Tərtər rayonunda qeydiyyatda olan və hazırda Xırdalan şəhərində yaşayan Quliyeva Vüsalə Şakir qızı redaksiyamıza müraciət edib.
V.Quliyeva bildirir ki, anası Hüseynova Sona İsa qızı həkim səhlənkarlığı nəticəsində dünyasını dəyişib. Anasının bir neçə ildir leykoz və şəkər xəstəliyindən əziyyət çəkdiyini qeyd edən V.Quliyevanın bildirdiyinə görə, anası mərhum S.Hüseynova Tərtər rayonu, Mehdi Hüseynzadə küçəsi, ev 81 ünvanında yaşayıb. “Anam 2011-ci ildən şəkər xəstəliyinə tutulmuşdu. Anamın müalicəsi ilə Tərtər rayonu üzrə endekrinoloq Fəxriyyə Allahverdiyeva məşğul olurdu, şəkər həkimi o idi. Ümumiyyətlə, Tərtərdə yeganə şəkər həkimi Fəxriyyə həkimdir. Bu ilin iyun ayının 10-da anamın şəkəri 550-yə qalxıb. Şəkəri aşağı salmaq mümkün olmayıb, vurulan iynələr, insulinlər anamın şəkərini salmayıb. Qardaşım Fəxriyyə həkimə zəng vurub ki, gəlim sizi gətirim, evdə anamı müayinə edin, müalicə yazın, şəkəri tənzimlənsin, mən onu Bakıya aparım, leykozunu müalicə etdirim. Anam həm də leykoz xəstəliyindən əziyyət çəkirdi. Anamı Bakıda professor İsgəndər Bağırov müalicə edirdi, çox gözəl bir həkimdir, çox yaxşı müalicə edirdi. Son 3 il ərzində anamın Bakıda etdirdiyi müayinələrin hamısının cavabı durur, bizim o həkimdən heç bir narazılığımız yoxdur. Narazılığımız Fəxriyyə həkimdəndir. Professor İsgəndər Bağırov Fəxriyyə həkimə dedi ki, Sona xanımın şəkərini aşağı salın, şəkəri tənzimlənsin, o, Bakıya gəlsin, mən leykozu müalicə edim. Amma Fəxriyyə həkim anama baxmağa gəlməkdən imtina etdi, iyunun 10-da gəlmədi. İyunun 11-də mən özüm buradan ona zəng vurub dedim ki, ya qardaşım gəlib sizi aparsın, gedib anamı müayinə edəsiniz, getmirsinizsə, Səhiyyə Nazirliyinə zəng vurub deyim ki, sizin Tərtər rayonuna təyin etdiyiniz həkim ölüm ayağında olan xəstəyə baxmaqdan imtina edir. Mənim zəngimdən sonra gəlib anama baxıb, evdə olan qardaş və bacıma deyib ki, insulinin dozasını artırın, başqa heç bir şey etməyib. Anam vəfat edəndən sonra o həkimdən soruşdum ki, nə üçün xəstə çağırışına vaxtında gəlməmisiniz, niyə anamı zamanında müayinə etməmisiniz? Dedi ki, insulinin vaxtı ötmüşdü, ona görə də dedim ki, onun dozasını artırın, onsuz da bunun keyfiyyəti ölüb. Keyfiyyəti ölən insulini xəstəyə niyə vurdurdunuz? Yanına gedirik, bizi borclu çıxarır. Ona görə də bu məsələni ictimailəşdirmək qərarına gəldik. Bilirsiniz, biz anam ağır vəziyyətdə olanda Bərdədən terapevt çağırdıq, başqa həkimlər də gəlib baxdılar, hamısı soruşurdu ki, şəkər həkiminin təyinatı hanı? Sadəcə, Fəxriyyə həkim qardaş və bacıma deyib ki, insulinin dozasını artırın. 550 faizə qalxan şəkəri vaxtı keçmiş insulinin dozasını çoxaltmaqla salmaq olarmı?”.
