Rusiyada koronavirus infeksiyasına tutulan xəstələrin 70 faizində, təkcə Moskvada isə 90 faizində Hindistan ştammı aşkar edilib. Rusiya epidemioloqları ölkədə koronavirus pandemiyasının üçüncü dalğasının başlandığını bildirirlər.
Həkimlərin sözlərinə görə, Hindistan ştammı (Delta ştammı) daha sıx olduğundan, orqanizmə asanlıqla düşə bilir. Əsasən gənclərin və uşaqların yoluxduğu koronavirusun bu növünün daha ağır fəsadları müşahidə edilir. Xəstələr trombların yaranması, insult, qanqren, ağciyər arteriyalarının tromboemboliyası, psixikanın pozulması və digər fəsadlarla üzləşirlər. Yeni ştammın simptomları əvvəlkindən fərqləndiyindən, bir çox halda insanlar koronavirusa deyil, adi respirator xəstəliklərə yoluxduqlarını zənn edir və fəal həyat tərzi sürürlər. Belə ki, Delta ştammı özünü iybilmənin itirilməsi ilə deyil, güclü boğaz və baş ağrıları, mədə-bağırsaq ishalı, yüksək hərarət ilə büruzə verir.
Qeyd etdiyimiz kimi, koronavirusun Delta ştammı artıq Rusiyada da yayılıb. Belə ki, adıçəkilən ölkədə iyunun 2-dən bu yana virusun bu mutasiyasına 13 min nəfərdə rast gəlinib. O da məlumdur ki, Rusiya ilə Azərbaycan arasında hava sərhədi açıqdır. Rusiya ilə sərhədlərin açıq olduğunu nəzərə alsaq, bu virusun ölkəmizdə yayılma ehtimalı istisna hal kimi görünmür.
Maraqlıdır, Delta ştammının ölkəmizdə yayılma təhlükəsi varmı?
İlham Bayramov: “...bunun qarşısını almaq çətin olacaq”
İnfeksionist İlham Bayramov bildirdi ki, yeni növ virus olduqca təhlükəlidir: “Bu virusun yayılması geniş fəsadlarla nəticələnəcək. Ölkəyə gələn rusiyalı turistlərdə bu xəstəlik varsa, Azərbaycanda da koronavirusun Delta variantı yayıla bilər. Düzdür, turistlər ölkəyə gələrkən test verirlər, lakin xəstəliyin inkubasiya dövrü olur ki, bu zaman yoluxmuş olsan belə test nəticəsi mənfi göstərir. Xəstəliyin yeni növü ölkəmizdə yayılarsa, bunun qarşısını almaq çətin olacaq. Bu baxımdan hər kəs vaksinasiyaya əvvəlkindən daha ciddi yanaşmalıdır".
Adil Qeybulla: “Bu ştamm yayılarsa, vəziyyət çox ciddi ola bilər”
Professor, həkim-ekspert Adil Qeybulla bildirdi ki, son vaxtlar ən təhlükəli məqam Hindistan ştammının dünyaya yayılmasıdır: “Buna Delta ştammı da deyilir. Bu ştamm yayılarsa, vəziyyət çox ciddi ola bilər. Bu ştammda qızdırma, öskürək və s. kimi əlamətlər çox az olur. Əlamətlər əsasən mədə-bağırsaq pozuntusu formasında özünü göstərir. Pandemiya nə qədər bitməyib, ehtiyatlı olmalıyıq”.
Günel CƏLİLOVA
