakı-Xəbər”ə açıqlamasında qeyd etdi ki, Azərbaycanda fermerlər biçindən sonra əkin yerlərini yandırırlar. Bu, geniş yayılmış praktikadır: “Ancaq bu yanlış metoddur. Fermerlər elə hesab edirlər ki, yerdə qalan saman, küləş yandırılanda orada olan zərərli mikroorqanizmlər məhv edilir. Halbuki, yanğın zamanı zərərli mikroorqanizmlərlə bərabər, faydalı olanlar da yanırlar. Onların isə torpaqların məhsuldarlığının müəyyən səviyyədə saxlanması istiqamətində böyük funksiyası var. Həmçinin, taxıl sahələrinin yandırılması növbəti illərdə torpağın məhsuldarlığına mənfi təsir edir”.
Həmsöhbətimiz onu da əlavə etdi ki, taxıl sahələrinin yandırılması nəzarətdən çıxdığı təqdirdə çox böyük problemlər yarana bilər. Yanğın digər sahələrə də sıçrayır, belə olan halda, başqa fermerlərə də zərər vurur.
Ekspert hesab edir ki, taxılın əkilib-biçilməsi ilə bağlı fermerlərin maarifləndirilməsinə ehtiyac var. Bir çox fermer ənənəvi üsullardan istifadə edir. Bu da əksər halda məhsuldarlığın zəif olmasına səbəb olur: “Önəmli bir məsələ isə aqrar sahə ilə bağlı xüsusi televiziya kanalının yaradılmasıdır. Bir çox ölkədə belə bir kanal var. Həmin kanal ölkəmizdə də yaradılarsa, aqrotexniki məsələlərlə bağlı məsləhətlər verilər. Bu həm də fermerlərin xeyrinə olar”.
Günel CƏLİLOVA