V.Quliyeva qeyd edir ki, anası S.Hüseynovanı yerindən tərpətmək mümkün olmadığı üçün həkimi evə çağırıblar, dediyinə görə, həkim də zamanında gəlməyib. “Həkim deyir ki, Tərtərdə 3 mindən çox şəkər xəstəsi var, mən onların hər birinə bir-bir baş çəkmək, evlərinə getmək məcburiyyətində deyiləm. Mən də dedim ki, demirəm həmişə evə gəlib baxın, bu xəstə koma vəziyyətində idi. Komada olan xəstəni həkimin yanına necə apara bilərdik? Həkim səhvini boynuna almaq əvəzinə, mənə hədə-qorxu gəlir” - deyə şikayətçi bildirdi.
Fəxriyyə Allahverdiyeva: “Onun iddiasının heç bir əsası yoxdur”
Şikayətçinin ittiham etdiyi Tərtər Rayon Mərkəzi Xəstəxanasının endekrinoloqu Fəxriyyə Allahverdiyeva ilə əlaqə saxladıq. F.Allahverdiyeva “Bakı-Xəbər”ə bildirdi ki, şikayətçinin iddiaları və ittihamları əsassızdır: “Onun anası leykoz xəstəsi idi. Onu leykozdan müalicə edən həkimlə danışmışdıq. Leykoz ciddi bir onkoloji xəstəlikdir.
Mənim iş saatım saat 4-ə qədərdir, hamı da bunu bilir. 4-dən sonra mənim xəstə üstünə getməyə ixtiyarım yoxdur. İkinci tərəfdən, koronadır. Mən təcili yardım həkimi deyiləm ki, çağırışa getmədiyim üçün ittihamlara məruz qalım. Mənə qədər onlar bir neçə həkim çağırıblar, hətta bizim xəstəxanadan da həkim aparıblar. Mən həmin gün olmasa da, səhərisi gün xəstəyə baxmağa getmişəm, baxmışam da, sübutlarım da var. Məndən əvvəl də onu həkimə aparmışdılar, o həkim də kifayət qədər dərman yazmışdı. Bu qız əvvəlcə həmin həkimin üstünə düşdü ki, sən dərman yazdın, anam öldü. Gah da mənim üstümə düşür. Deyir ki, siz gəldiniz, onun şəkəri yüksək idi. Venadan yoxlananda cavab düzgün olur, günortadan sonra şəkər yoxlanılmır, yoxlananda artıq göstərir, 400-də, 500-də göstərə bilir. O axşam üstü saat 4-də, 5-də yoxlanan şəkərin 500-dən artıq olduğunu deyir. Amma biz onun şəkərini yoxlayanda şəkəri 380 idi. İkinci də biz xəstəyə lazımi yardımı etdik. Bir də ki, biz onlara dedik ki, soyuducuda saxlanan insulin tapın vurun, hava çox istidir, 50 dərəcə istidə insulin
çöldə saxlana bilməz, onun təsiri ölür. Biz orada professorla da danışdıq, dedi ki, müvəqqəti olaraq onun şəkəri düşsün, çox ağır xəstədir.
Bu qız iddia edib ki, anama aktropid vurdular, o vəfat etdi. Bu iddianın heç bir əsası yoxdur, çünki aktropidlə xəstəni komadan çıxarırıq, ən ağır xəstə belə bununla komadan çıxa bilir. Onun iddiasının heç bir əsası yoxdur. Başqa tərəfdən də mən təcili yardım həkimi deyiləm, poliklinika həkimiyəm, mənim 4-dən sonra xəstə üstünə getmək ixtiyarım yoxdur. Amma mən insaniyyətlik edib getmişəm. Xəstə leykoz idi və Bakıda qan institutunda İsgəndər Bağırovun xəstəsi olub, bu adam leykoz xəstəsi idi” - deyə F.Allahverdiyeva qeyd etdi.
İradə SARIYEVA
