Magistraturaya qəbul olunmaq istəyən tələbələr qaydalardan narazılıqlarını bildirirlər. Onların dediyinə görə, magistratura imtahanlarında hər fənn üzrə minimal keçid ballarının ləğv olunmasını istəyirlər.
Şikayətin məğzi odur ki, tələbə müvafiq ixtisas üçün lazım olan balı yığıb, əvəzində isə minimal fənn üzrə bir balla kəsilirsə, bu, doğru deyil.
Tələbələrin məlum şikayəti ilə bağlı ekspertlərə müraciət etdik.
“Plan yerlərinin tam şəkildə dolması üçün bu məsələdə bakalavrların nisbi bal məhdudiyyəti aradan qaldırılmalıdır”
Təhsil eksperti Kamran Əsədov bildirdi ki, bu il magistraturaya qəbul imtahanlarında iştirak edənlərin sayı əvvəlki illərə nisbətən daha çox idi. Ancaq buna baxmayaraq, müəyyən qədər bakalavrlar var idi ki, onlar təqdim edilən test tapşırıqlarının hamısına doğru cavab verə bilmədilər. Magistratura pilləsi əsasən ixtisaslı kadrların seçilməsi üçün nəzərdə tutulub, ancaq təəssüf ki, Azərbaycanda artıq ikinci ildir magistratura pilləsinə keçirilən imtahanlarda ixtisas bilikləri yox, imtahan iştirakçılarının məntiqi riyazi düşünmə təfəkkürü, xarici dil bilmə və informatika bilikləri yoxlanılır. İxtisas bilikləri isə yoxlanılmır: “Bu test tapşırıqlarına daha çox texniki və təbiət fənlərindən təhsil alan bakalavrlar daha yaxşı cavab verirlər. Humanitar sahədə oxuyanlar isə bu test tapşırıqlarına zəif cavab verirlər. Biz görürük ki, hazırda DİM Nazirlər Kabineti ilə razılaşdırılmaqla müəyyən proqramlar üzrə keçid ballarını 30, 40, 45 və 50 olaraq müəyyənləşdirib. Bununla belə, müəyyən bakalavrlar var ki, DİM tərəfindən fevral və may ayında keçirilən imtahanlarda iştirak ediblər, amma bir-iki fəndən tələb olunan minimum balı toplaya bilməyiblər. Nəzərə alsaq ki, bakalavrların müəyyən bir qismi tələb olunan ümumi keçid balını toplayıb, amma fənlər üzrə nisbi bal məhdudiyyətini toplamayıb, bu, müəyyən qədər həmin şəxslərin təhsilinin əlçatanlığına ciddi şəkildə mane olur”.
Həmsöhbətimiz onu da əlavə etdi ki, hər hansı bir bakalavr müsabiqə şərtini ödəyib, 50 bal toplayıbsa, digər bir bakalavr isə məntiq, xarici dil, informatika fənlərinin bir, yaxud ikisindən nisbi bal məhdudiyyətini toplaya bilməyib, 60-70 bal toplayıbsa, burada seçim çətindir. Çünki ədalətli yanaşma olmalıdır: “Keçid balı ilə bağlı minimum tələblər aradan qaldırılmalıdır. Bu addım rəqabəti daha da artıracaq. Düzdür, gələcəkdə bakalavrlarda müəyyən qədər rahatlıq yarada bilər. Ancaq, buna baxmayaraq, qəbul prosesi toplanan balla həyata keçirilir. Plan yerlərinin tam şəkildə dolması üçün bu məsələdə bakalavrların nisbi bal məhdudiyyəti aradan qaldırılmalıdır. Nisbi bal məhdudiyyətini aradan qaldırmaqla həm təhsilin əlçatanlığını təmin edəcəyik, həm gənclərin elmə yönəlməsinə sədd olan maneələri aradan qaldıracağıq, həm də ali təhsil müəssisələrində plan yerləri dolduracağıq”.
Günel CƏLİLOVA
