Bakı şəhəri, Nizami rayonu, Tofiq Abbasov küçəsi, bina (ev) 16-nın sakinləri “Orbita” tikinti şirkətinin qanunsuz əməlləri ilə bağlı Prezident İlham Əliyevə müraciət ediblər və həmin müraciətin bir surətini də redaksiyamıza göndəriblər.
Torpaqlarımızı işğaldan azad etdiyinə, ərazilərimizi yad əllərdə qoymadığına görə ölkə başçısına təşəkkür edən Tofiq Abbasov 16 ünvanının sakinləri müraciətlərində yaşadıqları ərazidə bu tikinti şirkətinin qanunsuz əməllərindən bəhs edirlər. “…Əfsüslar olsun ki, bəzi “vətəndaşlar” və onların arxası ilə gedən tikinti şirkətinin hədəfi sivil insanlardır. Onları incitmək, baş qatıb evdən zorla çıxarıb yerində çoxmərtəbəli bina tikməkdir. Ölkəmiz ağır müharibədən çıxıb, karantin iqtisadiyyatımızı zəiflədib, xalqımız həm müharibədə şəhid verib, həm korona xəstəliyinə görə yaxınlarını, doğmalarını itirib, Qarabağımız böyük vəsait və bərpa gözlədiyi bir zamanda nə qədər düzgündür, tikinti şirkəti tərəfindən qapı-qapı düşüb, salamat, Avropa təmirli daş binaları uçurmaq niyyətində olmaları?!
Elə bina tikmək həvəsinə düşüblərsə, getsinlər vəsaitlərini Qarabağın bərpasına xərcləsinlər.
Nə mənası var Bakıda möhkəm və yararlı binaları söküb əhalini karantin və xəstəlik baş alıb gedən vaxtda kirayələrə göndərməyin? Bir binanı tikib başa çatdırmamış, nəfslərini ətrafda yerləşən binalara salırlar”.
Sakinlər yazırlar ki, ərazidə bina tikmək istəyən, sakinləri zorla daş binalardan çıxarmaq, onların evlərini söküb yerində çoxmərtəbəli binalar tikmək istəyən tikinti şirkəti fevralın 5-i gecəsi sakinlərin icazəsi olmadan gətirib məhəlləyə gizlin vaqon qoyub. “Yəni bu hərəkətlə bizə bildirmək istəyirlər ki, binanız söküləcək”.
“Cənab Prezident!
Sizdən artıq dərəcədə xahiş edirik ki, təcili əmr verib millətimizə qarşı bu özbaşnalığı durdurasınız”.
Məktub müəllifləri qeyd edirlər ki, pandemiya dövründə insanları öz evindən didərgin salıb kirayələrə göndərməyə kimsənin haqqı yoxdur. “…44 günlük müharibənin tam qaynar zamanı hamımızın başı müharibəyə qarışarkən həmin şirkətin iki nümayəndəsi qapı-qapı düşüb milləti narahat edirdilər ki, binanızı tərk edin, yerində çoxmərtəbəli bina tikəcəyik”.
Sakinlər yazırlar ki, bir neçə il əvvəl aprel döyüşləri zamanı da anoloji hal baş vermişdi, “Vesta” tikinti şirkətinin əməkdaşları sakinləri hədələyib narahat edirmiş, lakin sakinlər birləşib şirkəti məhkəməyə verib, prosesi udduqdan sonra həmin şirkət ərazini tərk edib. “Hazırda isə başqa bir şirkət tərəfindən (Orbita) hadisə təkrar olunur. Sakinlərin əlində məhkəmənin qərarı varkən, əhali yenidən tikinti şirkətinin hədəfinə çevrilib. Məhəllədə hər gün sakinlər və şirkət arasında dava gedir”.
Sakinlər Prezidentdən xahiş edirlər ki, qanunsuz işlərlə məşğul olan tikinti şirkətlərinin fəaliyyətini nəzarətə götürsün. Onlar qeyd edirlər ki, hazırda tikinti şirkətlərinin məqsədi yararlı binaları dağıtmaq yox, Qarabağda dağılmış binaları yenidən bərpa etmək olmalıdır.
Baki-xeber.com
