Sovet dönəmində tikilən çoxmənzilli binaların sökülməsi günümüzün aktual məsələlərindən biridir. İstismar müddəti bitmiş köhnə binalarda aşınma prosesi ildən-ilə güclənir. Bir neçə ildir paytaxtda bu tip binaların sökülüb yerində yeni çoxmərtəbəli binaların tikintisi prosesi aparılsa da, son vaxtlar bu sahədə problemlər yaşanmaqda davam edir.
Qeyd edək ki, hazırda paytaxtda bu tip binaların təmirə böyük ehtiyacı var. Təqribən 50 yaşlı bu binalarda "maksimum mənzil-minimum komfort" prinsipi əsas götürüldüyündən, binaların istismar müddəti 40 ili ötdüyündən, binaların konstruksiya sistemlərinin müayinə edilməsi vacibdir.
Qeyd etdiyimiz kimi, qaydalara əsasən, istismar müddəti 40 ili ötən binalar yenidən təmir olunmalıdır. Ancaq paytaxt ərazisində elə binalar var ki, onlar nəinki 40 il, hətta 100 ildir ki, təmir olunmur.
Belə binalardan biri Xətai rayonu, 8 Noyabr prospektində yerləşən ikimərtəbəli yaşayış binasıdır. Qeyd etdiyimiz ünvanda olan yaşayış binası qəzalı vəziyyətdədir. Haqqında danışdığımız bina qəzalı vəziyyətdə olduğu üçün hər an uça bilər. 1 əsrdən çox yaşı olan binanın taleyi ilə bağlı hələlik yekun qərar yoxdur. Sakinlər Nazirlər Kabinetinin verəcəyi qərarı səbirsizliklə gözləyirlər. Bir əsrdən çox yaşı olan bina sakinlərin yuxusunu ərşə çəkib. Tamamilə qəzalı vəziyyətdə olan binanın hər an uçma təhlükəsi var.
Məlumat üçün bildirək ki, 107 il əvvəl inşa edilən bina əvvəllər Neft-Yağ Emalı Zavodunun balansında olub. 2000-ci illərdə həmin bina Xətai Rayon Mənzil-Kommunal Təsərrüfatı Birliyinin balansına keçirilib.
“Rəylər toplanaraq binanın sökülməsi, vətəndaşların başqa əraziyə köçürülməsi ilə bağlı Nazirlər Kabinetinə müraciət edilib”
Məsələ ilə bağlı Xətai Rayon Mənzil-Kommunal Təsərrüfatı Birliyindən bildirildi ki, 2018-ci ildə Fövqəladə Hallar Nazirliyi binanın qəzalı olması və istismar müddətini başa vurması ilə bağlı rəy verib. Həmin rəylər toplanaraq binanın sökülməsi, vətəndaşların başqa əraziyə köçürülməsi ilə bağlı Nazirlər Kabinetinə müraciət edilib. Binanın taleyi ilə bağlı Nazirlər Kabinetinin qərar verəcəyi gözlənir.
Günel CƏLİLOVA
