Nazirlik yeni qiymətləndirməyə hazırlaşır, müəllimlər deyinir - nazirlik də, müəllimlər də haqlıdır, nə edək...

img

Azərbaycanda bu il müəllimlərin sertifikasiyadan keçirilməsi gözlənir. Epidemioloji vəziyyət ölkədə sabit olarsa, payız aylarında pilot olaraq sertifikasiya keçiriləcək. Bunu təhsil naziri Emin Əmrullayev “Facebook” hesabında canlı yayım zamanı deyib.

O bildirib ki, burada məqsəd müəllimlərin düzgün qiymətləndirilməsi və təhsildə keyfiyyətin artırılmasıdır: “Müəllimlərimizin daim peşəkarlıq səviyyəsini artırmağın tərəfdarıyıq. Azərbaycanda müəllimlər 20 yaşlarından işləməyə  başlayır və adətən, 40 il məktəbdə çalışır. Bu dövrdə ibtidai sinif müəllimi 10 sinfə dərs deyir. Hər sinifdə 25 uşaq varsa, 250 insanın həyatını dəyişir. Kimya, fizika və digər fənlərdə yüzlərlə şagirdin həyatı dəyişir. Sertifikasiya zamanı səriştəli müəllimlərin seçilməsi və qiymətləndirilməsi əsas məqsəddir”.

Nazir qeyd edib ki, payıza doğru sertifikasiya keçirilə bilər: “Sertifikasiyanın məqsədi kimisə işdən çıxarmaq yox, onları daim inkişafda saxlamaqdır. Birinci il keçməyən müəllimlər il ərzində ikinci dəfə sertifikatlaşdırmadan keçə bilər. Proses humanist əsaslarla hazırlanıb”.

Müəllimlərin sertifikasiyadan keçirilməsi bəzi pedaqoqların narazılığına səbəb olub.

  • Elçin Əfəndi: “...onun üçün müsabiqə çətin olacaq”

Təhsil eksperti Elçin Əfəndinin fikrincə, sertifikasiya imtahanı da müəllimlərin işə qəbul müsabiqəsində olduğu kimi eyni proqram əsasında  təşkil olunacaq: “Sertifikasiya imtahanları ilə bağlı qorxulu heç nə yoxdur. Burada dərsliklərdən, MİQ proqramından, təhsil qanunları və konsepsiyalardan kənarda heç nə öz əksini tapmır. İmtahanda müəllimlər ciddi sıxıntı yaşamazlar. Nəzərə almaq lazımdır ki, burada hazırlıqlı olmaqdan çox şey asılıdır. Hər hansı namizəd, sadəcə, suallar necə olacaq deyə-deyə vaxt itirirsə, onun üçün müsabiqə çətin olacaq. İmtahanda sualların çətinlik səviyyəsi demək olar ki, MİQ-lə eyni səviyyədə olacaq. Sadəcə, diqqətli olmaq lazımdır”.

  • Nizami Hüseynov: “Müəllimlərin sertifikasiyadan keçirilməsi yaxşı haldır, ancaq…”

Təhsil eksperti Nizami Hüseynov bildirdi ki, müəllimlərin sertifikasiyadan keçirilməsi yaxşı haldır, ancaq burada bəzi məqamlar nəzərə alınmalıdır: “Sertifikasiyadan uğurla keçən pedaqoqlar qiymətləndirilməlidir. Qiymətləndirilmə onların əməkhaqqında da müşahidə oluna bilər. Belə olarsa, müəllimlər öz üzərlərində işləyərlər. Təbii ki, bu halın nəticəsi şagirdlərə müsbət təsir edəcək. Müəllimin bilik və bacarıqlı olması şagirdin savadlı olmasına səbəb olacaq”.

Günel CƏLİLOVA

Son xəbərlər