Məlumatlara görə, ali məktəblərdə və Azərbaycan Milli Elmlər Akademiyasının müvafiq institutlarında müdafiə dissertasiya şuralarının fəaliyyəti dayandırılıb. Nəzərə alsaq ki, bu gün neçə-neçə tədqiqatçı müdafiə prosesinə buraxılacağı günü gözləyir, bu halda şuraların fəaliyyəti niyə dayandırılıb? Bu nə ilə bağlı ola bilər?
Bəzi ekspertlərin iddialarına görə, müdafiə şuralarının bir qisminin fəaliyyəti yarandığı gündən formal olub və heç bir funksionallığı olmayıb. Müəyyən ekspertlər isə bildirirlər ki, müdafiə-dissertasiya şuralarının fəaliyyət göstərməməsinin səbəbi başqa amillərlə bağlıdır, bu daha çox pandemiya ilə əlaqəlidir.
“Bu iş əyani şəkildə təşkil edilmədikcə, proses ləngiyir, onlayn formada isə sanki formal xarakter daşıyır”
Filologiya üzrə fəlsəfə doktoru, dosent Vüsalə Ağabəyli “Bakı-Xəbər”ə bildirdi ki, şuralar fəaliyyətini onlayn şəkildə davam etdirir, proses bu qaydada gedir: “Pandemiya ilə əlaqədar olaraq bir çox proses dayandırılmışdı, o cümlədən, müdafiələr, müzakirələr və seminarlar. Artıq bir neçə aydır ki, prosedurlar onlayn formada təşkil olunmağa başlayıb. Xüsusilə də bu şəkildə artıq müzakirələr keçirilir”. Elm üçün vacib olan bu vacib prosedurun məsafədən keçirilməsinin zərərli tərəfinə gəlincə, V.Ağabəyli qeyd etdi ki, dissertasiyaların onlayn müzakirəsi, əslində, o qədər də effektiv deyil. Onlayn müzakirələrin hər hansı bir yüksək effekt vermədiyi qənaətində olan V.Ağabəylinin sözlərinə görə, proses ənənəvi qaydada keçirilərsə, daha yaxşı olar: “Bu iş əyani şəkildə təşkil edilmədikcə, proses ləngiyir, onlayn formada isə sanki formal xarakter daşıyır. Bilirsiniz ki, bu şuraların da, müzakirə və seminarların da formallığını əyani proses zamanı da müşahidə etmişik. Təbii, hamısının yox, böyük əksəriyyətinin. İstər əyani, istərsə də onlayn olsun, formallıqdan əl çəkmək lazımdır” - deyə V.Ağabəyli qeyd etdi.
Araşdırmamız zamanı məlum oldu ki, proses Azərbaycan Respublikasının Prezidenti yanında Ali Attestasiya Komissiyasının Rəyasət Heyətinin 29.01.2021-ci il tarixli qərarı ilə təsdiqlənən “Xüsusi karantin rejimi dövründə dissertasiya şuralarında müdafiələrin təşkili və keçirilməsinə dair” təlimata uyğun olaraq, müdafiəyə buraxılan elmi işlərin müzakirəsi onlayn qaydada aparılır və şura üzvləri onlayn qaydada səs verirlər.
İradə SARIYEVA
