Məlumatlara görə, məcburi köçkünlərə verilən may ayı üzrə aylıq sosial müavinətdən 5 manata yaxın vəsait tutulub. Məcburi köçkünlər onlar üçün nəzərdə tutulan müavinətdən 5 manat tutulmasından narazılıq edirlər.
Məcburi köçkünlərin dediyinə görə, “Kapital Bank” artıq bu il ikinci dəfədir ki, məcburi köçkünlərə verilən müavinətdən xidmət haqqı tutur. Qeyd edək ki, birinci tutulma mart ayında olub. Köçkünlərin sözlərinə görə, bu ilə qədər onların kartından hər hansı vəsait çıxılmayıb. Qərarın bu ildən dəyişməsi və ikinci dəfə müavinətin tutulması məcburi köçkünləri ciddi narahat etməyə başlayıb.
Məcburi köçkünlər onu da qeyd edirlər ki, birinci tutulmada müavinətin bank xidmətləri üçün çıxıldığı əsas gətirildi. Ancaq bu xidmət ildə bir dəfə olur.
Müavinətin iki dəfə kəsilməsi məcburi köçkünlər arasında anlaşılmazlıq yaradıb.
Qeyd edək ki, vahid aylıq müavinət alan məcburi köçkünlər iki kateqoriyaya bölünürlər. Birinci kateqoriyaya aid edilənlərə - fərdi qaydada sayğacların quraşdırılması və texniki istismarı mümkün olmayan, habelə təbii qazla təmin olunmayan sıx müvəqqəti məskunlaşma yerlərində faktiki yaşayan məcburi köçkünlərə və onlara bərabər tutulan şəxslərə hazırda ayda 33 manat vahid aylıq müavinət verilir. İkinci kateqoriyaya aid olanlar – fərdi qaydada sayğaclardan istifadə edən məcburi köçkünlər və onlara bərabər tutulan şəxslər isə hazırda 60 manat vahid aylıq müavinət alırlar.
“Müqavilə öhdəliyinə görə, bank tərəfindən yalnız kart hesabına illik xidmət haqqı ödənilməsi nəzərdə tutulub”
Məsələ ilə bağlı Qaçqınların və Məcburi Köçkünlərin İşləri üzrə Dövlət Komitəsindən bildirildi ki, müavinətin kəsilməsinin onlarla əlaqəsi yoxdur: “Müvafiq qayda əsasında, hər bir məcburi köçkün üçün ayrılmış vəsait onun üzvü olduğu ailənin başçısının adına açılan bank hesab kartına köçürülür. Müqavilə öhdəliyinə görə, bank tərəfindən yalnız kart hesabına illik xidmət haqqı ödənilməsi nəzərdə tutulub”.
Günel CƏLİLOVA
