Dünyanı cənginə almış koronavirus pandemiyası bütün sahələrə mənfi təsir göstərib. Pandemiyadan ən çox zərər çəkmiş sahə isə turizmdir. Karantin qaydaları səbəbilə ölkələrə giriş-çıxışın bağlı olması turizm sahəsinə də ciddi təsir etdi.
Turizm sektorunun yenidən inkişaf etməsi üçün hələ ki, hava sərhədi bərpa olundu. Məlum olduğu kimi, iyunun 10-dan etibarən Azərbaycan Rusiya və Türkiyə vətəndaşları üçün hava sərhədini açdı. Beləliklə, iyunun 10-dan etibarən hava yolu vasitəsilə Türkiyə və Rusiya vətəndaşlarının Azərbaycana sərbəst gəlişi bərpa olunur.
Onu da qeyd edək ki, iyunun 10-dan etibarən tam peyvənd kursunu keçmiş rus və türk turistləri Azərbaycana tətilə gələ biləcəklər. Sərhədlərin açılması barədə qərar respublikanın Nazirlər Kabineti tərəfindən 5 iyun tarixində qəbul edildi. İndi Operativ Qərargahdan səyahət üçün xüsusi icazə almaq lazım deyil.
Ölkəyə daxil olduqda COVID-19-a qarşı tam peyvəndlənməni və ya bu xəstəliyi keçirməsini təsdiqləyən sənədin yanında 72 saatdan gec olmayaraq edilən PCR testlərinin nəticələri göstərilməlidir. Testi 18 yaşına çatmamış vətəndaşlar da verməlidirlər.
Artıq hava sərhədi bərpa olunub. Ancaq bu sahədə illər öncə yaşanan problem hələ də aktuallığını qoruyur. Belə ki, təyyarə biletlərinin satış qiymətinin yüksək olması ölkəyə gəlmək istəyən turistlərin sayına təsir edəcək.
Məlumat üçün bildirək ki, Moskvadan Bakıya bir nəfər üçün uçuş qiyməti 440 dollardır və Bakıdan Antaliyaya uçuş üçün təxminən daha 250 dollar ödənilməlidir.
Ekspertlər hesab edirlər ki, təyyarə biletinin yenə baha olması turizm sektoruna mənfi təsir edəcək.
“COVID-dən əvvəl də əhalinin bir qismi qiymət bahalığına görə Gürcüstan üzərindən uçmağa üstünlük verirdi”
İqtisadçı-ekspert Natiq Cəfərli qeyd etdi ki, pandemiyadan öncə də bazarda sərnişindaşımanın 95 faizi AZAL-a məxsus idi. Buna baxmayaraq, qiymətlər fərqlənirdi, biletlər qonşu ölkələrə nisbətən baha satılırdı. Ona görə COVID-dən əvvəl əhalinin bir qismi Gürcüstan üzərindən uçmağa çalışırdı. Qiymət bahalığına görə Azərbaycandan uçmalı olan şərnişinlərin beşdə biri 2018-2019-cu illərdə Gürcüstandan bilet alaraq Türkiyəyə uçmağa üstünlük vermişdilər: “Məlumdur ki, Gürcüstanda da neçə vaxtdır ki, hava limanları fəaliyyətə başlayıb, bəzi reyslər bərpa edilib. Orada Türkiyəyə uçuş biletləri Azərbaycandan 2 dəfə ucuz qiymətlərə satılır”.
Həmsöhbətimiz onu da əlavə etdi ki, AZAL uçuşlara birbaşa nəzarət edən və inhisarında saxlayan şirkətdir: "Digər şirkətlərin Azərbaycana daxil olmasında müəyyən maneələr var".
Günel CƏLİLOVA
