Qarabağ müharibəsi iştirakçısı və əlili statusunun heç cür ləkələnməsinə, kimlərinsə əlində alətə çevrilməsinə imkan verilməsi yolverilməzdir.
Çox təəssüflər olsun ki, son zamanlar özünü “Qarabağ müharibəsi əlili” kimi təqdim edənlər çoxalıb, bu müqəddəs addan sui-istifadə hallarının artdığı müşahidə edilir. Bir müddət əvvələ qədər “Qarabağ müharibəsi əlili” adı altında dilənənlər, o məmurun, bu məmurun qapısını döyənlərə rast gəlinirdi. Bu gün isə bəziləri özünü “Qarabağ müharibəsi əlili” olaraq qələmə verərək başqa xoşagəlməz işlər törədirlər.
Məlum olduğu kimi, bir sıra seqmentlərdə Bakı şəhəri, Binəqədi rayonu, Biləcəri qəsəbəsində Qarabağ əlili kimi təqdim olunan şəxsin özünü yandırmağa cəhd etməsilə bağlı paylaşımlar edilib.
Məsələyə Daxili İşlər Nazirliyi münasibət bildirib.
DİN-dən “bu, onun birinci əməli deyil, dəfələrlə əlillik adından sui-istifadə edərək, belə hərəkətlərə cəhdlər göstərib” - deyə münasibət bildirilib.
Özünü “müharibə əlili” kimi qələmə verməklə bu kimi xoşagəlməz işlər törədənlərin bir qisminin saxta əlillik dərəcəsi aldığı gizlin deyil. Hansısa yolla “müharibə veteranı” vəsiqəsi əldə edənlər də az deyil.
“Dövlətin aidiyyəti orqanları ilə həm mətbuat, həm də bizlər belələrinin üstünə gedib, o saxtakarları ifşa etməliyik ki...”
Tanınmış hərbi ekspert Tərlan Eyvazov “Bakı-Xəbər”ə bildirdi ki, bu, bütün cəmiyyəti incidən, narahat edən bir problemdir: “Çox təəssüflər olsun ki, hələ də bir çoxu dövlət tərəfindən verilən adların, imtiyazların arxasında gizlənərək bu cür əməllər törədir. Adətən, əsl döyüşçülər heç bir vaxt belə etməzlər, etməyiblər də.
Amma “Qarabağ müharibəsi əliliyəm” deyib ən çox çığır-bağır salanlar isə barələrində danışdıqlarımız olurlar. Bu saxta əlillik dərəcəsi daşıyanlar barədə aidiyyəti orqanlara məlumatlar da verilir, cəmiyyətin də reaksiyası mənfidir, Qazilər birliyinin də bəyanatı var. Bunun bizə ən çox dəyən mənəvi ziyanı ondan ibarətdir ki, insanlar, cəmiyyət elələrini görür və bütün veteranlara, əlillərə o cür qiymət verir. Birincisi, sən əgər müharibə iştirakçısısansa, əlilsənsə, gərək nümunəvi vətəndaş olasan, qayda-qanunlara əməl edəsən. Əlillik dərəcəsi sənə haqq vermir ki, gedib haranısa tutasan, hardansa qanunsuz nəyisə tələb edəsən. Əlilsənsə, aidiyyəti orqanlar tərəfindən sənə güzəştlər edilir ki, sən hardasa bir obyekt götürəsən, bunlar hamısı olmalıdır, qanunda nəzərdə tutulur. Amma çox təəssüflər olsun, bu yoldaşların bir qismi buyururlar ki, yox, bizə qanunda nəzərdə tutulanlardan da əlavə imtiyazlar verilməlidir, hara getsək, bizim üçün yollar açıq olmalıdır, bizdən heç vergi və sair tutulmamalıdır. Belə olmaz, bu düzgün deyil. Həmişə buna qarşı olmuşam, öz sözümü demişəm, indi də deməkdə davam edirəm”.
T.Eyvazovun sözlərinə görə, konkret olaraq barəsində danışılan şəxs haqqında DİN açıqlama veribsə, demək, onun barəsində bu rəsmi qurumun əlində təkzibolunmaz faktlar var. “Artıq belələrinin ifşa edilməsi zərurətə çevrilib, bu labüddür. Mən özüm də belələrini ifşa edəndə üzərimə gələnlər çox olur. Biri yalandan deyir Əfqanıstanda olmuşam, başqa birisi deyir mənə “Milli Qəhrəman” adı verdilər, imtina etdim. Onların bu yalanlarını ifşa edərkən həm özləri, həm ətrafları, həm onları dəstəkləyənlər, həm də adını “jurnalist” qoyanlar üstümüzə gəlirlər.
Amma qanlı döyüşlərdə iştirak edən, canını vətəndən əsirgəməyən insanlar abırlarına qısılıb oturanda belələri meydan sulayır. Dövlətin aidiyyəti orqanları ilə həm mətbuat, həm də bizlər belələrinin üstünə gedib, o saxtakarları ifşa etməliyik ki, cəmiyyət onların kim olduğunu bilsin” - deyə T.Eyvazov qeyd etdi.
İradə SARIYEVA
