Avropa regionunda vaksin olunanların sayı 17 faizə çatır. “Trend”in məlumatına görə, bunu Ümumdünya Səhiyyə Təşkilatının (ÜST) Avropa regional bürosunun direktoru Hans Klüge deyib. Onun sözlərinə görə, Avropada vaksin olunanların sayı region əhalisini yeni dalğadan qorumaq üçün kifayət deyil.
Ekspertlər qeyd edirlər ki, Azərbaycanda əhalinin 18 faizə qədəri koronavirusa qarşı peyvəndlənib. Bu, MDB ölkələri arasında ən yüksək göstəricidir. Ekspertlər deyirlər ki, ÜST-in bəyan etdiyi kimi, Avropada vaksinasiya tələb olunan səviyyədə deyil, amma Azərbaycanda qısa müddət ərzində əhalinin 18 faizə yaxını peyvəndlənib.
“ÜST hər zaman Azərbaycanın koronavirusla mübarizə üsullarını, nailiyyətlərini təqdir edib”
Bu göstəricisi ilə də Azərbaycanın Avropaya nümunə olduğunu deyən professor, tanınmış tibb mütəxəssisi Nəsib Quliyev hesab edir ki, ölkəmizdə vaksinasiya prosesi daha nizamlı şəkildə aparılır, bu sahədə pərakəndəliyə yol verilmir. N.Quliyevin sözlərinə görə, məhz pərakəndəliyə yol verilməməsi, insanların prosesə könüllü qoşulması nəticəsində ölkə əhalisinin 20 faizə yaxını artıq vaksinasiya olunub. “Azərbaycanda vaksinasiya prosesi daha mütəşəkkil və nizamlı şəkildə təşkil edilib. Ümumavropa əhalisinin 17 faizi, Azərbaycan əhalisinin isə 18 faizdən artığı vaksinasiya olunub. Koronavirus pandemiyasının qarşısının alınması, ondan sağalmaq üçün tələb olunan dərman preparatları hələ icad olunmayıb. Amma xəstəliyin qarşısını almaq üçün yeganə təsirli yol vaksinasiyadır. Peyvəndin də konkeret bir ölkə, bir şəhər üzrə müvəffəqiyyət əldə etməsi üçün ən azı orada olan əhalinin 60 faizi peyvəndlənmədən keçməlidir. Bizdə peyvəndlənmə 20 faizə yaxınlaşır. Çünki bizim ölkədə 2 milyondan artıq vaksinasiya aparılıb.
ÜST hər zaman Azərbaycanın koronavirusla mübarizə üsullarını, nailiyyətlərini təqdir edib”.
N.Quliyev hesab edir ki, hər bir ölkə çalışır ki, öz əhalisini vaksinasiyadan keçirsin, bir-birini yoluxdurmanın, infeksiyanın qarşısı alınsın. O qeyd etdi ki, nə qədər immuniteti çox olan adam varsa, onlara bu virus yayılmır, 60 faiz əhali peyvəndlənəndən sonra isə virusun qarşısının alınması asanlaşır, çünki küçədə gedən 100 adamdan 60-da immunitet olur, 40 nəfər də o 60 nəfərin içində həll olunur və təmasla yoluxma risqi azalır.
İradə SARIYEVA
