“Baxmayaraq ki, dəfələrlə əlillik dərəcəsi almaqla bağlı müraciət etmişəm...”
Vətən müharibəsi iştirakçılarına, qazilərinə göstərilən dövlət qayğısı nəticəsində həm onların sağlamlığı təmin edilir, həm də sosial rifahları yüksəldilir. Amma bəzi qazilərimiz diqqətdən kənarda qaldıqlarından şikayətlənirlər.
Astara rayonunun Pensar kənd sakini, 30 yaşlı, iki uşaq atası Rüstəmov Elnur Eldar oğlu redaksiyamıza gələrək problemlərinin işıqlandırılmasını istədi.
E.Rüstəmovun sözlərinə görə, o, 27 sentyabr 2020-ci il tarixində, yəni müharibənin başlandığı gün könüllü olaraq cəbhəyə gedib, Füzulidən Şuşaya qədər döyüş yolu keçib. E.Rüstəmov bildirdi ki, müharibədə bir dəfə ayağından, bir dəfə kürəyindən, bir dəfə də başından yaralanıb, kontuziya alıb. Onun dediyinə görə, birinci dəfə oktyabrın 18-də Füzuli rayonunun Qaraxanbəyli kəndi uğrunda gedən döyüşdə yaralanıb: “İki azyaşlı övladımı qoyub müharibəyə könüllü getmişəm və müharibədə artilleriyaçı olmuşam. Birinci dəfə Qaraxanbəyli kəndi uğrunda gedən döyüşdə yaralanmışam, döyüş yoldaşlarımı buraxıb müalicə üçün hospitala getmədim. Yaralı-yaralı döyüşdüm, müalicədən imtina etdim. İkinci dəfə Qırmızı Bazar istiqamətində yaralandım. Başımdan da yara aldım, kontuziyalıyam. 2020-ci il dekabrın 27-də tərxis olunmuşam.
Müharibəyə qədər evlərdə usta-dizayner kimi işləmişəm, müharibədən bu vəziyyətdə qayıtdıqdan sonra işimi itirmişəm”.
E.Rüstəmov qeyd etdi ki, müalicə üçün maddi imkanı yoxdur, üz tutduğu qurumlar isə onun müraciətlərinə laqeyd yanaşırlar. Astara rayon rəhbərliyinin də onunla maraqlanmadığını deyən qazinin sözlərinə görə, İcra Hakimiyyəti ona nə maddi, nə də mənəvi dəstək durur, müalicəsinə hər hansı bir yardım göstərmir. Müharibə iştirakçısı kimi vəsiqə ilə təmin olunduğunu deyən E.Rüstəmov bildirdi ki, ona əlillik dərəcəsi verilməyib, səbəb isə onun döyüşdə yaralanarkən hospitalda müalicə almamasıdır. “Döyüş zamanı yaralansam da, hospitalda müalicə almaq istəməmişəm, çünki döyüş yoldaşlarımı buraxıb getmədim. Bu gün əlimdə müharibədə yaralandığımı təsdiqləyən heç bir sənəd yoxdur. Mən yardım üçün “Yaşat” Fonduna müraciət etdim, fonddan mənə bildirdilər ki, bizim sənə kömək etməyimiz üçün sən bizə Müdafiə Nazirliyinin hospitalında müalicə olunduğunu təsdiqləyən sənəd təqdim etməlisən, o sənəd isə məndə yoxdur.
Astara Rayon İcra Hakimiyyəti də mənimlə maraqlanmır, dəfələrlə müraciət etməyimə baxmayaraq, heç bir yardım göstərilmir. Bir dəfə yüz manat veriblər, ondan başqa heç bir dəstək göstərməyiblər. Müalicəyə ciddi ehtiyacım var, maddi sıxıntılar ucbatından müalicə oluna bilmirəm. İstəyirəm ki, müalicəm dövlət nəzarətinə götürülsün. Bundan başqa, mənə maddi dəstək göstərilməsinə də ciddi ehtiyacım var. Evdə iki azyaşlı körpəm var. Əlillik dərəcəsi ala bilmirəm. Baxmayaraq ki, dəfələrlə əlillik dərəcəsi almaqla bağlı müraciət etmişəm, sənədləri təqdim etmişəm, amma İcra Hakimiyyəti təsdiq etmir. Müharibə iştirakçısı vəsiqəmi veriblər, 27 dekabrda tərxis olunmuşam, amma mənə nə pensiya təyin edilib, nə də bir yadım görmüşəm”.
E.Rüstəmov qeyd etdi ki, bir neçə ay əvvəl müalicə olunmaq ümidi ilə Bakıya gəlib və xeyirsevər insanlardan dəstək gözləyir.
“Füzulinin azad olunmasına görə”, “Xocavəndin azad olunmasına görə” və “Şuşanın azad olunmasına görə” medalları ilə təltif edildiyini deyən E.Rüstəmov dedi ki, sənədlərində aldığı orden və medallar qeyd edilib.
Qazi qəzetimiz vasitəsilə ölkə başçısı İlham Əliyevə və ölkəmizin Birinci vitse-prezidenti Mehriban Əliyevaya müraciət edərək, üzləşdiyi problemi nəzarətə götürmələrini xahiş etdi.
İradə SARIYEVA
