İkinci Qarabağ müharibəsində Vətən torpaqlarının azadlığı uğrunda özünü fəda edib adını Azərbaycanın yeni zəfər tarixinə yazan igidlərdən biri də Cahid Şahiq oğlu Qəniyevdir.
Vətən sevgisindən güc alan, onun şərəfini uca tutan, uyuduğu torpaq insanların and yerinə çevrilən qəhrəmanımız 1994-cü ildə dağlar diyarı Lerikin Sors kəndində dünyaya göz açır, sonralar ailəsi Biləsuvar rayonuna köçür. Xalqına layiqli, ləyaqətli xidmət etmək üçün Cahid müqəddəs amallar işığında müstəqil həyata qədəm qoyur. Artıq el-obasında əsl qeyrətli oğul kimi tanınan bu vətənpərvər yeniyetmənin əsgərlik illəri gəlir. Ön xətdə xidmət edir. Dəfələrlə amansız quduz düşmənlə üz-üzə gəlir. Yüksək döyüş qabiliyyəti göstərməklə törədə biləcəyi təxribatın qarşısını vaxtında ala bilir. İgid, cəsur Vətən keşikçisinin vətənpərvərliyi, torpağa sevgisi, dosta sədaqəti əsgərlərə nümunə göstərilir. Doğma Azərbaycanına oğulluq borcunu şərəflə, məqamı gələndə qanını, canını belə əsirgəmədən yerinə yetirib, üzüağ evinə qayıdır. Amma Vətən torpaqlarının işğal altında olması ona rahatlıq vermir. Elə torpaqları geri qaytarmaq niyyəti ilə 2014-cü ildə könüllü olaraq yenidən əyninə əsgər paltarı geyinir, düşmənə layiqli cavab verməkdən ötrü silaha sarılır.
Cahid Azərbaycan Silahlı Qüvvələrinin Təlim və Tədris Mərkəzinin Gizir hazırlıq kursunu bitirir. Tank komandiri olur. Qorxmazlığı, döyüşkənliyi, eyni zamanda nizam-intizamı ilə seçilir. İdarə etdiyi hərbi texnikanın sirlərini dərindən mənimsəyir, təlimlər zamanı çətin vəziyyətlərdən bacarıqla çıxır. Düşməni hər zaman əzməyə hazır olan gizir Cahid 2016-ci il Aprel döyüşlərində şücaətlə iştirak edir, ən dəhşətli, ağır döyüşlərdə belə düşmənin bağrina çat salan bir qüvvəyə çevrilir. İkinci Qarabağ müharibəsində isə Vətən oğlu ermənilərə od qoymaqla tarix yazır. Ön cərgədə olmaqla haqq savaşımızın qəhrəmanı Suqovuşan, Talış istiqamətində ermənilərə sarsıdıcı zərbələr endirir, Vətən torpağının hər qarışı uğrunda əzmlə vuruşur. Sentyabrın 31-də odun-alovun içində 26 yaşında şəhidlik zirvəsinə ucalır. Və yaşadığı şərəfli ömür yolu Vətəninə, xalqına sədaqət simvoluna dönüb əbədiləşir.
Cahid ailəli idi, 10 aylıq Fərid adlı oğlu Vətənə əmanət qalır. Son danışığı zamanı ailəsinə deyir: "Oğlum sizə əmanət, haqqınızı halal edin".
Müharibə meydanında gizir Cahidin göstərdiyi şücaətin dövlət tərəfindən "Vətən uğrunda" medalı ilə qiymətləndirilməsi isə bir daha onun öz Vətəninə ürəkdən bağlılığının sübutu oldu.
Zəfər ORUCOĞLU Azərbaycan Jurnalistlər Birliyinin üzvü
