Kamran Məmmədli: “Ölkəmizdə qeyri-rəsmi iş yerləri də çoxdur”
Açıqlanan statistik rəqəmlərə əsasən, ötən il ölkəmizdə məşğul əhalinin sayında azalma, işsizlərin sayında isə artım qeydə alınıb.
2019-cu ildə 4,938 milyon nəfər olan məşğul əhalinin sayı 2020-ci ildə 4,877 milyon nəfərə düşüb.
Bu dövrdə işsizlərin sayı xeyli artıb. 2019-cu ildə 251,6 min olan işsizlərin sayı ötən il 375,9 minə yüksəlib. İl ərzində işsizlərin sayı 124,3 min və ya 49,4 faiz artıb.
Qeyd edək ki, Azərbaycan əhalisinin 5,252 milyon nəfəri iqtisadi fəal insanlardan ibarətdir. 2020-ci ilin nəticələrinə əsasən, işsizlərin sayının kəskin artması ilə əlaqədar ölkəmizdə işsizliyin səviyyəsi 4,8 faizdən 7,2 faizə yüksəlib.
- “İqtisadiyyatdakı qapanmaların ən ciddi fəsadı işsizliyin böyük miqyasda genişlənməsi oldu”
İqtisadçı-ekspert Kamran Məmmədli qeyd etdi ki, ötən illərlə müqayisədə işsizliyin səviyyəsinin artmasının məlum səbəbləri var: “Belə ki, iqtisadiyyatdakı qapanmaların ən ciddi fəsadı işsizliyin böyük miqyasda genişlənməsi oldu. Azərbaycanda işsizliyin, ümumiyyətlə, problem olmadığı görünsə də, rəsmi statistikada işsizlik səviyyəsinin ayrı-ayrı illərdə 4-5 faizi ötmədiyi əks olunsa da, yaranmış dərin böhranda problemi gizlətməyin mümkün olmayacağı lap əvvəldən bəlli idi. Pandemiyanın, karantin rejiminin gətirdiyi özəlliklərdən biri bu oldu ki, ölkədə işsizliklə bağlı rəqəmlər həttə ən yüksək səviyyədə belə, tənqid olundu. Bununla da indiyə kimi açıqlanan məlumatların doğru olmadığı, məlumatlarda problemlər olduğu aşkara çıxdı. Məlum oldu ki, işsizlərin sayı açıqlanan rəsmi rəqəmlərdən xeyli çoxdur. Pandemiya dövründə işsizlərə yardım kimi 600 min nəfərə 190 manat verildi”.
Həmsöhbətimiz onu da əlavə etdi ki, ölkəmizdə qeyri-rəsmi iş yerləri də çoxdur. İqtisadiyyatın elə sahələri var ki, orada qeyri-rəsmi işləyənlər üstünlük təşkil edirlər: “İctimai iaşə sektorunda da qeyri-rəsmi çalışanların sayı olduqca çoxdur və bu şəxslər uzun müddət işləməyiblər”.
Günel CƏLİLOVA
