Bakıdan Lerikə getmək bir dərd, Lerikdən Lerikə getmək ayrı dərd...

img

Uzun illərdir Lerikdə rayon mərkəzindən kənlərə ictimai nəqliyyat işləmir. Halbuki, Bakının Xəzər rayonunun Binə, Mərdəkan və Buzovna qəsəbələrindən dağlar diyarının bir çox yaşayış məntəqəsinə gündə 50-yə yaxın kiçik tutumlu, əsasən səkkiz yerlik avtobuslar çıxır. Amma burada da yol haqqını fantastik adlandırmaq olar.

Bəli, indi Lerikdə sadə camaat üçün insan kimi həyat sürmək qeyri-mümkündür. Məhz buna görə də bir balaca ayağı yer tutan buradan getmək məcburiyyətində qalır. Son illər rayon əhalisinin 40 faizi təkcə Bakının Xəzər  rayonuna köçüb. Ayrı-ayrı adamlara məxsus marşrutların məmləkətə təşkili də bu səbəbdədir.

Bəri başdan deyim ki, marşrutlara dövlət tərəfindən heç bir nəzarət olunmur. Özbaşına yola çıxan sürücülər qiyməti də özləri bildirir. Bir il bundan əvvəl hər sərnişindən gəlib-getmək üçün  20 manat alardılar. Qiymət çox sürücülərə sərf edirdi. Son günlər isə bu rəqəmi 40 manata qaldırıblar. Sürücülər nəzarətsiz olduqları üçün  istədiyini edə bilir. Məqsəd necə olursa-olsun, daha çox pul qazanmaqdır.

Onlar verilən məsləhətə də qulaq asmırlar. İrad tutulanda isə cavab qaytarırlar ki, maşın mənimdir, belə istəyirəm. Yola çıxan məcburiyyət qarşısında qalıb 5 günə qazandığını ona verməli olur. Maşın şəxsi olsa da, başa düşmürlər ki, hərəkət etdikləri yolları  dövlət öz vətəndaşların rahatlığı üçün çəkib.

Dəfələrlə deyilməsinə baxmayaraq, sürücülər özbaşına təyin etdikləri qiymətdən düşmürlər. Rəqəm yola görə çox yüksəkdir. Dövlət tərəfindən qayda-qanun çərçivəsində bir nəzarət olmazsa, vəziyyət çətin düzəlsin. Haramın qudurtduğu adam insaf bilmir. Ölkədə hərc-mərcliyi  də onlar yaradır.

Zəfər ORUCOĞLU
Azərbaycan Jurnalistlər Birliyinin üzvü

Son xəbərlər