Ailə başçısı şəhid oldu - "Kristal Abşeron” MTK ailəyə ikinci zərbəni vurdu...

“Kristal Abşeron” şirkəti: “...4 şəhid hərbçinin 200 min 487 manat məbləğində borcu şirkətin təsisçiləri tərəfindən tam ödənilib”

img

“Kristal Abşeron” MTK şəhid ailəsini çıxılmaz vəziyyətdə qoyub. Belə ki, Teymur Əzizov şəhid olandan sonra ailə evin aylıq ödənişini, faizləri vermək vəziyyətində deyil. Şirkət isə heç bir güzəşt etmək istəmir. Bu barədə şəhid Əzizov Teymur Əli oğlunun anası Əzizova Lyubov Vyaçeslafovna məlumat verib.

Şəhid anası bildirib ki, 2018-ci ildə şəhid Əzizov Teymur Əli oğlu Sumqayıt şəhəri, 10-cu mikrorayonda “Kristal Abşeron” MTK-nın tikdiyi binadan ev alıb. Evin qiyməti 195 min manat dəyərində olub. İlkin ödəniş 31 min 500 manat olub, 22 ay isə aylıq 2725 manat ödəniş ediblər. Oktyabr ayınadək, yəni Teymur Əzizovun şəhid olmasına qədər evin ödənişlərində heç bir çətinlik olmayıb. Teymur Əzizovun aylıq qazancı 1500 manatdan çox olub, həyat yoldaşının isə kiçik biznesi olub. Beləcə, ailə evin ödənişlərini vaxtlı-vaxtında ödəyib. T.Əzizov şəhid olduqdan sonra ailə “Kristal Abşeron”a aylıq ödəniş etmə gücündə olmayıb.

Ödənişi edə bilməmələri barədə “Kristal Abşeron”a rəsmi məktubla müraciət edən ailə şirkətdən onlara köməklik göstərilməsini xahiş edib.

Vətəndaşın yazılı müraciətinə ən geci 1 ay müddətinə cavab verilməsilə bağlı Prezidentin də göstərişi olmağına baxmayaraq, “Kristal Abşeron” artıq 9 aydır ki, ailənin müraciətinə cavab verməyib.

Şəhid ailəsi öncə “YAŞAT” Fondunda olub, daha sonra məsələ ilə bağlı “Kristal Abşeron” MTK-nın Sumqayıt filialının təsisçisi Əliağa adlı şəxslə görüşüb. Həmin şəxs bildirib ki, “Kristal Abşeron”un direktoru Məhayət Nəbiyev onlara heç bir güzəştin edilməyəcəyini söyləyib. Əliağa adlı şəxs Məhayət Nəbiyevin sözlərini bu şəkildə çatdırıb: “Bizə yuxarı instansiyalardan göstəriş verilib ki, heç bir şəhid ailəsinə köməklik etməsinlər. Biz lazımi qədər “YAŞAT” Fonduna pulumuzu ödəyirik. Bu səbəbdən də əlavə güzəştlərdən söhbət gedə bilməz”.

Çıxılmaz vəziyyətdə qalan ailə ölkə rəhbərliyindən kömək istəyir.

  • “...yayımlanan məlumatlar həqiqətə uyğun deyil”

Məsələ ilə bağlı “Kristal Abşeron” şirkətindən bildirildi ki, şəhid T.Əzizovun anası Əzizova Lyubov Vyaçeslafovnanın “Kristal Abşeron” MTK-dan alınmış daşınmaz əmlaklar üzrə borclarının ödənilməsində yaranmış problemlərlə bağlı yayımlanan məlumatlar həqiqətə uyğun deyil: “Belə ki, T.Əzizov “Kristal Abşeron”dan, ümumilikdə, 4 mənzil, 2 qeyri-yaşayış (ticarət) sahəsi və 2 avtodayanacaq alıb. Lakin artıq 2 ilə yaxındır ki, ödənişlərində gecikmələr yaranıb. Hazırda 4 mənzil üzrə qalıq borc, ümumilikdə, 100 min 37 manat təşkil edir. T.Əzizov İkinci Qarabağ müharibəsində şəhid olduqdan sonra “Kristal Abşeron” MTK-nın təsisçiləri onun varisi – həyat yoldaşı Səmədova Zeynəb Vəli qızına dəfələrlə 2 mənzil üzrə olan 50 min 18 manat məbləğində borcun təsisçilər tərəfindən ödənilməsini təklif ediblər. Lakin o, bununla razılaşmayıb”.

Şirkətdən o da bildirildi ki, “Kristal Abşeron” MTK 44 günlük Vətən müharibəsi ərzində və ondan sonrakı dövrdə Silahlı Qüvvələrə Yardım Fonduna 200 min manat, “YAŞAT” Fonduna 100 min manat ödəyib, həmçinin, Silahlı Qüvvələrimizə zəruri yük avtomobilləri və müxtəlif növ tikinti texnikası ilə dəstək olub.

“Kristal Abşeron” MTK-dan mənzil almış 4 şəhid hərbçimizin, ümumilikdə, 200 min 487 manat məbləğində borcu şirkətin təsisçiləri tərəfindən tam ödənilərək şəhidlərin ailələrinə borcun olmaması barədə arayışlar təqdim edilib”.

Günel CƏLİLOVA

Son xəbərlər