Biz qadın deyəndə yalnız onun zahiri gözəlliyi, cazibədarlığı deyil, həmçinin, ana olmasını, dünyaya övlad gətirməsini gözümüz önündə canlandırırıq.
Qadının varlığı yer üzündə insan nəslinin daim var olması və çoxalmasıdır. Məhz buna görə də müdriklər “ana haqqı Tanrı haqqıdır” deyiblər. Məhəmməd Peyğəmbər isə “cənnət anaların ayağı altındadır” deyərək qadına məhz bu yeri layiq görüb. Hər dəfə uşaq dünyaya gələndə onun valideynlərini təbrik edirlər. Lakin son zamanlar (dünyanın bir çox ölkəsində bu tendensiya
mövcuddur) qadın hamilə olanda, həm özü, həm də ailə üzvləri narahat olur, nə edəcəklərini, necə qərar verəcəklərini düşünürlər. Çıxış yolunu isə çox zaman abortda görürlər.
Ölkəmizdə də abort etdirənlərin sayı heç də az deyil. Ən acınacaqlısı isə abort etdirənlər arasında məktəbli qızların sayının çox olmasıdır. Açıqlanan statistik rəqəmlərə əsasən, son 3-4 il ərzində 1200 məktəbli abort etdirib. Məktəb yaşlı qızların abort etdirməsi ciddi narahatlığa səbəb yaradacaq bir vəziyyətdir.
Ölkəmizdə erkən doğuşların və abortların bu qədər çoxalmasını ekspertlər Azərbaycan cəmiyyətinin mühafizəkarlığının müasir dünyanın real mənzərəsinə uyğun olmaması ilə əlaqələndirirlər. Bir tərəfdən internet sayəsində uşaqlar və yeniyetmələr cinsi əlaqə haqqında tez məlumatlanır və bu mövzu onlar üçün maraqlı olur. Digər tərəfdən isə valideynlər və müəllimlər onlarla bu haqda danışmırlar, çünki Azərbaycanda bu mövzu tabudur.
Müasir yeniyetmələr isə sevişmək və azad yaşamaq istəyirlər, amma heç kim bunu onlara özlərinə və başqalarına ziyan vurmadan yaşayacaqlarını izah etməyib.
Fatimə Hacıbəyli: “Biz nə qədər milli mentalitetdən danışsaq da, müasir dünyanın müasir davranışları var”
“Vəfa” Sosial-İctimai Birliyinin sədri Fatimə Hacıbəyli bildirdi ki, erkən yaşlı qızların hamilə qalması narahatlıq doğurur: “Nəzarətsiz qalan uşaqların sayı çoxdur. Baxmayaraq ki, onların valideynləri var, amma nəzarətsizlik sonda belə sonluqlarla nəticələnir. Yaxud da bəzi uşaqlar kifayət qədər sərbəst davranışa malik olur və onları idarə etmək çətindir. Biz nə qədər milli mentalitetdən danışsaq da, müasir dünyanın müasir davranışları var. Uşaqlar daha sərbəst, daha rahat və seksual azad olmağa üstünlük verirlər. Təbii ki, təcrübəsizlik, eyni zamanda, nəzarətsizlik, ailədə zorakılıq halları buna təsir göstərir. Hamilə qalan qızların hamısı o demək deyil ki, öz xoşu ilə cinsi əlaqədə olublar. Həmin rəqəmlər içərisində zorlama halları da baş verib. Kimsə polisə müraciət edib, uşağı qanuni yolla abort edirib. Abortları gizli şəkildə etmək heç yaxşı hal deyil. Bunun üçün mütləq qeydiyyatdan keçmək lazımdır. Heç bir həkim azyaşlı qızı özbaşına abort edə bilməz”.
Pərvanə Mustafayeva: “Könüllü münasibətdə olan azyaşlılar daha çoxdur”
Ginekoloq Pərvanə Mustafayeva bildirdi ki, könüllü münasibətdə olan azyaşlılar daha çoxdur. Evlilik yaşına çatmayan qadınların hamiləliyinin sonlandırılması kriminal abort hesab olunduğundan, hər həkim bu müdaxiləni etmir: “Bu zaman da qızlar qeyri-düzgün həb istifadə edərək hamiləliklərini sonlandırırlar. Düzgün olmayan şəraitdə baş tutan abort isə sonrakı dövrdə müxtəlif fəsadlara gətirib çıxarır”.
Günel CƏLİLOVA
