Son vaxtlar şəhid ailələrinin daxili ipoteka ilə götürdükləri evlərin ödənişi ilə bağlı yaşadıqları problemlər tez-tez gündəmə gəlir. Ödənişi vaxtında edə bilməyən ailələr cərimələrin tətbiqindən, həmçinin, özəl şirkətlərin lazımi güzəştləri etmədiyindən şikayətlənirlər.
Qeyd etdiyimiz kimi, son günlər bu mövzu ilə bağlı çoxlu sayda şikayət var. Ailə başçısı şəhid olduqdan sonra ailə üzvləri ipoteka kreditini ödəməkdə çətinlik çəkirlər. Ancaq bank və ya bina sahibi isə vətəndaşdan borcun ödənilməsini tələb edirlər. Maraqlıdır, bu problem necə həll olunmalıdır?
“Dövlətimizin şəhid ailələri üçün böyük addımlar atdığı bir vaxtda şirkətlər...”
Sosial sahə üzrə ekspert Mayis Əliyev bildirdi ki, şəhid ailələri ilə bağlı bu tip xoşagəlməz vəziyyət yaşanmamalıdır: “Qazi və şəhid ailələrində borc yaranırsa, bu məsələni cəriməsiz həll etmək olar. Məlumdur ki, bu tip problemlərin həll olunması üçün xüsusi fondlar yaradılıb. Həmçinin, şəhid ailələrinin müəyyən imtiyaz və sosial təminat hüquqları mövcuddur. Ancaq təəssüf ki, ipoteka krediti borcu üzrə şəhid ailəsinə hər hansı güzəşt və imtiyaz qanunla müəyyən olunmayıb. Kredit müqaviləsinin tərəfləri arasında olan hüquqi münasibətlər onlar arasında olan mülki hüquqi müqavilə ilə rəsmiləşdirilir. Qanunvericiliyin tələbinə əsasən, miras qoyan şəxsin (şəhidin) hüquqlarını qəbul edirsənsə, onun vəzifələrini də qəbul etməlisən. Şəhid ailəsinin üzvləri ipoteka krediti üzrə şəhidin adına yığılmış borcu ödəməyə bilər. Bu halda şəhidə məxsus hüquqlardan da imtina etməli, vərəsəliyi qəbul etməməli və ipoteka qoyulmuş mənzili tərk etməlidirlər. Belə olan halda, şəhid ailəsinin üzvlərinə güzəşt olunması bank təşkilatının mərhəmətinə qalır. Şəhid ailəsinin üzvləri kredit borcunu ödəyə bilmirsə, müvafiq güzəştlərin edilməsi və köməklik göstərilməsi üçün Azərbaycan Respublikası Mərkəzi Bankına, kredit götürülən bankın rəhbərliyinə və müvafiq dövlət orqanlarına, habelə yardım təşkilatlarına, fondlara (YAŞAT Fondu və s.) rəsmi müraciətlər edə bilər.
Yaxşı olardı ki, dövlətimizin şəhid ailələri üçün böyük addımlar atdığı bir vaxtda şirkətlər də şəhid ailələrinə münasibətdə müəyyən dözümlülük göstərsinlər, imkan daxilində problemləri qarşılıqlı anlaşma yolu ilə həll etməyə çalışsınlar”.
Günel CƏLİLOVA
