Ölkəmizdə qida təhlükəsizliyi ilə bağlı ciddi problemlər var. İstər qida məhsulları istehsalı ilə məşğul olan müəssisələrdə, istərsə də satış mərkəzlərində ortaya çıxan biabırçı faktlar cəmiyyətdə də ciddi narazılıqla qarşılanır.
Gündəlik tələbat məhsullarından olan çörəklə də bağlı vəziyyət acınacaqlıdır. Bakıda istehsal olunan çörək və çörək məhsullarının keyfiyyəti ilə bağlı mediada yayılan məlumatlar da buna sübutdur.
Ən ciddi problemlərdən biri də çörəkbişirmə prosesində istifadə olunan un və qatqı maddələri ilə bağlıdır. Xüsusilə də çörəyin hazırlanmasında istifadə olunan maya kimyəvi qatqılarla zəngindir. Məlumatlara görə, son zamanlar çörəyin turşuması, onun tez yararsız vəziyyətə düşməsinin səbəbi çörəyə vurulan mayadır. Qeyd olunur ki, bəzi çörək sexlərində Çin istehsalı olan “Gloripan” adlı mayalardan geniş istifadə olunur. Qiyməti daha ucuz, keyfiyyəti isə aşağı olduğu deyilən bəzi mayaların acıtma və turşuluq göstəricilərinin yüksək olması çörəklərin ənənəvi dadına təsir edir. Adıçəkilən maya kimyəvi qatqılarla zəngin olduğu üçün sağlamlığa zərərini saymaqla bitməz.
Araşdırmalara görə, Çin korporasiyasına məxsus “Angel Yeast” şirkətinin istehsal etdiyi məhsul Azərbaycana Rusiyadan idxal edilir. Aylıq orta idxal həcmi təxminən 90 ton təşkil edir.
“...yerli maya istehsalına daha çox üstünlük verilsə, təhlükəsiz olar”
Azad İstehlakçılar İctimai Birliyinin rəhbəri Eyyub Hüseynovun sözlərinə görə, bu gün çörək biznesi bazarın ən liberallaşmış sahəsinə çevrilib: “Yəni kim istəsə, bu istehsalla məşğul ola bilir. Mayalara gəlincə, bazara çox sayda drojlar daxil olur. Ciddi şikayətlər olmasa da, yerli maya istehsalına daha çox üstünlük verilsə, təhlükəsiz olar. Bu günə kimi yerli mayalardan bişirilən çörəklərdən şikayətlər gəlməyib”.
Qeyd etdiyimiz kimi, bəzi çörək sexlərində Çin istehsalı olan “Gloripan” adlı mayadan istifadə olunur. Bu maya xəmirdə tez qabardığı üçün sexlər adıçəkilən mayaya üstünlük verirlər. Beləliklə, qidalandığımız çörəyin hazırlanmasında da Çin malından istifadə olunur. Çin malının çörəyə də daxil olması istehlakçıları narazı salır.
Günel CƏLİLOVA
