Tortun üstündə şəhid fotosu - bu hansı etika və milli dəyərə sığır...

Könül İsmayılova: “Tortun üzərində şəhidin fotosu olarsa, o tortu kim yeyər?”

img

Son günlər sosial şəbəkələrdə insanları duyğulandıran video yayılıb. Videoda şəhid atasına şəhid olmuş oğlunun doğum gününə hazırlanmış tortu kəsmək həvalə olunur. Ancaq tortun üzərində şəhidin fotosu var. Əlində bıçaq fotoya baxan atanı ağlamaq tutur və o, tortu kəsmir. Bıçağı stolun üzərinə qoyub, göz yaşları içərisində həmin yerdən uzaqlaşır.

Onu da qeyd edək ki son zamanlar bu hal çoxalıb. Müxtəlif təşkilatlar və ya şəhid yaxınları üzərində şəhidin fotosu olan tortu Vətən yolunda həlak olmuş qəhrəmanın ailəsinə təqdim edirlər.

Ümumiyyətlə, tortun üzərinə şəhidin fotosunun yerləşdirilməsi nə dərəcədə düzgündür? Nəzərə almaq lazımdır ki, bu olduqca həssas mövzudur. Şəhidin yaxınına belə bir tortun verilməsi nə məna ifadə edir?

Ekspertlərin fikrincə, şəhidin fotosunun tortun üzərinə yerləşdirilməsi etik baxımdan düzgün deyil.

  • “Şəhidə hörmət etmək, onun yaxınlarına mənəvi dəstək olmaq lazımdır, yoxsa şəhidin fotosu qidanın və ya geyimin üzərinə vurulmamalıdır”

Psixoloq Könül İsmayılova bildirdi ki, bu gün insanlar şəhidlərin adını, qəhrəmanlığını yaşatmaq üçün müxtəlif yollara əl atırlar. Bəzən insanların bu mövzuda etdikləri hansısa hərəkət xoş qarşılanmaya bilər: “Tortun üzərinə şəhidin şəklini yerləşdirmək onun sağ olan yaxınları üçün bir qədər ağırdır. Hazırlayan insanın emosiyası bir cür ola  bilər, çünki tortu bişirən, sifariş verən şəhidin anası-bacısı deyil, o bunu düşünmür. Atanın tortu kəsməməsi isə çox normaldır. Ağrı-acılı ataya, anaya, bacı və ya yoldaşına bu cür jestlərin edilməsi düzgün deyil. Ümumiyyətlə, son zamanlar bilərəkdən və ya bilməyərəkdən şəhidlərə qarşı hörmətsizlik müşahidə olunur.

Bir neçə gün öncə orta məktəbi bitirən şagirdlərin məzun günü keçirildi. Məzunların bir qismi köynəklərinin arxa hissəsinə şəhidin fotosunu yerləşdirmişdilər. Yaxşı olardı ki, köynəkdə şəhidin fotosu arxa hissədə deyil, ön hissədə olsun”.

Həmsöhbətimiz hesab edir ki, tortun üzərinə vəfat edən şəxsin fotosunun yerləşdirilməsi düzgün deyil: “Tortun üzərində şəhidin fotosu olarsa, o tortu kim yeyər? Vəfat etmiş birinin başını, belini, üzünü kəsib yemək məntiqsizdir. İnsanlar bir-birinin acısına hörmət etməlidirlər. Yaxşılıq edirmiş kimi, kiminsə yarasını qoparmaq ədəbsizlikdir. Şəhidə hörmət etmək, onun yaxınlarına mənəvi dəstək olmaq lazımdır. Şəhidin fotosu qidanın və ya geyimin üzərinə vurulmamalıdır”.

Günel CƏLİLOVA

Son xəbərlər