Ağır bir tədris ilini başa vurmaq üzrəyik, amma təsirlərini uzun müddət aradan qaldırmalı olacağıq. Trend-in məlumatına görə, bunu təhsil naziri Emin Əmrullayev “Facebook” səhifəsindəki canlı yayımda bildirib.
Nazir qeyd edib ki, bu il ümumtəhsil müəssisələrinin XI sinfini 84 mindən çox, IX sinfi isə 131 mindən çox şagird bitirir. Bu il 160 mindən artıq I sinif şagirdi üçün də fərqli il oldu, onlar da bu dərs ilini yarı distant, yarı hibrid bitirirlər”.
Yay məktəbi üçün 177 min 935 müraciət...
Nazir deyib ki, yay məktəbinə 177 min 935 şagird müraciət edib. O bildirib ki, müraciət edən şagirdlər 2653 məktəbi əhatə edir.
"Son zəng" təşkil olunacaq, ancaq şərtlə...
Emin Əmrullayev bu il ümumtəhsil məktəblərində "Son zəng" təşkil olunacağını da deyib. Nazir bildirib ki, bununla bağlı Nazirlər Kabineti yanında Operativ Qərargaha müraciət edilib və müsbət cavab gəlib.
"Yaxın günlərdə şərtlər elan ediləcək. Bu şərtlər çox sadədir, açıq havada və müəyyən say məhdudiyyətləri tətbiq olunacaq. 100-dən çox məzunu olan məktəblərdə yəqin ki, bir neçə hissədən ibarət "Son zəng" tədbirlərinin keçirilməsi planlaşdırılır. Sosial məsafəyə riayət olunması tələb ediləcək" - deyə, E.Əmrullayev qeyd edib.
2500 təhsil işçisi vaksinasiyadan imtina edib
Bakıda 38 185 təhsil işçisindən 24 mindən çoxunun vaksinasiya olunduğunu deyən nazirin sözlərinə görə, 4 620 nəfər yoluxduğu üçün, 3400 nəfər digər səbəblərdən, yəni xəstəlik, hamiləlik, antitel olduğu üçün vaksinasiya olunmayıb. 3000-ə yaxın şəxs həkimdən arayış gətirdiyi üçün peyvənd edilməyib, cəmi 2500 nəfər imtina edib.
Monitorinqlər bəzi müəllimlərin məktəbə tam hazırlıqsız gəldiyini ortaya çıxardı
Nazir bildirib ki, 24 ümumi təhsil məktəbində monitorinq aparılıb. Monitorinqin məqsədi təhsilin keyfiyyətini müəyyənləşdirmək idi.
O bildirib ki, monitorinq aparılan məktəblərdə neqativ hallar da müşahidə olunub. Bəzi müəllimlər məktəbə tam hazırlıqsız gəliblər. Monitorinq nəticəsində aşkarlanan qüsurların aradan qaldırılması üçün müəyyən addımlar atılacaq.
