Hazırda bütün dünyanın gündəmində COVID-19 pandemiyasına qarşı nəzərdə tutulan vaksinlər və onların kimlərə tətbiq olunması məsələsidir. Qeyd edək ki, artıq koronavirusla bağlı müxtəlif ölkələrdə vaksinasiya prosesinə başlanıb.
Dünyada bir neçə vaksin var. Onlardan “Pfizer” və “BioNTech”, ”Moderna" şirkətlərinin hazırladıqları vaksinləri, Çinin istehsal etdiyi “CoronaVac”, Rusiyanın hazırladığı “Sputnik-V”, Çinin “Cansono Biologics” və “Walvax Biotechnology” şirkətlərinin hazırladıqları “Janssen” vaksinlərini misal göstərmək olar. Avropa və Amerika “Pfizer” və “BioNTech” şirkətlərinin birgə hazırladıqları vaksindən istifadə edirlər. “Pfizer” Amerikanın nəhəng farmaseptik şirkətlərindən biri, “BioNTech” isə Almaniya şirkətidir. Bu vaksin 3-cü mərhələ sınaqlarından uğurla çıxıb və 95 faiz effektiv olduğu bildirilir.
Azərbaycan Respublikasında “COVID-19” xəstəliyi əleyhinə 2021-2022-ci illər üçün Vaksinasiya Strategiyası”na uyğun olaraq, ölkə üzrə peyvəndlənmə prosesi davam etməkdədir.
İyun ayının 7-dən yeni növ koronavirus infeksiyasına qarşı peyvəndlənmə məqsədilə vətəndaşlar "Pfizer” vaksinindən də istifadə edə biləcəklər. Bu, vətəndaşlarımızın seçim imkanlarını daha da artırır. Həmin vaksinin istifadəsinə Azadlıq prospekti 112 ünvanında yerləşən Bakı Sağlamlıq Mərkəzində və Parlament prospekti 76 ünvanında yerləşən Mərkəzi Klinik Xəstəxanada başlanacaq.
Onu da qeyd edək ki, ölkəmizdə Rusiya və Çin vaksinindən istifadə olunub. Maraqlıdır, "Pfizer” vaksininin digər vaksinlərdən fərqi nədir?
“Mövcud vaksinlərin içində ən müasir texnologiya ilə hazırlanan məhz “Pfizer”dir”
Məsələ ilə bağlı fikir bildirən professor, tibbi ekspert Adil Qeybulla qeyd etdi ki, Dünya Səhiyyə Təşkilatının reyestrinə daxil olan 4 vaksindən biri “Pfizer”dir: “Məlumat üçün bildirim ki, həmin vaksinlər arasında ən yaxşısı “Pfizer”dir. Bu vaksin ötən ilin mart ayında istehsal olunub. Aprel ayından isə həmin vaksinin üzərində aparılan yoxlamalar müsbət effekt verib. Aparılan araşdırmalarla “Pfizer” vaksini özünü doğruldub. Onu da qeyd edim ki, Böyük Britaniya və Amerikada adıçəkilən vaksin yalnız təcili hallar üçün nəzərdə tutulub. Mövcud vaksinlərin içində ən müasir texnologiya ilə hazırlanan məhz “Pfizer”dir. “Pfizer” vaksininin heç bir yan təhlükəsi də yoxdur. Bu baxımdan hesab edirəm ki, bu vaksin vaxtında ölkəmizə verilməli idi. “Pfizer” vaksininin ölkəmizə daxil olması olduqca yaxşı effekt verəcək”.
Günel CƏLİLOVA
