Türkan qəsəbəsinin “Sovxoz” adlanan ərazisində yaşayan sakinlər yaxınlıqdakı daş karxanalarından fəryad edirlər. Sakinlər deyirlər ki, nə əkib-becərdikləri meyvə-tərəvəzin bəhərini yeyə bilirlər, nə də nəfəs ala bilirlər. Karxananın tozuna görə həyətlər, bir sözlə, hər yer tozun içində olur.
Sakinlər deyirlər ki, illərdir onlar həm təmiz havaya, həm də içməli suya həsrətdirlər. Bu səbəbdən əsas zəruri olan ehtiyaclarının həllini istəyirlər. Türkan sakini Bəsirə Orucova deyir ki, ağacları yumaqdan bezib. Karxanadan gələn toza görə evlərin damları, həyətlər, küçələr, qəbir daşları ağappaqdır. Bu səbəbdən sakinlər astma, bronx xəstəliklərindən əziyyət çəkirlər. Karyerin tozu üzündən uşaqlar allergiyadan əziyyət çəkirlər. Sakinlər söyləyirlər ki, yuyulan paltarı çöldə sərə bilmirlər. Bir az külək əsən kimi paltarlar qumun içində olur. Həmin paltarları geyinən uşaqların allergiyası yüksəlir. Vəziyyət o yerə gəlib çatıb ki, yayda sakinlər həyətlərində belə otura bilmirlər. Qəsəbə sakinləri kənara çıxanda özləri ilə ehtiyat ayaqqabı götürürlər. Sakinlərin ən böyük istəyi yaxınlıqdakı karxanaların bağlanmasıdır.
Bir neçə il əvvəl Dövlət Şəhərsalma və Arxitektura Komitəsinin sədri Yeni Türkan qəsəbəsinin salınacağını, karxanaların yerində süni göllər yaradılacağını deyirdi. Ancaq o vaxtdan ortada heç nə yoxdur. Üstəlik, “Sovxoz” yaşayış massivində içməli su problemi var, yollar bərbad gündədir və s.
Məsələ ilə əlaqədar Xəzər Rayon İcra Hakimiyyətinin mövqeyini öyrənməyə çalışsaq da, buna aydınlıq gətirən olmadı.
“Nəzərə almaq lazımdır ki, karxanaların arxasında məmurlar dayanır”
Məsələyə münasibət bildirən ekspert Rasul Cahangirlinin sözlərinə görə, daş karxanalarında qanunsuzluqlar davam edir: “Karxanalarda işçilərin əmək müqaviləsiz işlədilməsi azmış kimi, illərdir insanların yaşayışını da cəhənnəmə çeviriblər. Əslində, daş karxanaları yaşayış məntəqələrindən uzaqda olmalıdır. Çünki Bakı küləklər şəhəridir. Külək üzündən yaxınlıqdakı yaşayış massivləri pis günə düşür. Ekologiya və Təbii Sərvətlər Nazirliyi dərhal bunun qarşısını almaqla bağlı müvafiq tədbirlər görməlidir. Ancaq məlum olur ki, nazirlik ya bunu etmək istəmir, ya da problemin həllində acizdir. Nəzərə almaq lazımdır ki, karxanaların arxasında məmurlar dayanır. Onlar bu karxanaları bu və ya digər formada qeyri-rəsmi himayə edirlər. Bax, problemin kökündə dayanan əsas amil bununla bağlıdır. Yoxsa, bu dərəcədə karxanalarda özbaşnalıq hökm sürməzdi. Ona görə də məsələyə kompleks yanaşılmalıdır”.
Ekspert hesab edir ki, yaşayış məntəqələrinə yaxın daş karxanalarının fəaliyyəti dərhal dayandırılmalıdır.
Vidadi ORDAHALLI
