Pandemiya ilə mübarizə səviyyəsinə görə yaxın qonşuları azı 4 dəfə üstələdik

Aydın Əliyev: “...digər ölkələrlə müqayisədə karantin tədbirlərinə tez start verildi”

img

Azərbaycan koronavirus pandemiyası ilə mübarizədə dünyanın ən öndəgedən ölkələri sırasındadır. Dövlət öz vətəndaşlarının sağlamlığının qorunması istiqamətində mühüm tədbirlər həyata keçirir.

Pandemiyanın başladığı vaxtdan etibarən sistemli, qabaqlayıcı tədbirlər görülüb, əhalinin sağlamlığının qorunması ilə yanaşı, sosial müdafiəsinin gücləndirilməsi istiqamətində də mühüm proqram və layihələr gerçəkləşdirib. Həmçinin, ölkəmiz pandemiya ilə qlobal mübarizədə bir sıra təşəbbüslərlə çıxış edib. Bunun nəticəsidir ki, Azərbaycan koronavirusa qarşı peyvəndlənməyə görə MDB ölkələri arasında lider mövqeyə çıxıb. Statistikaya əsasən, bu günədək ölkədə əhalinin 18 faizi peyvəndlənib. Vaksinin birinci dozasını 1,5 milyondan çox, hər iki dozanı 1 milyona yaxın azərbaycanlı qəbul edib. Ölkədə 4 vaksin - Rusiyanın "Sputnik V", Çinin "CoronaVac", Almaniya və ABŞ-ın "Pfizer", Böyük Britaniya və İsveçin "AstraZeneca" vaksinləri qeydiyyatdan keçib.

Bu arada məlum olub ki, pandemiya ilə mübarizədə Azərbaycan öz mövqeyini bir az da yaxşılaşdırıb. Belə ki, dünyada hər milyon nəfərə yoluxma sayına görə Gürcüstan 22-ci, Ermənistan 38-ci, Azərbaycan 85-ci yerdə qərarlaşıb. Halbuki, Azərbaycanın əhalisi Gürcüstandan 2 dəfə, Ermənistandan 3 dəfə çoxdur.

Maraqlıdır, pandemiya ilə mübarizə səviyyəsinə görə Azərbaycanın bu cür üstün mövqedə qərarlaşması nədən irəli gəlir?

  • “Peyvəndlənmə ilə bağlı Azərbaycan çox çevik davrandı və bunun da ümumi işə faydası oldu”

Sözügedən məsələyə aydınlıq gətirən Tibb Universitetinin Farmakologiya kafedrasının dosenti Aydın Əliyev Azərbaycanın uğurunu bir sıra amillərlə əlaqələndirdi: “Bunun bir səbəbi onunla əlaqədardır ki, Azərbaycanda digər ölkələrlə müqayisədə karantin tədbirlərinə tez start verildi. Özü də bizdə bu yöndə görülən işlər daha ciddi idi. Başqa bir tərəfdən, biz nə qədər tənqidi prizmadan yanaşsaq da, millətimiz qanunlara tabedir. Bu amilin də müəyyən rolu oldu. Düzdür, ilk dövrlərdə karantin qaydalarına əməl olunması ilə bağlı müəyyən çətinliklər yaşandı. Ancaq bəlli bir müddətdən sonra bunlar yoluna düşməyə başladı. Peyvəndlənmə ilə bağlı Azərbaycan çox çevik davrandı və bunun da ümumi işə faydası oldu. Baxmayaraq ki, Azərbaycan pandemiya ilə mübarizə tədbirlərinə, müharibəyə böyük vəsait sərf etdi, amma vaksin alınmasına da vəsait ayrıldı. Hətta yoxsul ölkələrə yardım məqsədilə Ümumdünya Səhiyyə Təşkilatına 10 milyon dollar yardım edildi. Azərbaycan bununla dünyaya millətsevər, insansevər ölkə olduğunu sübut etdi. Bununla belə, Azərbaycanın ötən il müharibədə qələbə qazanması da bu işə töhfə verdi. Söhbət ondan gedir ki, bəzən həkimlərin görə bilmədiyini, digər amillər həyata keçirir. Yəni millətin ümumi əhval-ruhiyyəsinin yaxşı ovqata köklənməsi insanlarda immunitetin güclənməsinə öz müsbət təsirini göstərdi. Bir sözlə, bir sıra kompleks tədbirlərin görülməsinin nəticəsidir ki, dünyada hər milyon nəfərə yoluxma sayına görə yaxşı mövqedəyik. Nəticədə pandemiya ilə mübarizə sahəsində müsbət nəticələrin əldə olunması mümkün olub”.

A.Əliyev hesab edir ki, bu sahədə vəziyyət müsbətə doğru dəyişməkdə davam edəcək.

Vidadi ORDAHALLI

Son xəbərlər