Türkiyənin təhsil naziri Ziya Selçuk Azərbaycan və Türkiyənin ali məktəb diplomlarının qarşılıqlı olaraq tanınması ilə bağlı məsələyə münasibət bildirib.
Z.Selçuk deyib ki, tədris ilinin müddəti baxımından iki ölkənin diplomlarının ekvivalenti ilə bağlı bəzi uyğunsuzluqlar var və diplomların ekvivalenti ilə bağlı bəzi razılaşmalar əldə edilib. Minlərlə gəncin diplomlarının tanıdılması üçün bu açıqlama ümidverici ola bilərmi? Nazir razılaşmalar dedikdə nəyi nəzərdə tutub?
“Hesab edirəm ki, artıq “hə” deyilib”
Mövzunu şərh edən tanınmış təhsil eksperti Kamran Əsədov “Bakı-Xəbər”ə bildirdi ki, hazırda azərbaycanlı gənclərin xarici ölkələrdə təhsil almaq istiqamətində ən böyük seçimləri qardaş Türkiyədir. K.Əsədovun sözlərinə görə, bunun da əsas səbəbi Türkiyə ali məktəblərinə qəbul qaydalarının asan olması, eyni zamanda, dil, din, adət-ənənə, siyasi-sosial, mədəni əlaqələrimizin yaxınlığıdır. “Hər il kifayət qədər azərbaycanlı gənc qardaş Türkiyənin universitetlərinə oxumağa gedir. Hazırda Türkiyədə təhsil alan azərbaycanlıların sayı 21 min nəfərdən çoxdur və 1 il ərzində ən azı 4 minə yaxın şəxs təhsilin həm bakalavr, həm magistratura, həm də doktorantura pilləsində təhsil almaq üçün Türkiyəyə gedir. Burada müəyyən problemlər də ortaya çıxır. Birincisi, Azərbaycanın üç universitetinin diplomunun Yüksək Önətim Kurulu (YÖK) tərəfindən tanınması ilə bağlı problem var. Yəni bu qurum həmin ali təhsil müəssisələri məzunlarının Azərbaycanda oxumaq sənədlərini tanımır və həmin universitetlərin tələbələri qardaş Türkiyədə magistraturada təhsillərini davam etdirə bilmirlər. İkinci problem isə Azərbaycan Respublikasının Təhsil Nazirliyi tərəfindən qardaş Türkiyədə distant təhsil alan şəxslərin diplomlarının tanınması problemi ilə bağlıdır. Hazırda Türkiyədə qiyabi təhsil yoxdur, distant təhsil var. Türkiyədə distant təhsil alanların da diplomları çox təəssüflər olsun ki, Azərbaycanda tanınmır. Türkiyənin təhsil naziri Z.Səlcuk Azərbaycanda olarkən qarşılıqlı tanınma deyəndə xüsusən distant təhsil məsələsini, ikincisi, qeyd etdiyim bəzi ali təhsil müəssisələrinin diplomlarının Türkiyədə tanıması probleminin aradan qaldırılmasını nəzərdə tutub. Digər tərəfdən, Azərbaycanın tibb təhsili ilə bağlı problemlər var. Hazırda Azərbaycanda Tibb Universitetinin məzunlarının Türkiyədə uzmanlıq oxuması ilə bağlı problemlər yaşanır. Ümumiyyətlə, azərbaycanlılar daha çox Türkiyədə təhsil almağa gedir və ən yüksək diplom tanıma faizi də qardaş ölkənin payına düşür. Yəni xaricdə təhsil alıb gələnlər sırasında Türkiyə ilk sırada durur”.
Ancaq buna baxmayaraq, bizim ən ciddi problemimizin kollec məzunları ilə bağlı olduğunu deyən K.Əsədovun sözlərinə görə, çox təəssüf ki, Azərbaycanda kollec bitirən və subbakalavr statusu alan şəxslər qardaş Türkiyədə təhsillərini davam etdirə bilmirlər. “Yəni Azərbaycanda subbakalavr pilləsi üzrə təhsil alan şəxslərin diplomları Türkiyədə tanınmır. Bu da hər il Azərbaycanda 2 min şəxsin Türkiyədə təhsilini davam etdirməsinə mane olur. Digər tərəfdən də Azərbaycanda həmin şəxslərə attestat verilmədiyi üçün onların təhsil almaları ilə bağlı problemlər mövcuddur. Biz kollec məzunlarının da diplomlarının Türkiyədə tanınmasına nail olmalıyıq. Hesab edirəm ki, subbakalavrların diplomlarının Türkiyədə tanınması məsələsi də qısa müddət ərzində həll edilməlidir. Türkiyədə distant təhsil alanların diplomlarının Azərbaycanda, bizim bir sıra ali məktəblərin və kolleclərin məzunlarının diplomlarının isə qardaş ölkədə tanınması vacibdir. Hesab edirəm ki, artıq “hə” deyilib.
İradə SARIYEVA
