Vaksin vurdurmaqdan imtina etmiş 2500 müəllim məktəblərə buraxılacaqmı…

Kamran Əsədov: “Vaksinasiya prosesindən imtina edən və hər hansı bir ciddi səbəb olmadan bu prosesə qoşulmayan müəllimlərin əyani tədris prosesində iştirakının məhdudlaşdırılmasını görə biləcəyik”

img

“Müəllimlərin vaksinasiyası ilə bağlı iş aparılır. Bakı şəhəri üzrə 38 min 185 müəllimdən 24 min 502 nəfəri vaksinasiyadan keçib”. Bunu təhsil naziri Emin Əmrullayev sosial şəbəkə hesabında ona ünvanlanan sualları cavablandırarkən deyib.

Nazirin sözlərinə görə, ümumilikdə, 4 min 620 müəllim koronavirusa yoluxub: “3400 nəfər müxtəlif səbəblərdən – həkimdən arayış gətirdiyinə görə, immuniteti olduğuna görə və başqa səbəblərdən peyvəndlənmədən keçməyib. 2500 müəllim isə vaksin vurdurmaqdan imtina edib”.

2500 müəllim vaksin vurdurmaqdan imtina edib. Bu müəllimlər sinif otağına buraxılacaqlarmı? Onlardan nə tələb olunur?

Tanınmış təhsil eksperti Kamran Əsədov “Bakı-Xəbər”ə şərhində bildirdi ki, Azərbaycan Respublikasının Əmək Məcəlləsinə görə, müəllimlərlə bağlanan əmək müqavilələrinə xitam verilməsinin halları var. “Amma burada istisna bir hal var, bu da yoluxma risqi ilə bağlıdır. 2020-ci ildən bəri ölkədə pandemiya hökm sürür və bu, təkcə tədris prosesinə yox, insanların gündəlik həyatına bilavasitə təsir göstərir. İstər dövlət təşkilatları, istərsə də özəl qurumlar, bir sözlə, hamı istəyir ki, pandemiyadan az zərərlə çıxsınlar. Çünki insanların sağlamlığı hər şeydən önəmlidir prinsipi əsas götürülür və hər şey buna hesablanmış şəkildə həyata keçirilməlidir. Bu gün Azərbaycan təhsil sistemi özündə 2 milyon insanı birləşdirir, onun da 150 mini müəllimdir. Hər bir şagird dərsdən sonra evinə gedir. Biz imkan verə bilmərik ki, yoluxma halı baş versin və tədris prosesinin normal gedişinə mane olsun.

Qeyd edim ki, Azərbaycan Respublikasında Əmək Məcəlləsinin tələblərinə görə, müəllimlərlə bağlanmış müqaviləyə o zaman xitam verilə bilər ki, onlar ciddi şəkildə yoluxma hallarına yol versinlər və tədrisin axınına mane olsunlar. Hətta bununla bağlı İnzibati Xətalar Məcəlləsinə və Cinayət Məcəlləsinə də dəyişiklik edilib. Hesab edirəm ki, burada 2500 müəllimin vaksinasiya olunmaqdan imtina etdiyinə görə birbaşa işdən çıxarılmasından söhbət gedə bilməz. Bununla bağlı konkret hal nəzərdə tutulmur. Amma müəyyənləşdirilsə, sübut olunsa ki, onlar yoluxdurucu və daşıyıcı şəxsdirlər, o zaman, bəli, onlarla bağlanmış müqaviləyə xitam verilə bilər”.

K.Əsədovun sözlərinə görə, təhsil sistemində çalışan, səhhətində hər hansı bir problem olmayan şəxslər mütləq şəkildə vaksinasiya prosesində iştirak etməlidirlər, bu, gələcəkdə tədrisin dayandırılmasının qarşısını alacaq amildir. “Yox, biz vaksinasiyaya tam şəkildə qoşulmasaq, tədrisin axını yenidən dayana bilər. Ona görə də bütün müəllimlər vaksinasiya prosesində könüllü iştirak etməlidirlər. Hər kəs normal həyata qayıtmaq və tədris prosesində iştirak etmək üçün vaksinasiyaya qoşulmalıdır. Birincisi, onu deyim ki, vaksin vurdurmayıblarsa, yaşı 65-dən yuxarı olan müəllimlər sinif otağına buraxılmayacaqlar. Risq qrupunda olan müəllimlərimizin sayı ümumi müəllimlərimizin 37 faizini təşkil edir. İndi onların auditoriyalara buraxılması ilə bağlı heç bir məhdudiyyət yoxdur. Amma növbəti tədris ilində risq qrupunda olan müəllimlər vaksinasiya olunmazlarsa, onların məktəbdə ənənəvi tədrisi təşkil etməsinə icazə verilməyəcək. Bu birmənalı şəkildə belədir. Çünki Azərbaycan Respublikasının İnzibati Xətalar Məcəlləsinə və eyni zamanda, Cinayət Məcəlləsinə bu hal əlavə edilib. Hesab edirəm ki, biz Əmək Məcəlləsinin də 70-ci maddəsinin tələblərini əsas götürərək vaksinasiya prosesindən imtina edən və hər hansı bir ciddi səbəb olmadan bu prosesə qoşulmayan müəllimlərin əyani tədris prosesində iştirakının məhdudlaşdırılmasını görə biləcəyik. Ona görə də müəllimlərimizin hamısına vaksinasiya prosesinə könüllü qoşulmağı tövsiyə edirəm. İnanıram ki, onlar normal həyata qayıtmaq üçün bu prosesə könüllü şəkildə qoşulacaqlar” - deyə K.Əsədov qeyd etdi.

İradə SARIYEVA

Son xəbərlər