Bu gün əksər gəncin məcburiyyət olmadan nikah bağlamalarına baxmayaraq, ailə səadətinə nadir hallarda rast gəlinir. Açıqlanan statistik rəqəmlərə əsasən, boşanmaların sayı günü-gündən artır.
Ay ərzində 1300-dən çox boşanma qeydə alınır. Belə ki, hər üç nikahdan biri boşanma ilə bitir. Son zamanlar boşanmaların artmasının əsas səbəbinin xəyanət olduğu qeyd olunur.
“Əvvəllər kişilər daha çox elə həyat yoldaşının rəfiqəsilə xanımına xəyanət edirdisə, indi rollar dəyişib, hətta qadınlar ərlərinə yaxın olan kişilərlə onu aldadırlar”
Mövzu ilə bağlı fikir bildirən “Vəfa” Sosial-İctimai Birliyinin sədri Fatimə Hacıbəyli qeyd etdi ki, indi insanların ünsiyyət üçün əhatə dairəsi genişdir. İnsanlar bir-birilə sosial şəbəkələrdə tanış olurlar: “Əvvəllər isə belə şeylər yox idi. Hamı internetdə özünü nümunəvi göstərməyə çalışır. Virtual münasibətdə daha üstün görünmək istəyi bu münasibəti maraqlı edir. İnkişaf hesab olunsa da, internetin virtual münasibətlərə şərait yaratması boşanma və xəyanətlərin sayının artmasına səbəb olur”.
Ekspertin sözlərinə görə, boşanmalar əsasən 24-29 və 30-34 yaşarası daha çoxdur. Bu da ailə qurandan sonra ilk beşlikdə özünü göstərir: “Ailə quran cütlüklər həm də ailənin məsuliyyətini dərk etmirlər. "Ailə nədir”, "onu necə idarə etmək lazımdır” kimi məsələləri bilmirlər. Ya valideynlərin təhriki, ya da evlənmək xatirinə nikaha daxil olurlar. Bu gün ən dəhşətli hal odur ki, bəzi gənclər "xoşum gəlməyəcək, boşanacağam” fikirlərini səsləndirirlər. Bu o deməkdir ki, evliliyə sıradan bir hal kimi baxılır. Halbuki, 20-30 il bundan qabaq ətrafımızda kimsə boşananda çox narahat olurduq. Artıq indi kimsə boşandığını dilə gətirəndə təəccüblənmirik. Valideynlərin üzərinə çox böyük məsuliyyət düşür. Ailə qurmamışdan öncə həm oğlan, həm də qız uşaqlarını ailə dəyərlərinə alışdırmaq lazımdır. İkinci tərəf isə məktəblərin bu işə ciddi yanaşmasıdır”.
Həmsöhbətimiz onu da əlavə etdi ki, son vaxtlar boşanma səbəbləri arasında daha çox xəyanət və sosial-iqtisadi faktorlar üstünlük təşkil edir: “Bütün dünyada olduğu kimi, bizdə də insanlar arasındakı münasibətə internet resursları müdaxilə edir, onlayn və texnogen amillər təsir göstərir. Bunun fonunda isə ailədaxili iqlimdə dəyişiklik baş verir.
Onu da əlavə edim ki, xəyanətlərin sayı artıb və buna yol açan amillərdən biri sosial şəbəkələrdən həddən artıq istifadədir. Zərif cins nümayəndələri daha emosional olduqlarından xəyanəti qəbul etmirlər və bu da ayrılmalara gətirir. Qadınlar daha səbrsiz, kişilər daha xəyanətkar olublar”.
Birlik sədrinin sözlərinə görə, boşanmalara maddi problemlər də təsir göstərir: “Amma sevindirici haldır ki, Azərbaycan ailələrində həyat yoldaşı ya psixi, ya da fiziki xəstə olan insanların boşanma halı çox azdır. Əksinə, onlara maksimum diqqət, qayğı göstərilir. Əvvəllər kişilər daha çox elə həyat yoldaşının rəfiqəsilə xanımına xəyanət edirdisə, indi rollar dəyişib, hətta qadınlar ərlərinə yaxın olan kişilərlə onu aldadırlar. Əvvəlki kimi qaydalar, qadın və kişi məsuliyyətində normalar dəyişib və bu normalar dəyişdikcə də belə ailə faciələri yaşanır”.
Günel CƏLİLOVA
