Sahil qəsəbəsindəki Asfaltzavod məhəlləsi ilan-çayan ovlağına dönüb...

Firdovsi Şahbazov: “Sabah hansısa uşağı ilan sancıb həyatına son qoysa, buna görə kim cavab verər?”

img

Qaradağ rayon Sahil qəsəbəsinin Asfaltzavod yaşayış massivinin sakinləri əqrəb və ilanlardan fəryad edirlər. Problem ondadır ki, kanalizasiya suları yerə axıdılır, məişət tullantılarını atmağa qutular olmadığından, ətrafda antisanitar vəziyyət yaranıb. Bir sözlə, nə zibil atmağa qutular var, nə də kanalizasiya şəbəkəsi mövcuddur.

Sakinlər deyirlər ki, bu səbəbdən əqrəb və ilanların sayı artıb. Çünki sözügedən həşəratlar məhz isti aylarda üzə çıxır. Bu səbəbdən adıçəkilən massivdə yaşayanlar daim qorxu içindədirlər. Sahil qəsəbəsi Asfaltzavod deyilən yaşayış massivinin sakinləri illərdir məhz bu problem içində yaşayırlar. Sakinlər deyirlər ki, illər öncə məcburiyyət üzündən həmin ərazidə özlərinə evlər tikiblər. İndi isə baxımsızlıqdan problemləri bitib-tükənmək bilmir. Sakinlər dəfələrlə zibil qutularının qoyulması ilə bağlı müraciət etsələr də, icra hakimiyyəti buna məhəl qoymur.

Qaradağ Rayon Mənzil-Komunal Təsərrüfatı Birliyindən verilən məlumata görə, ərazidə tullantılar mütəmadi olaraq təmizlənir. Ancaq orada tikilən evlərin heç birinin qeydiyyatı olmadığına görə sakinlər zibil pulu ödəmirlər. Bu səbəbdən qurum onlarla müqavilə bağlaya bilmir. Buna baxmayaraq, qurumun rəsmisi Cahangir Cahangirov söz verib ki, ərazidə zibil qutuları qoyulacaq. Yeri gəlmişkən onu da qeyd edək ki, ərazidə əsasən məcburi köçkünlər məskunlaşıblar.

  • “Hər il dövlət büdcəsindən kommunal xərclərin qarşılanması ilə bağlı milyonlarla vəsait ayrılır”

Məsələyə münasibət bildirən iqtisad üzrə fəlsəfə doktoru Firdovsi Şahbazovun fikrincə, hansısa məsələlər əraziyə zibil qutusunun qoyulmaması üçün əsas ola bilməz: “Elə zəruri məsələlər var ki, onlar mütləq öz həllini tapmalıdır. Bu gün Bakıda yüz minlərlə qeydiyyatsız vətəndaş yaşayır. İşləmək üçün paytaxta gəliblər və illərdir qeydiyyatda deyillər. İndi onlar qeydiyyatda deyil deyə yaşadıqları ərazilərə zibil qutuları qoyulmasın? Bu cür yanaşma doğru deyil. Sabah antisanitariya üzündən sözügedən yaşayış massivində hansısa uşağı ilan sancıb həyatına son qoysa, buna görə kim cavab verər? O baxımdan, məsələyə son dərəcə diqqətlə yanaşmaq lazımdır. Bakıda təkcə Sahil qəsəbəsində deyil, şəhərətrafı bir sıra yaşayış massivlərində o cür problemlər var. Hər il dövlət büdcəsindən kommunal xərclərin qarşılanması ilə bağlı milyonlarla vəsait ayrılır. Hara gedir həmin vəsait? Zəhmət çəkib həmin vəsait hesabına zibil qutusu alsınlar. Ərazidə zəruri kanalizasiya xətləri çəkilsin. Üstəlik, nəzərə almaq lazımdır ki, ərazidə yaşayanlar məcburi köçkünlərdir. O baxımdan, ərazidəki müvafiq problemi maksimum tez həll etməlidirlər”.

Ekspert hesab edir ki, vaxtında bu kimi problemlərin aradan qaldırılmaması daha sonra onların artmasına və ondan sonra işlərin daha da çətinləşməsinə gətirib çıxarır.

Vidadi ORDAHALLI

Son xəbərlər