Hüseyn Mehdiyev: “Rəy verməli olan qurumlardan biri də Maliyyə Nazirliyidir”
Məlum olduğu kimi, Azərbaycan Prezidentinin müvafiq sərəncamı ilə milli kinematoqrafiyanın dövrün tələblərinə uyğun inkişaf etdirilməsinə dair “Azərbaycan Kinematoqrafiyasının İnkişaf Konsepsiyası”nın layihəsi hazırlanıb.
Milli Məclisdə müzakirəyə çıxarılmaq ərəfəsində olan konsepsiya layihəsinin qəbul olunmasında hər hansı bir problem ola bilərmi?
Qeyd edək ki, maliyyə naziri Samir Şərifov həmin konsepsiyanın deputatlarla müzakirəsində kino sahəsinə ayrılan pulların böyük hissəsinin kinoya xərclənməməsinə şübhəli yanasma ortaya oyub.
Bu səbəbdən konsepsiya layihəsinin qəbulunda hər hansı bir problemin gözlənilib-gözlənilmədiyini öyrənmək üçün Professional Kinorejissorlar Gildiyasının rəhbəri Hüseyn Mehdiyevlə əlaqə saxladıq.
- “Konsepsiyanın qəbul olunmasına əngəl...”
H.Mehdiyev “Bakı-Xəbər”ə bildirdi ki, belə bir mexanizm var, konsepsiya Prezident Administrasiyasına təsdiqə getməmişdən əvvəl bütün nazirliklər ona rəy verməlidirlər. “Belədirsə, konsepsiyaya rəy verməli olan qurumlardan biri də Maliyyə Nazirliyidir. Mən anlaya bilmirəm ki, maliyyə naziri həmin konsepsiyada hansı yenilikləri görmək arzusunda idi? Mənə elə gəlir ki, yanaşma bir o qədər düzgün deyil. Çünki reallıqdan çıxış etmək lazımdır. Bu gün bizim kinematoqraf əfsuslar olsun ki, çox dağınıq və pərakəndə vəziyyətdədir. Yəni sistem demək olar ki, yoxdur, struktur dağıdılıb. Belə olduğu halda, konsepsiyada birinci məqsəd, birinci görülən iş nə olmalıdır? İlk növbədə, həmin o dağılan kinematoqrafı sistemləşdirmək, onun yeni strukturunu yaratmaq, idarəetmə sistemini qurmaq, normal bir vəziyyətə gətirmək və ondan sonra burada hansısa yeniliklər axtarmaq lazımdır. Ən elementar işləri görməmişdən, kinematoqrafı ən elementar vəziyyətə gətirməmişdən əvvəl ondan heç nə gözləmək düzgün deyil. İlk növbədə, dünyada nə proseslər gedirsə, necə mexanizmlər varsa, o mexanizmlərdən, modellərdən yararlanaraq, bu konsepsiya hazırlanıb. Həmin konsepsiyanı ictimaiyyət də müzakirə edib”.
Konsepsiyanın Milli Məclisdə müzakirəsinə gəlincə, H.Mehdiyev qeyd etdi ki, hələ layihə Milli Məclisdə müzakirə edilmir, konsepsiyanın müzakirəsi əvvəl nazirliklərdən keçməlidir. “Mən mexanizmin necə olduğunu bilmirəm və konsepsiya layihəsinin Milli Məclisdə müzakirə edilib-edilmədiyini deyə bilmirəm, amma müzakirələr, birinci, nazirliklərdə edilir. Bütün bunlarla yanaşı, əlbəttə ki, konsepsiyada müəyyən qüsurlar ola bilər, burada bizim heç də o qədər arzuladığımız məsələlər yoxdur. Aydın məsələdir. Amma indiki vəziyyətdə kinematoqrafı normal vəziyyətə, sistemə gətirmək, onun infrastrukturunu yaratmaq, normal səviyyəyə çatdırmaq üçün bu konsepsiya tam yetərlidir. Bu konsepsiyada əsas məqsəd bu gün bu işləri görə biləcək bir təşkilatı, Azərbaycan Kino Agentliyini yaratmaqdır ki, ona səlahiyyət verilsin, o da bunları yarada, işi görə bilsin. Bilirsiniz, biz belə deyəndə çoxları elə bilir ki, bizim Mədəniyyət Nazirliyinə nə isə bir iradımız var. Söhbət nazirlikdən getmir, sistemdən gedir. Nazirlik dövlətin məmur aparatıdır, onun müəyyən funksiyası var, o bütün sistemlə məşğul ola bilməz. O müəyyən bir siyasəti, bir konsepsiyanı müəyyənləşdirir, siyasəti həyata keçirir. Amma bütün təşkilati məsələlərlə ayrıca qurumlar məşğul olmalıdırlar. Həmin qurumlardan biri də Kino Agentliyi olmalıdır. Bütün dünyada belədir, dünya təcrübəsində necədirsə, biz də elə başlamışıq, elə ediblər, düz də ediblər. Bunu yaradandan sonra bütün məsələləri həll etməklə məşğul olarlar və biz də bilərik ki, kino ilə məşğul olan insanlar var, bu insanlar da müəyyən məsuliyyət daşıyırlar, biz də onlardan tələb edərik, etməyə də ixtiyarımız var, onlar da bu tələbləri həyata keçirməlidirlər. Mənə elə gəlir ki, bu konsepsiyada nə isə böyük yenilik axtarmaq düzgün deyil. Yenilik ancaq kinematoqrafı normal vəziyyətə gətirmək olar. Ondan sonra fikirləşərik ki, görək nə edək? Bəlkə Avropa, Amerika gedən yolu yox, başqa yolu gedək? Bu artıq sonrakı məsələlərdir, artıq bizim hər şeyimiz olandan sonra bu barədə fikirləşə bilərik. İndi isə yox. Ona görə də məni maliyyə nazirinin fikirləri təəccübləndirir, qəbul etməmişik deyir. Siz niyə kino ictimaiyyətinin fikri ilə maraqlanmırsınız? Kino ictimaiyyəti sizin üçün heç nədir? Kinonu bizdən yaxşı bilirlər, kinonun peşəkarı bizik, yoxsa onlar? Peşəkarı bizik. Mənə elə gəlir ki, məsələnin qoyuluşu düzgün deyil”.
H.Mehdiyev hesab edir ki, konsepsiyanın qəbul edilməməsinə heç bir əsas yoxdur və o, konsepsiyanın qəbul ediləcəyinə inanır. “Konsepsiyanın qəbul olunmasına əngəl olacaq heç bir amil olmamalıdır, görmürəm də. Bu konsepsiya normal bir konsepsiyadır.
İradə SARIYEVA
