Son illər dünyada “ağ ölüm”ün toruna düşənlərin sayı artan xətt üzrədir. Çox təəssüflər olsun ki, Azərbaycanda da narkomanların sayında artım var.
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasından bildirilib ki, ötən ilin sonuna olan statistikaya əsasən, respublika üzrə 33788 nəfər narkomanlıq diaqnozu ilə qeydiyyatdadır.
Qeyd olunur ki, həmin şəxslərdən 28318 nəfəri dispanser, 5470 nəfəri profilaktik qeydiyyatda olanlardır. Onlardan 618 nəfəri qadındır. 23537 nəfər opioid qrupuna aid, 10251 nəfər kannabinoid qrupuna aid narkotik istifadəçisidir.
2020-ci ildə müvafiq diaqnozla 2723 nəfərin qeydiyyata götürüldüyü, 1856 nəfərin isə qeydiyyatdan çıxarıldığı vurğulanır.
Dövlət qurumundan verilən açıqlamada, həmçinin, bildirilir ki, 2021-ci ilin 3 ayı ərzində narkotiklərdən istifadənin təyin edilməsi məqsədilə tibbi müayinədən keçirilmiş 1043 nəfərdən 529-da istifadəçi olması müəyyən edilib və bununla bağlı zəruri tədbirlərin görülməsi təmin olunub.
Bundan əlavə, 2021-ci ilin 3 ayı ərzində 1234 nəfər Respublika Narkoloji Mərkəzində stasionar müalicədə olub. Hazırda metadonla əvəzedici müalicə proqramı üzrə 3 məntəqədə 773 xəstə müalicə alır.
Statistik rəqəmlərə görə, hər il narkotik maddələrdən istifadə edənlərin sayı artır. Belə ki, 2018-ci ildə bu təhlükəli vərdişin aludəçiləri 31432, 2019-cu ildə 32921 nəfər olduğu halda, 2020-ci ildə isə bu rəqəm artaraq 33788 nəfər olub. Ötənilki statistikadan 10 il əvvəl, yəni 2010-cu ildə isə ölkədə narkotik aludəçilərinin sayı 25489 nəfər təşkil edib. Statistikaya əsasən, son 10 ilə nəzər salsaq, istifadəçilərin sayı 8299 nəfər artıb.
“Problemdən qurtuluş maarifçiliyin gücləndirilməsidir”
AİDS-lə Mübarizə İctimai Birliyinin sədri Nofəl Şərifov “Bakı-Xəbər”ə bildirdi ki, bütün dünyada olduğu kimi, Azərbaycanda bu problem var, özü də yüksək həddədir. Son 10 ildə narkotik istifadəçilərinin sayında 8299 artımın olmasını N.Şərifov müxtəlif amillərlə, yan təsirlərlə bağlayır: “Bu gün dünyada narkotik istifadəçilərinin sayında ciddi artım var. Burada söhbət həm narkotiklərdən, həm də həb şəklində olan kimyəvi vasitələrdən gedir. Həm narkomanların sayı artır, həm də istifadəçilər arasında gəncləşmə gedir. Bunun da müxtəlif səbəbləri var. Bu, əsasən, gənclərin asudə vaxtının səmərəli təşkil edilməməsi, mühitin dəyişdirilməsi də ola bilər, gəncləri başqa istiqamətlərə yönəldənlər olur və onlar özləri də başqa yönlərə maraq göstərirlər. Çox təəssüf ki, bu sahədə çoxalma müşahidə edilir. Bir məqamı da deyim ki, gənclərin çoxu sosial şəbəkələrdə vaxt keçirməyi sevirlər və narkotik vasitələrin də ən çox təbliğ edildiyi, yayıldığı, reklam edildiyi yer “Tik-Tok”dur, “YouTube”dır. Gənclərin narkotik vasitələrin təbliğ edildiyi “Tik-Tok”un və digər sosial şəbəkələrin toruna düşdükləri istisna deyil”.
Bu qorxunc problemin qarşısının alınması üçün hansı işlər görülməli olduğuna gəlincə, N.Şərifovun sözlərinə görə, burada əsas məsələ maarifçiliyin düzgün təşkil edilməsidir: “Bu qorxunc prosesin qarşısının alınması üçün maarifçilik tədbirləri gücləndirilməli, gənclərin asudə vaxtlarının səmərəli təşkili ilə bağlı işlər görülməlidir. Vaxtını səmərəli keçirə bilməyən gəncləri müxtəlif yollarla narkotikin toruna salmaq mümkün olur. Hesab edirəm ki, sosial şəbəkələrdə maarifləndirici işlər görülməlidir. Problemdən qurtuluş maarifçiliyin gücləndirilməsidir”.
İradə SARIYEVA
